Bokal nagpaputok ng boga, tiklo
LA PAZ, Tarlac – Arestado at sabit sa kasong illegal discharge of firearm, alarm and scandal at frustrated homicide ang isang Sangguniang Bayan Member ng Angadanan, Isabela makaraang magpaputok ng baril nang makialam ang isang 28-anyos na lalaki habang nakikipagtalo siya sa kanyang biyenan sa Barangay Dumarais, La Paz, Tarlac, Martes ng umaga.
Nakumpiska mula kay Mike Anjelo Bariuad Managuelod, 30, bokal ng Angadanan, may asawa, at pansamantalang nakatira sa nasabing barangay, ang isang Jericho 941 caliber pistol.
Ang baril ay pag-aari ng pamahalaang bayan ng Angadanan at nakaisyu kay Nelson Managuelod, na nilagdaan ni Mayor Jose Panganiban, Jr.
Dakong 8:00 ng umaga umano nang magtalo ang suspek at biyenan nito hinggil sa personal na bagay, hanggang makialam ang hindi pinangalanang lalaki kaya nagpaputok ng baril ang opisyal.