No Adda Sigsigloten,

Bannawag - - Itoy A Bilang - Adda Met Warwaren

ADBOKASIAK daytoy financial freedom. Daytay pannakawayawaya iti panagparparikut iti kuarta. Basta adda gundaway ken adda mayat a dumngeg, aglektiurak maipanggep iti panagsalimetmet ken panag-invest. Napateg daytoy a banag kaniak.

Agtawenak iti disiotso idi pimmusay ni Dad, daydi Warlito Villa Gaspar, Sr., tubo iti Carasi, Ilocos Norte. Ubing a natay iti tawenna a uppat a pulo ket maysa. Addaak idi iti maikatlo a tukad ti lima a tawen a kursok a BS Business Administration and Accountancy iti University of the Philippines-Diliman. Agtawen met idi iti sangapulo ket dua ni Jay, ti inaudi kadakami nga uppat nga agkakabsat.

Mannalon ni Dad. Nadumaduma ti imulmulana— bawang, tabako, pagay, karabasa— ken nadumaduma dagiti tarakenna— baboy, baka, manok, kalding. Daytoy ti lubongna.

Malagipko nga idi sibibiag pay ni Dad, no makalako idi iti tabako, daraskami a mapan sadiay Laoag a mapan aggatang kadagiti kaykayatmi. Nagbiagkami a kas makunkuna a ‘one day millionaire.’ Wen, adda met naidulinda ken Mama, ni Anita Domingo Madayag, tubo iti Piddig, Ilocos Norte (ili a dimmakkelanmi), maysa a maestra, ken adda pay ginatangda a life insurance, ngem saan a ‘tay dakkel.

Iti ipapatay ni Dad, saan a sisasagana ti pamiliami— emosional man wenno pinansial. Dakami a kameng ti pamiliana, kasla sprinter nga iti katengngaan ti lumba, bayat ti panagtartaraymi, kellaat a naputed ti maysa a sakami. Adu a rigat ken sakripisio ti linak-am ti pamiliami, aglalo ken ni Mama, tapno makabasakami amin nga agkakabsat. Iti tulong dagiti adu a kakabagian, nakapagturposkami amin. Ni Leo a sumaruno kaniak, nagturpos a kas agriculturist iti UPLB ken maysa ita nga eskolar iti doctorate-na idiay Amerika. Ni Imee a kakaisuna nga adingko a babai agtrabtrabaho iti kitchen ti Fort Ilocandia Resort. Ken ni Jay nga inaudimi, nagturpos iti UP Manila ken sadiay Quezon ti yan ti trabahona.

Idi kapatpatay ni Dad, kinasarita ni Mama ni Leo a saan koma pay a mapan agbasbasa iti UPLB, nga urayennak nga agturpos, ta saan a kabaelan ti sueldo ni Mama a kas maestra a paggiddanen a pagbasaen ti dua nga annak iti kolehio. Impatangken ni Leo ti panangituloyna nga agbasa ken kunana idi, “Uray maminsan a manganak iti maysa nga aldaw basta saanak nga agsardeng.” Ket pimmudno ti kinunana— nagdilang anghel a kunada. Adda dagiti aldaw a tallo laeng a biskuit ti kanenna: maysa iti pammigat, maysa iti pangngaldaw, ken maysa iti pangrabii.

Wen, pudno a dagitoy a rigrigat ti rason a naaddaankami a pamilia iti sangkabassit a balligi, ngem no ngata adda umdas a kuarta a nausarmi idi, mabalin a nagtengmi dagitoy a balligi nga awan unay sasaem iti pusomi. Naminadu idi nga imbagbagak iti bagik a diak kayat a mapasamak iti sabali nga ubbing daytoy sagsagabaenmi nga agkakabsat. Ita ta addan anakko, ni Juan Silver, ad-adda manen ti kinapateg daytoy financial freedom kaniak. Inkarik iti bagik nga aramidek ti amin a kabaelak tapno dinto sagabaen ni Uno ti napasamak kadakami nga agkakabsat. Kayatko nga inton matayak, adda umdas nga ibatik a tawidna tapno makaadal iti kayatna a kurso ken iti kayatna nga eskuela.

Newspapers in Tagalog

Newspapers from Philippines

© PressReader. All rights reserved.