Ni Latta Sarah ti Reyna ti Takilia

Bannawag - - Di Pay Naluto, Naibusen - Ni REGGEE BONOAN

SAAN a mapagduaduaan a malaksid a nalatak a singer, bituen iti pelikula ni Sarah Geronimo. Agarup amin a pelikulana, nag-hit iti takilia. Iti daytoy pelikulana a “Miss Granny,” pinaneknekan manen ni Sarah nga isu ti “reyna ti takilia” iti Filipinas. Iti pannakasursurat daytoy a maikalima nga aldaw ti nasao a pelikula kadagiti pagsinean, nakaganaren iti P57-milion. Kayatna a sawen, nasurok a P10-milion iti kada aldaw.

Ken ipalagipmi a bukod ni Sarah ti “Miss Granny” no ar-arigen; awan ti ka-loveteam-na. Kasla suporta laeng ditoy da Xian Lim ken James Reid.

Malaksid iti kinabituenna iti pelikula ken iti musika, nasiglat met ni Sarah a TV host. Adu ti maray-aw no kasta nga ag-host iti “ASAP.”

* * * Adu ti nangdayaw ken ni Paulo Avelino iti pannakayalnag ti pagbidaanna a pelikula a “Goyo: Ang Batang Heneral” nga improdius ti TBA Studios, Artikulo Uno ken Globe Studios. Nagguapo kano ti aktor ken umisu laeng nga isu ti nangakem ken ni Heneral Goyo.

Iti biang ni Paulo, dawatna a mabuya koma dagiti millennial ti nasao a pelikula ta maipapan daytoy iti panagayat iti pagilian, ken pananginanama iti nasayaat a masakbayan.

Dawatna met a gumanar koma ti pelikula tapno umadu pay ti pagpuonan dagiti prodiuser para kadagiti planoda a dadakkel a pelikula a pakapidutan iti adal ken mangtignay.

Maipalagip a daytoy “Goyo” paset ti trilohia dagiti pelikula. Immuna ti “Heneral Luna” a nagbidaan ni John Arcilla; maikadua daytoy “Goyo” ken maikatlo ti pelikula a maipapan ken ni Presidente Manuel L. Quezon.

Madakamat met a maysa kadagiti prodiuser ni Paulo iti “Goyo.” Kinapudnona, maikadua daytoyen a pannakipuonanna, immuna ti “I’m Drunk I Love You” a nagbidaanda kada Maja Salvador, Dominic Roco ken Jasmine Curtis ken indirehe met laeng ni Jerrold Tarog a direktor ti “Heneral Luna” ken “Goyo.”

Kabayatanna, kakadua ni Paulo iti “Goyo: Ang Batang Heneral” da Carlo Aquino, Mon Confiado, Epy Quizon, Gwen Zamora, Karl Medina, Aaron Villaflor, Alvin Anson, Art Acuna, Ronnie Lazaro, Perla Bautista, Jojit Lorenzo, Carlo Cruz, Che Ramos, Matt Evans, RK Bagatsing, Stephanie Sol, Miguel Faustmann, Jason Dewey, Bret Jackson, Ethan Salvador, Robert Sena, ken Benjamin Alves.—O

SARAH

Newspapers in Tagalog

Newspapers from Philippines

© PressReader. All rights reserved.