House Speaker nanindigan sa Con-Ass
Makikilahok man o hindi ang Senado, magtitipon ang House of Representatives bilang constituent assembly para amyendahan ang 1987 Constitution.
Sinabi ni Speaker Pantaleon Alvarez na handa rin ang congressmen na ipaglaban ang kanilang paninindigan upang matukoy ang constitutionality ng kanilang aksiyon sa Supreme Court.
“Ngayon, kung mayroon mang disagreement, mayroon naman tayong Korte Suprema kung saan naatasan din na magresolve ng mga ganitong hindi pagkakaintindihan,” aniya.
Sa isang panayam sa radyo matapos ibasura ng Senado ang House Concurrent Resolution No. 09 na nagpapatibay sa constituent assembly, minaliit din ni Alvarez ang panukala ni Senador Panfilo Lacson na patalsikin ang simumang senador na makikilahok sa House-initiated constituent assembly.
Sinabi sa DZMM radio ng lider ng House, na ang paggalang sa constitutional duty ay hindi batayan para patalsikin ang isang mambabatas na inatasang gawin ang kanyang trabaho.
Gayunman, umaasa si Alvarez na sa 23miyembro ng Senado, mayroong malaking posibilidad na may iilang susuporta sa HCR 09. Sinabi ri niya na: “Basta kami nag-umpisa na kami, tuloy-tuloy lang ito. Magkakaroon ng pagdinig at iimbitahin namin yung mga ibaibang resource persons para mag-contribute doon ng kanilang mga ideas kung papaano natin gagawin ito.”
Sinabi ni Southern Leyte Rep. Roger Mercado, chairman ng House Committee on Constitutional Revision, na handang-handa na ang House na ipresinta ang kanilang mga panukalang pagbabago, at maaaring magsimula ang constituent assembly sa mga susunod na araw.
Sa susunod na linggo, sisimulan ng Lower House ang pag-iimbita sa mga senador para talakayin ang pagbabago sa Saligang Batas.
Sakaling walang dadalong senador sa mga pagpupulong, patuloy pa ring tatrabahuin ng Lower House ang Charter.
Tiniyak ni Alvarez na ang lahat ng mga pagbabago ay ipapasa lamang kapag ito ay inaprubahan ng ¾ boto ng lahat ng miyembro ng constituent assembly, makilahok man o hindi ang mga senador.
Sa gitna ng mga akusasyon ng railroading sa pagpasa ng legislative measures, pinagtibay ng Lower House nitong Martes ang HCR 09 sa pamamagitan ng viva voce vote.
Tinuligsa ng Makabayan lawmakers ang paraan ng adoption dahil hindi nakumpleto ang plenary debates.
Nagbabala si Bayan Muna Rep. Carlos Zarate na ang taktika ng House leadership ang magiging sentro sa Charter change.
“Filipinos should be forewarned about this. They will ram into our throats their own selfserving constitutional agenda,” ani Zarate.