Dua buah kandang menua di Miri diripot positif rabies

Utusan Borneo (Sarawak) - - Berita Iban -

MIRI: Dua buah agi kandang menua ba bagi menua tu udah diripot kena rampit rabies, ku Komiti Pemutar Penusah Ngenyit Nengeri.

Endur tu iya nya Padang Bilun Miri enggau Shin Yang Plywood Sdn Bhd ba kandang menua Kuala Baram.

Ba penerang dikeluar kena Hari Lima, 12 Oktober, tu tadi, Sapit Kepala Menteri Datuk Amar Douglas Uggah Embas ti mega chairman komiti nya madahka tiga agi kandang menua udah dipadah kena rampit rabies. Kandang menua bukai iya nya Opis Pengerai Pelilih Dalat ba bagi menua Mukah.

Tu ngasuh penyampau kandang menua kena rampit rabies manggai 44 buah ba nengeri naka diatu.

Penerang dikeluarka Opis Servis Veterinar mega udah nambahka 3,000 butul vaksin ngagai Miri. Kesemua 28 iku pemantu veterinar mega udah digerah ngeripot diri gawa kena Hari Satu ( 15 Oktober) tu, nyaup tubuh sida ti gawa ba opis nya.

Bisi mega penerang madah baka komiti udah setuju meri keluar vaksin dikena nyaup nagang igi penyakit ari ngerekai.

Ba pekara bekaul, siku pengempu ukui udah dikompaun RM500 laban mai ukui pansut ari kandang menua kena rampit rabies enggau nadai permit mindah ari raban bekuasa veterinar nengeri, ari Kuching ngagai Limbang.

Nya alai, komiti nya ngingatka mensia mayuh anang nejuka ukui sida lepau sereta dibai pansut ari kandang menua kena rampit rabies enggau nadai surat pemendar ari opis veterinar.

Penyalah kena tinggang ukum di baruh Section 37(2) & (3) of the Veterinary Public Health Ordinance 1999, enggau ukum enda ngelui ari RM5,000 tauka jil enda lama ari tiga bulan tauka kededua ukum nya.

Newspapers in Malay

Newspapers from Malaysia

© PressReader. All rights reserved.