Apay nga Inlimed da Kathryn ken Daniel ti Lima a Tawen nga Ayan-ayatda?

Bannawag - - Di Pay Naluto, Naibusen - Ni REGGEE BONOAN

INNEM a tawen metten ti parehada a kas loveteam da Kathryn Bernado ken Daniel Padilla. Naisangsangayan met ti kinalatakda. Ket iti laksid a dida inak-ako ti pudno a relasionda, mabalin a dida mailemmeng ti naidumduma a kinadungngo ken ayat iti nagbaetanda.

Awan ngaruden ti ania a naklaat idi inakoda itay nabiit a mapanen a lima a tawen ti relasionda.

Nupay kasta, daytoy a panangako, ad-adda ketdi a nangparagsak kadagiti fans-da a mabalin a naynay nga indawdawatda a maaddaan koma iti ayan-ayat iti nagbaetan da Kathryn ken Daniel.

Sabagay, iti tawenda a nasurok a 20, umisu laeng nga aklonen ken sanguenda metten a kas nataengan ti addaan iti relasion. Umisu met kadagiti akemda iti kaudian a pelikulada a “The Hows of Us.”

Kuna ni Kathryn a masapul nga ilimedda ti relasionda iti lima a tawen gapu ta kayatda a mataginayon daytoy, a mayadayo iti ania man a kuriro nangruna ket addada iti nakagulgulo a lubong ti showbiz.

Iti met biang ni Daniel, kunana a kasayaatan a kanayon ti pangeddengna ti agsubli iti sidong ni Kathryn tunggal adda dagiti parikutda.

No kua, mapagsarsaritaanda metten ti kallaysa, awan ketdi ti maibagada pay a nalawag a plano maipanggep iti daytoy.—O

Newspapers in Tagalog

Newspapers from Philippines

© PressReader. All rights reserved.