Ti Makunami

Bannawag - - Itoy A Bilang - Ni PRESCILLANO N. BERMUDEZ San Manuel, Pangasinan

MAINAIG iti insurat ni Apo Jim P. Domingo (“Maykayon, Apo…!” iti Bannawag, Agosto 27, 2018 a bilang), malagipmi met daytoy sabali pay a kita ti panagatang.

Tunggal malpas idi ti panagani, daydi Dios-ti-aluadna a Laki Quintin Bermudez (lolomi) ti Guiset Norte, San Manuel, mangparti iti karurayan; ikilnatna laeng ti karne. Mangluto met iti sangakiraos a niniogan. Mangisagana iti mamaen ken muskada. Maibigao dagitoy agraman ti sangasudo a basi. Maiparabaw iti sarukang a naitugkel iti tengnga dagiti naggapasanna a kinelleng iti Sitio Namangonan.

Kanayon a nasayaat ti apitna. Malaksid iti pagay, marnuoyan met iti bunga dagiti pinuon ti mangga, niog, saba a dippig, kantong ken tumok iti arubayan ti pakarso iti tangkig ti agtallo ektaria a daga a taltalonenna, a ti maysa a disso, nairanta a pagmurumoran iti mais a taraon ti nataenganen a nuangna. Kasta met a marnuoyan iti bunga dagiti pimienta a naipakalatkat iti pinuon dagiti mangga.

Iti tambak dagiti kinelleng marnuoyan met iti bunga dagiti naipakalatkat a banor. Iti tengnga dagiti lungog a kinelleng, adda nakali a pupokan a pagkammelan sakbay ti panaggagapas. Iti sawang dagiti dadakkel a tambak, adda tarik imbes nga iket a palagto a permanente a nakapakat a kanayon nga adda maalana a buntiek. Wen, adu pay laeng idi ti lames kadagiti pagtatalonan agraman bisukol, leddeg, birabid, barbaradiok, ken ballayba.

Saan a mabigbig daydi Laki Quintin ti letra A uray kasla bayangbayang ti kadakkelna ket dagiti mabulnosan a sako ti irik iti tiempo ti panagani, tukkol ti bamban ti pagbilanganna nga ipakitana iti daydi kaingungotna, ni Bai Kiris (Cristina Decierto).

Mamatikami a ti naimpusuan a panagatang (daton a kas pagyaman iti Apo) ti nagtaudan ti nasayaat a panagbiag ti pamiliada.—O

Newspapers in Tagalog

Newspapers from Philippines

© PressReader. All rights reserved.