No Adda Sigsigloten, Adda Met Warwaren

Bannawag - - Itoy A Bilang - Ni ANNA LIZA MADAYAG GASPAR, CPA No adda kayatyo a damagen wenno adda komentoyo, ag-PM-kayo ken ni Anna Liza iti www.facebook. com/annalizamgaspar. --Editor

ITAY lawasna, naistoriak kadakayo no apay a napateg unay kaniak daytoy makunkuna a financial freedom. Ngem ania kadi daytoy a banag?

Para kaniak, ti financial freedom ket isu ti pannakawayawaya iti panagparparikut iti kuarta. Iti sabali a pannao, isu ‘tay wayawaya nga ited ti kaadda ti naan-anay a kuarta tapno maited kadatayo ti gundaway a mangpadas kadagiti nadumaduma a banag ken tapno magun-odtayo ti ar-arapaapentayo a pagbalinan. Daytoy pay ‘tay kappia ti panunot (peace of mind) nga ited ti kaadda ti kuarta ta no adda man dumteng nga emerhensia iti biagtayo, sisasagana ti bolsa. Ta no umanay ti sigsiglotantayo (savings), matamingtayo a nasayaat daytoy nga emerhensia wenno parikut a saan ketdi a maibus ti orastayo nga agsursursor kadagiti am-ammotayo a pagutangan. Ti ngarud saludsod a nasken a sungbatantayo: Mano ngarud daytoy a gatad ti kuarta tapno makunatayo nga addaantayo iti financial freedom?

Gapu ta agsasabalitayo iti panggep iti biag, agsasabali ngarud daytoy a gatad. Gapu ta inruangankon ti padasmi iti pamiliami, usarek ngarud daytoy a situasion a kas pagarigan wenno ehemplo.

Mano Ngarud?

Nakunak iti artikulo iti napalabas a lawas a diak kayat a mapadasan ni Uno, ti anakko, ti rigat a napadasanmi nga agkakabsat nangnangruna iti panangkiddaw ni Mama ken ni adingko a saan koma pay a sumsumrek iti kolehio ta urayennak nga agturpos. Yad-adayo ni Apo Dios ngem no kas pagarigan ta umun-unaak a matay ngem ti anakko, kayatko a ti tawidna umanay a pagbasana iti ania man a kurso a kayatna ken iti sadino man nga eskuela a kayatna.

Ngarud, iti biangko, daytoy gatad nga isaganak ti mangited kaniak iti financial freedom.

Tapno maammuak no mano ti masapul nga urnongek iti kada bulan, kinitak ngarud no mano ita ti tuition fee iti kanginginaan nga unibersidad ditoy pagilian. Maibatay iti daytoy a gatad ken gapu ta adda met tuition fee increase, kinuentak no manonton daytoy inton agbasa ni Uno kalpasan ti sangapulo ket pito a tawen.

Maibatay iti daytoy a gatad, nangaramidak ngarud iti plano no mano ti masapul nga urnongenmi ken amana iti kada bulan. Daytoy a gatad, ikabilko met iti nadumaduma nga investment vehicle a kunada a kas koma iti:

1. Stocks – adda in trust for wenno ITF a para ken ni Uno nga investment account.

2. Savings – addanto bank account a maipanagan ken ni Uno. Sumaruno daytoy nga aramidek.

3. Insurance policy – adda insurance policy ti biagko a ni Uno ti beneficiary ken adda met insurance policy ni tatangna a ni Uno met laeng ti beneficiary. Kayatna a sawen a no mataykami, bayadan ti insurance company ni Uno maibatay iti gatad ti policy wenno face amount a kunada.

Kadagiti sumarsaruno nga artikulo, ibinsabinsakto dagitoy.

(Maituloyto)

Newspapers in Tagalog

Newspapers from Philippines

© PressReader. All rights reserved.