Kastoy, Kapid, Ditoy Hawaii

Bannawag - - Itoy A Bilang - Ni RIC AGNES

KALPASAN ti tallo ket kagudua a bulan a panagipugso ti Bulkan Kilauea iti minilmilion a metro kubiko a lava idiay Puna, Big Island, nagin-inut a kimmapuy ken nagkalma itay napalabas a lawas ti nasao a bulkan. Saanen a pumallangatok dagiti lava nga aggapu iti nasurok a maysa a kilometro ti kaatiddogna a birri ti daga a pinarnuay dagiti rinibu a ginggined, maysa kadagitoy ti immabot iti pigsa a 5.3 iti Richter scale.

Ti panagbettak ti bulkan a nangrugi idi Mayo 3 ti nakaigapu a nagaburan ti nalawa ken nauneg a dan-aw ken ti geothermal power plant iti nasao a lugar, ti napintas a buya ti Kapoho beach a paspasiaren dagiti turista, ken ti pannakauram ti nasurok a pito gasut a balay ken pasdek. Maipagarup nga ad-adu ti naibel-a a lava iti daytoy a gundaway ngem ti lava a naipugso iti namitlo daras a bimtak ti nasao a bulkan iti napalabas a dua a siglo.

Ngem kadagiti agpalpaliiw a taga-Puna, kas man adda pannakainaig ti bulkan iti eleksion lokal iti Hawaii County a naaramid itay Agosto 12.

Kabayatan ti nabara a risiris dagiti dua nga agpaidasig a para konsehal ti Distrito 4 (amianan ti Highway 130 wenno Keaau-Pahoa Road) ti Hawaii County, da Eileen Ohara, 66, ti agdama a konsehal, ken Ashley D. Kierkiewicz, 32, ti kimmarit ken damona ti timmapog iti politika, para iti eleksion primaria, agtultuloy met ti panagayus ti lava a puon ti nakaipapilitan dagiti agindeg kadagiti subdibision a ginaburan ken pinuoran ti lava, ti napan nagpaing iti evacuation center idiay sentro ti Pahoa.

Gapu ta dua laeng dagiti agpaidasig iti dayta a takem, ti mangabak iti eleksion primaria ti maibilangen a nangabak. Nayanak idiay Wilmington, DE ni Eileen O’Hara. Addaan iti doktorado iti natural resource economics, agpapaay a propesora iti University of Hawaii, Hilo Campus ken agdama a konsehal ti District 4, Hawaii County. Nagturpos ni Ashley iti political science iti University of Hawaii ken agpapaay a Senior Account Executive ti Hastings & Pleadwell. Apoko daydi Pelagio Cariño nga immay nagtrabaho iti kaunasan ditoy Puna, Hilo, Hawaii idi 1924. Anak ni Marietta Duldulao ti Binaratan, Sarrat, Ilocos Norte.

Narikut ti kasasaad dagiti pamilia nga adda iti evacuation center. Adu kadagitoy ti awanan naibakuit nga alikamen, makan, kawes, kdp. Ket nupay adda dagti kameng ti civil defense manipud iti munisipio ken estado, saan nga umdas dagitoy a mangipaay iti serbisio iti kastat’ kaaduna a pamilia.

Tapno naan-anay ti serbisio a maipaay kadagiti makasapul iti saranay, binuangay ni Ashley D. Kierkiewicz, kaduana ni Ikaika Marzo, maysa a negosiante, ti Pu’uhonua O Puna, wenno “The Hub.” Kangrunaan a panggep ti The Hub ti mangikalikagum iti pannakabangon ti pagtaengan a para kadagiti agsagaba iti didigra a kas iti pinarnuay ti bimtak a bulkan wenno iti kanito a dumteng ti bagyo wenno panagaluyo ti taaw. Maipatungpal daytoy babaen ti panagtinnulong ti gobierno ken dagiti pribado a kompania. Agpaay pay ti The Hub a mangidanon kadagiti kasapulan dagiti nagbakuit, agraman ti pannakaibunong dagiti taraon.

“Awan pannakainaig ti politika wenno ti kandidaturak iti itutulongko kadagiti biktima ti Kilauea,” kinuna ni Kierkiewicz. “Bayat ti itutulongko wenno kaaddak iti bakuitan, impaigidko ti politika. Ket no adda makaamiris kadagiti adda iti bakuitan nga agpaidasigak a pabotosan a konsehal, isungbatko a saan a nasken kaniak dayta a banag iti dayta a kanito. Ket no bilang kayatda a mapagsasaritaan ti maipanggep iti panagpaidasigko, kiddawek nga iti ruar ti bakuitan ti pagsasaritaanmi,” innayonna.

Iti sabali a bangir, iti biang ni Eileen Ohara, indiayana met ti tulongna kadagiti biktima ti Bulkan Kilauea ken kadagiti adda iti bakuitan babaen ti panangisalakanna kadagiti nabati a taraken nga aso wenno pusa kadagiti pagtaengan a napanawan. Kas maysa nga agdama nga opisial ti ili, inkalikagumna ti pannakaaramid ti naisangsangayan a sesion iti lehislatura tapno mataming dagiti banag a pakaseknan dagiti biktima ti agay-ayus a lava.

Kas ken ni Kierkiewicz, insayangkat ni Ohara ti panangbirok iti umno a pagtaengan dagiti biktima ti Bulkan Kilauea ken ti pannakataming ti seguro (insurance) dagiti nadadael a sanikua, balay, kdp. Inyusuat pay ni Ohara ti pannakaipalubos dagiti dadduma a paset ti bakir a mauma tapno mamulaan iti papaya ken nadumaduma a nateng. Kas naagapad iti napalpalabas, nagaburan iti lava dagiti pagtatalonan, wenno saan, nabangenan dagiti kalsada nga agturong kadagiti kapapayapaan.

Dua nga aldaw sakbay ti eleksion primaria, nagin-inut a nagkulpa ti pannakaipugso dagiti lava. Iti bigat ti Sabado, Agosto 12, nagturong dagiti adda iti bakuitan ken dadduma nga umili kadagiti presinto a pagbotosan.

“Ti napaliiwko a pasnek ken alibtakda a timmulong kadagiti nagsagaba iti didigra ti nagrukodak no asino ti binotosak a konsehal,” kinuna ni Danielle Wescott idi rimmuar manipud iti biumbo. Ngem idi maimtuod no ni Kierkiewicz wenno ni O’Hara ti binutosanna, saan a simmungbat. Namrayanna laeng ti immisem.

Eileen O’Hara

Ashley Kierkiewicz

Newspapers in Tagalog

Newspapers from Philippines

© PressReader. All rights reserved.