Idi Un-unana a Panawen

Bannawag - - Itoy A Bilang - Ni SOLOMON V. GERNACIO

IDI un-unana a panawen, adda babai a napan iti panguloda tapno ipudnona dagiti basbasolna; iti kasta, kas kunana, maalay-ayan ti dagensen ti barukongna. Ta saan met a pudno a dakes daytoy a babai. Adda laeng dagiti gundaway a dina maaluadan ti dilana ket ti la adda a maibagbagana maipanggep kadagiti dadduma a tattao iti aglawlawna.

Idi impudno daytoy a babai iti pangulo daytoy nga aramidna, kinuna ti pangulo, “Pudno a saan a napintas daytoy nga ar-aramidem. Kas bayad daytoy, inka mangala iti sangabigao a kapas. Mapanka iti tengnga ti purok ket apaman nga agangin, ipallangatokmo dagiti kapas. Kalpasanna, agsublika ditoy.”

“Wen, apo,” kinuna ti babai. Ket inaramidna ti naibilin kenkuana. Kalpasanna, nagsubli iti pangulo.

“Naaramidmon ti umuna a paset,” kinuna ti pangulo. “Ita, aramidem ti maikadua.” “Wen, apo,” kinuna ti babai. “Masapul nga agsublika iti tengnga ti purok ket saggaysaem a piduten dagiti kapas sa agsublikanto ditoy.”

“Ngem, apo,” kinuna ti babai a masmasdaaw, “saanko a maaramid dayta! Intayaben ti angin dagiti kapas. Diak la ketdi mapidut amin!”

“Hustoka,” kinuna ti pangulo. “Saan kadi a kastoy met laeng dagiti di umno nga imbagbagam maipanggep kadagiti dadduma a tattao iti aglawlawmo? Nagiinnallawatan dagiti ngiwat ket itan dimo ammo no nagpatpatinggaanna tapno maibabawim koma dagitoy. Nupay kasta, mabalin kadi a saludsodem iti umuna a tao no asino met ti nangibagaanna iti imbagam kenkuana agingga iti maammuam no asino ti naudi a nakaammo iti daytoy ket ilawlawagmo amin kadakuada a saan a pudno ti imbagbagam?” “Diak la ketdi maaramid, apo!” kinuna ti babai. “Ngarud,” kinuna ti pangulo, “no awan ti maibagam a nasayaat a banag maipanggep iti asino man a tao, nasaysayaat laengen nga iserram ti ngiwatmo. No saan, dagita di makaay-ayo a balikasmo, agbalindanto a kas iti kapas nga impallangatokmo iti tengnga ti purok nga inakup ti angin ken inwarasna iti dimon ammo a disso.”—O

Newspapers in Tagalog

Newspapers from Philippines

© PressReader. All rights reserved.