Palawan health personnel sumasailalim sa sanitation training
Sinasanay ng Department of Health (DoH) sa rehiyon ng MIMAROPA ang sanitary inspectors at health personnel sa local level upang mapigilan ang mga suliranin ng komunidad sa kapaligiran.
Ayon sa DoH regional director na si Dr. Eduardo Janairo, “Promotion of public health and protection of the community, as well as the environment, is vital in order to prevent another onset of gastrointestinal outbreak such as diarrhea, cholera and gastroenteritis.”
Inihayag ito ni Janairo sa pagsisimula ng DoH nitong Martes ang apat na araw na training sa Community-led Total Sanitation (CLTS) para sa sanitary inspectors at iba pang health personnel.
Aniya, kailangan ang training sa lokal na lebel upang wastong maihanda at maturuan sila kung paano matutukoy ang isang kritikal na sitwasyon, na epektibo sa sanitation at cleanliness program at kung paano malalaman ang halaga ng sanitasyon at hygiene para sa kapakanan ng mga Palaweños.
“We want all sanitary inspectors and health personnel at the local level to be properly equipped and trained on the organization, management, education, enforcement, consultation, and emergency response for the prevention of environmental health hazards in the community,” ani Janairo.
Ang apat na araw na training ay matatapos sa ngayong araw (Nobyembre 10) at tutuon sa wastong pagtukoy sa pathogens, senyales nito at mga sintomas, sanhi at kung paano ito maiiwasan. “Sustainable sanitation can only be achieved through the support of the local government units and local health officers. By recognizing their responsibility and providing them the necessary tools and skills, outbreaks and disease transmission at the local level can be avoided immediately,” aniya.
Ang pangunahing sanhi ng pagkakahawa at pagkalat ng gastrointestinal infections, gaya ng intestinal parasitism, ay dulot ng hindi wastong pagtatapon ng dumi, ayon sa kanya.
Ito rin ang nasa likod ng kontaminasyon ng pinagkukunan ng tubig, na maaaring mauwi sa outbreak ng sakit gaya ng cholera at gastroenteritis.
Tinukoy ng Water and Sanitation Division (WSD) ng Environmental and Occupational Health Office (EOHO) ng DoH ang environment factors gaya ng polusyon sa hangin at tubig, kondisyon ng sanitasyon at hygiene practices, na nag-aambag sa pagkalat ng mga sakit, aniya.
Ito ang sanhi ng 22 porsiyentong naiulat na sakit at anim na porsiyentong naiulat na kaso ng pagkamatay sa bansa.