Opis Menteri, ejensi diperansang majak bebendar ngemujurka GRP
KUCHING: Opis Menteri enggau ejensi diperansang majak bebendar ngemujurka ‘Amalan Kawal Selia Baik (GRP)’ nyadi agenda ke beguna amat kena ngemudahka pengawa nyaga ke kondusif lalu meransang produktiviti enggau pemansang ekonomi ti besai agi bungkur.
Sekretari Perintah Nengeri, Datuk Amar Jaul Samion madah, iya pechaya pemansang enggau pengawa ngemujurka GRP ulih dipejaliak nengah chara berenggat enggau chara negapka pengawa sereta kerejasama entara opis menteri, opis enggau ejensi nengeri kena nentuka pengasi polisi ba semua renggat.
“Aku enggau ati ti gaga madahka Sarawak sebuah nengeri ti tebilang di Malaysia ti nyanggup ngemujurka GRP enggau ‘Analisis Impak Kawal Selia (RIA)’, sereta udah mujur ngemansutka surat tesau bekaul enggau Pemansang enggau Bejalaika Atur Polisi Nengeri (SPDIR) kena 16 Mei 2019.
“Tuju SPDIR iya nya kena ngelakuka proses pengawa nyaga enggau ngemata ngambika ngasi agi, efisyen sereta ngembuan tanggungpengawa lalu nyapai pengasi ba atur polisi ke besai agi ba semua opis menteri enggau ejensi perintah,” ku iya bejaku ba pengerami bejadi GRP Sarawak 2020 ti diatur Perbadanan Produktiviti Malaysia (MPC) nengah aum video ditu, kemari.
Jaul madah, nengah penerang ke digumpul MPC, 13 nengeri ti bejalaika GRP, bisi 1,386 lisin dagang udah dipansik, 14 iti lisin diperambu ngambika dikinsil lalu 1,372 iti lisin benung disemakaka.
“Nyentuk ke sehari tu, Sarawak udah bejalaika 11 projek pengemun ari baruh inisiatif GRP ke alai enam projek nya nitihka proses RIA,” ku iya.
Ku iya, nambah produktiviti mengkang nyadi siti pemar di menua tu, nya alai nya patut nyadika peransang ngagai pengawa nentuka pemansang ekonomi ke tegap belama.
Tu ku iya, nyengkaum beranakka puku dalam infrastruktur ekosistem ti kondunsif, ngangkatka kualiti pelajar enggau latih, nambahka inovasyen sereta ngena teknologi lalu muka potensi alekonomi digital nyadi pengerembai pemansang ekonomi jemah ila.
Berebak enggau nya, Ketuai Direktor MPC Dato’ Abdul Latif Abu Seman ba jaku pengelalu iya madah, MPC enggau sekeda opis menteri sereta ejensi ke bukai seruran mansik atur baru enggau ke bisi diatu kena ngangkatka kualiti atur nengah bemacham inisiatif GRP.
Ku iya, tu nyengkaum RIA, nginsil pengawa nyaga enggau ngemata, Atur Ngulihka Permit Konstruksyen (DCP) enggau Ngemodenka Lisin Dagang (MBL).
“Kelimpah ari nya, bisi chara ‘Guillotine’ enggau program ‘Langkah Bukan Takrif (NTM)’ ti yang mansik penegul ba pengawa dagang dalam nengeri enggau lisin sereta permit kena nambahka penyikar.
“Ungkup Sarawak, program NTM keterubah deka berengkah kena 30 November ti mungkur semilan opis menteri enggau 14 bengkah opis,” ku iya.
Bekaul enggau seminar nya, Abdul Latif arap endar utai ke dikunsika pengelicha ti dikangau ari Opis Kampung Sarawak enggau Kaunsil Pemansang Bintulu deka mantu pesereta negapka penemu bekaul enggau integriti, inklusif, pengarap enggau pengelurus baka ti dikemeratka perintah.
“Aku ngarapka pengawa tu deka meri pemaik sereta negapka agi pengawa kitai ti deka ngangkatka kualiti langkar kereja nyaga enggau ngemata,” ku iya.
Objektif ngatur seminar nya endang kena negapka tusun atur institusyen ba pengawa ngangkatka produktiviti nengah GRP.
Bala ke enggau ba seminar nya baka bala pemesai perintah, kaban gerempung enggau Balai Dagang sereta pengari ari universiti nengeri tu.
Sama bisi enggau ba seminar iya nya Kaban Kaunsil MPC, Datuk Abang Abdul Karim Tun Openg; Direktor MPC Sarawak, Sarimah Misman enggau Direktor Unit Ngemodenan Kereja Nengeri, Michael Ronnie Langgong.