Utfordring til Nye vegar og Faedrelandsvennen

Nyleg var det eit stort oppslag i Faedrelandsvennen om oppstart av E 39 vestover frå Kristiansand.

●●Dette er berre eit av mange oppslag om kor bra det blir med fire felts motorveg frå Kristiansand til Stavanger. Men det er ei sak som nesten aldri blir omtalt, og det er omfanget av bompengar på strekninga.

Dersom du søkjer på nettsidene til Faedrelandsvennen, så finn du fleire titals oppslag om fordelane ved fire felts E 39. Men du skal leite lenge for å finne noko om kva du må ut med i bompengar for å køyre på motorvegen. Nye vegar er heller ikkje rause med informasjon om bomtakstar. Selskapet har ei nettside med omfattande informasjon om E39, kostnadsreduksjon og samfunnsnytte. Men eg klarer ikkje å finne noko om kva bilistane må betale i bompengar på dei ulike strekningane mellom Kristiansand og Stavanger.

Media inklusive Faedrelandsvennen viser stor interesse for bompengar og bomprotestar for tida. Derfor er det underleg at det ikkje er meir fokus på bomplassering og bomtakstar på den nye motorvegen til Stavanger.

Vi kjem ikkje bort i frå at det er ein sterk samanheng mellom ambisjonane for vegutbygging og den kraftige auken i bompengar som vil komme. Skuldast denne mangelen på informasjon bevisst elle ubevisst underkommunisering av denne klare samanhengen? Bør vi ikkje få med alle sidene av medaljen og ikkje feie nedsida under teppet? Eg utfordrar derfor Nye vegar og Faedrelandsvennen til å gi oss oppdatert informasjon om bomstasjonar og bompengar langs E39 til Stavanger.