Haytek!

Bannawag - - Itoy A Bilang - Ni MIGHTY C. RASING

NO dadduma, gapu ta awan printer-tayo, y- screenshot-tayo lattan ti dokumento a nakalukat iti smartphone wenno laptop. Kadagiti daan a laptop wenno kompiuter, mabalin nga aramiden daytoy babaen ti PrintScreen iti keyboard. Ngem saan nga amin a keyboard addaan iti daytoy a feature.

Naimbag ta adda Snipping Tool ti Windows. I-type laeng ti Snipping Tool iti search bar (dayta addaan iti ladawan ti magnifying glass) ti Windows ket agparang daytoy. Adda uppat a wagas ti panangusar iti daytoy nga app. No i-click-yo ti “Mode” makita dagiti sumaganad:

“Free-form Snip” – mabalin ti ania man a sukog agbatay iti kayatyo a y-screenshot.

“Rectangular Snip” – daytoy ti default setting ti Snipping tool. Rektanggulo ti sukog ti maala nga screenshot.

“Window Snip” – pilien daytoy no kayatyo a ma-screenshot ti sibubukel a window wenno ania man a dokumento a nakaparang iti screen-yo.

“Full-screen snip” – Sibubukel nga screen met ti alaen daytoy nga option.

Adda pay “Delay” feature ti Snipping Tool a mabalin nga usaren no adda website a kayatyo a y-screenshot kalpasan ti sumagmamano a segundo a panag-load iti ladawan wenno teksto ti website.

Kalpasan ti pannakaala ti screenshot, mabalin nga i-save ti ladawan ti screenshot. No kayatyo nga editen bassit, ilukat ti nai-save a ladawan iti Microsoft Paint. Ikkaten dagiti dadduma a paset ti ladawan wenno nayonan iti teksto babaen ti panag-type.

Segun iti Microsoft, sukatanda daytoy nga app iti “Snip and Sketch” tapno iti kasta, mabalinen nga editen ti ladawan ti screenshot iti mismo nga app— saanen a masapul nga i-save ken luktan iti MS Paint.

Adu ti mabalin a pakausaran daytoy nga app. No agususarkayo iti PowerPoint ket masapulyo ti sumagmamano a ladawan, mabalin nga usaren daytoy a pangkopia iti graphics. Ngem diyo koma liplipatan nga alaen ti pammalubos ti akinkukua iti ladawan tapno mausaryo nga awan parikut.

No bilang adda kayatyo a y-screenshot iti Facebook wenno sabali a Social Media, mabalin pay nga usaren daytoy nga app.—O

Newspapers in Tagalog

Newspapers from Philippines

© PressReader. All rights reserved.