Qatar nagsisi sa airport search incident

DOHA (AFP) — Sinabi ng Qatar nitong Miyerkules na pinagsisisihan nito ang paglabag sa personal na kalayaan, sa pagpapaliwanag sa invasive examinations sa mga babaeng pasahero para hanapin ang ina ng inabandonang sanggol sa paliparan sa Doha.

Nitong unang bahagi ng buwan, pinababa ang mga babae mula sa isang flight ng Qatar Airways na patungong Sydney sa Doha at pinilit na sumailalim sa inspeksyon sa ari matapos isang bagong panganak na sanggol ang natagpuang inabandona sa isang banyo ng paliparan sa Hamad International.

“While the aim of the urgentlydecided search was to prevent the perpetrators of the horrible crime from escaping, the State of Qatar regrets any distress or infringement on the personal freedoms of any traveler caused by this action,” nakasaad sa pahayag sa website ng gobyerno.

Sinabi ni Prime Minister Sheikh Khalid bin Khalifa bin Abdulaziz Al Thani, sa pahayag na isang “comprehensive, transparent” investigation ang isasagawa.

Idinagdag niya na ang Qatar ay “committed to ensuring the safety, security and comfort of all travelers transiting through the country”.

Ang insidente ay nagdulot ng diplomatic row sa pagitan ng Australia at Doha, sa pagprotesta ng Canberra tungkol sa pagtrato ng Qatar sa mga mamamayan nito.

At nitong Miyerkules, lumitaw din na ang bilang ng mga apektadong eroplano ay mas malaki kaysa sa unang inakala.

Sinabi ni Australian Foreign Minister Marise Payne sa parliament na ang mga babae sa “10 aircraft in total” “ay isinailalim sa mga pagrekisa na inilarawan niya bilang “grossly disturbing” at “offensive”.

Sinabi ni Payne na 18 kababaihan - kabilang ang 13 Australian - sa isang flight noong Oktubre 2 patungong Sydney ang apektado, kasama ang “other foreign nationals”. Isang babaeng French ang kabilang dito.