Ang “democrazy” sa bansa

Bandera (Visayas) - - News -

ANG demokrasya ay namamayagpag na naman sa Commission on Elections dahil kahit na ang mga dispalinghado sa pag-iisip ay pinayagang makapag-file ng kanikanilang certificate of candidacy (COC) para senador at iba’t ibang elective positions.

Si Daniel Magtira, 57, ng Tondo, Manila, ang isa sa mga ito. Sinabi niya na ipo-promote niya ang Pinoy rock kung hindi siya madi-disqualify na naman ng Comelec.

Ani Magtira, mahal na mahal pa rin daw niya ang actress at TV host na si Kris Aquino na kanyang dating asawa.

Sinabi naman ni Anson Tuana, 39, na lulutasin niya ang problema ng trapiko sa Metro Manila at inflation kapag siya’y naging senador.

Aniya, siya’y matalik na kaibigan ni Chinese President Xi Jianping na nagbigay sa kanya ng mga damit at bodyguards.

Sabi ni Tuana na dati siyang katalik ng Presidential Communications Asst. Secretary Mocha Uson.

Bago naman sinumite niya ang kanyang COC, nagtalumpati muna itong si “King Salam” Emilio Delfin Lafan Lusiong Tagean.

Sinabi ni Tagean sa kanyang talumpati sa harap ng Comelec headquarters sa Intramuros, Manila na kapag siya’y nahalal, ang bansa ay makaka-produce ng astronauts at cosmonauts na tatawagin niyang “kinunot.”

Ang kinunot ay isang ulam sa Bicol kung saan tagaroon si King Salam.

Si Benjamin Rivera, isang refrigerator technician, ay nag-file ng COC pagka-mayor ng Maynila.

Mula pa noong 1998, tumatakbo na si Rivera pagka-mayor at Pangulo, pero hindi siya pinalad na manalo.

Naalaala ko tuloy si Tabije na janitor-messenger ng National Press Club noon na pinatakbo ng mga reporters (na walang magawa, haha!) para mayor ng Maynila noong dekada ‘90.

Nakakuha si Tabije ng apat na boto sa pagka-alkalde—ang kanyang boto at yung tatlo ay sa mga salbaheng reporters na nagpatakbo sa kanya.

Ang democracy—na, ani Abraham Lincoln, ay government of the people, for the people and by the people—ay tinatawag minsan na “democrazy.”

Kahit ano pa man ang sabihin ng mga kritiko tungkol sa demokrasya, ito’y buhay na buhay sa Pilipinas.

Tingnan mo na lang ang mga tumatakbo sa public office.

❏❏❏

Binay kontra Binay sa Makati City.

Tatakbo for re-election si Abby samantalang ang kanyang kapatid na si Junjun ay tatakbo rin.

Sinipa sa puwesto si Junjun ng Office of the Ombudsman dahil sa mga diumano’y anomalya sa Makati City Hall, pero ang desisyon ng Ombudsman ay ibinasura kamakailan ng Court of Appeals.

Gustong bawiin ni Junjun Binay ang puwestong kinuha sa kanya ng Ombudsman.

Ang kanilang ama na si Jojo, na tatakbo rin bilang congressman sa Makati, ay pabor kay Abby.

Si Senator Nancy naman, na tumatakbo for reelection, ay pinapaboran naman si Junjun.

It’s a merry-go-round sa Makati, the country’s business capital.

Kung sino man sa dalawang Binay ang mahahalal, ang lugi ay mga hangal na botante ng Makati.

❏❏❏

Magbibitiw si Foreign Secretary Alan Peter Cayetano upang tumakbo bilang congressman sa Taguig.

Ang kapatid ni Alan Peter na si Pia ay isa sa mga nangunguna sa mga surveys para senador.

Nagkakaisa ang mga magkakapatid na Cayetano, nagbibigayan di gaya ng mga Binay.

Inihayag ni Alan Peter na gusto ni Pangulong Digong na siya ay maging Speaker of the House.

Kung ito’y totoo, magiging kalaban niya ang dating Pangulong Gloria Macapagal-Arroyo, na ngayon ay Speaker

Makikipagpustahan ang inyong lingkod: Si GMA ang mananalo.

Newspapers in Tagalog

Newspapers from Philippines

© PressReader. All rights reserved.