Kraftig lønnshopp
Lønnsutgiftene i kommunen aukar med nesten 25 millionar kroner neste år. Rådmannen gjer framlegg om å stengje ei avdeling på sjukeheimen.
Dette er nokre av elementa i 2019-budsjettet for Bø kommune som rådmann Åse Egeland og staben hennar presenterte for kommunestyret måndag ettermiddag.
Blir vertskommune
Medan dei kommunale lønnsutgiftene i 2018 ligg på kring 275 millionar kroner, så har den posten gjort eit hopp til 300 millionar for neste år.
– Bakgrunnen er at Bø blir vertskommune for Nav. Ei anna forklaring er at teknisk etat i Sauherad flyttar til Bø, seier rådmann Åse Egeland i ein kommentar til Varden.
– Så det er ikkje lønnstillegga til toppane som er forklaringa?
– Nei, det er det ikkje. Oppgjeret i år har vore moderat, seier rådmannen.
Ho gjer framlegg om å stengje ei avdeling på Bø sjukeheim - noko som gjev ei innsparing på 4,5 millionar kroner.
– I praksis blir det ein reduksjon på 2-3 plassar fordi Nome kommune har sagt opp avtala med tre pasientar, seier kommunalsjef Terje Kili.
Budsjettet er gjort opp med eit lite overskot på 88.000 kroner, medan tilsvarande tal i 2017 var ein pluss på nesten 29 millionar kroner. Fleire av kommunalsjefane gav uttrykk for at dette er det mest krevjande budsjettet dei har opplevd. Bakgrunnen for dette er blant anna at inntektene til kommunen går ned. Dette fordi kommunen er blitt meir effektiv.
Moderat avgiftsauke
Framlegget frå rådmannen legg opp til ein moderat avgiftsauke. For ein ordinaer bustad naer Bø sentrum aukar dei kommunale avgiftene med 2,38 prosent.
Ein heildagsplass i barnehagen blir 80 kroner dyrare per månad frå nyttår, og prisen stig med ytterlegare 50 kroner frå 1. august 2019. Ein heil plass i skulefritidsordninga aukar med 84 kroner i månaden, går det fram av budsjettet.
Innanfor heimetenester stig satsen for tryggleiksalarm med 12 kroner i månaden. I musikkskulen blir satsen for gruppeundervisninga høgda med 75 kroner per månad medan individuell undervisning der vert 89 kroner dyrare.
Elles syner budsjettet at kommunen skal investere 49 millionar kroner neste år. Av dette går 19,5 mill. til kommunehuset og 14,6 millionar til vann, avløp og renovasjon.