2 bebot huli sa shabu

JAEN, Nueva Ecija – Arestado ang dalawang drug personality makaraang makuhanan umano ng ilegal na droga sa Barangay Lambakin sa Jaen, Nueva Ecija, nitong Biyernes ng umaga.

Pinangunahan ni Chief Insp. Joel dela Cruz ang pagsisilbi ng search warrant at nakumpiskahan umano ng tatlong sachet ng hinihinalang shabu si Lorena Robles y Roque, 45, residente sa nasabing barangay.

Naaktuhan naman umanong nagre-repack ng shabu si Michele Buhayan y Barrientos, na nakumpiskahan din ng drug paraphernalia at mga bukas na pakete ng droga.

Nahaharap sa kasong paglabag sa Comprehensive Dangerous Drugs Act (RA 9165) ang mga suspek.