Arem-Lakay

Nagtugaw ni Mang Narsing iti abay ni Manang Anita. Nagsanggir iti abaga daytoy. Nakita la unay ni Lilac a limmabaga ni ‘Tang Doning.

Bannawag - - Itoy A Bilang - Ababa a Nobela ni ESTELA A. BISQUERA- GUERRERO

Ti Napalabas: Adda dua nga agar-arem ken ni Anita, da ‘Tang Doning ken Mang Narsing. Di kayat ni Lilac dagitoy para iti manangna ta dandani kasadar dagitoy ni amangda. Ket no kasano ti di pananggusto ni Lilac a makakayong iti asino man kadagiti dua, aglalo pay iti amada. Kabisado ngamin ti amangda dagitoy ta padana idi ida a kameng ti Media. Ket saanna a paasitgen ida iti balayda. Ngem napinget nga agarem ni ‘Tang Doning. Uray aldaw, pasiarenna ni Anita no kasta nga awan dagiti dadakkel ti balasang. Siaayat met ni Anita a mangsango. Banag a pakaburburtiaan ni Lilac— ta kasla kayat ti kakana ti lakay. Ket iti maysa a rabii a saan a mapasangpet ni amangda ni Anita, nagbasbassawangen. Gayam, nadesgrasia da Manang Anita. Naragsakda nupay nagbayag ni Anita iti ospital ta nakalasat idinto nga adu ti natay a kamaestraanna a nadesgrasia. Parikut laeng ni amangda ti pangalaanna iti pagbayadda iti ospital. Ngem nakaipamuspusan. Nasdaaw laeng ni Lilac ta iti naminsan nasangpetanna iti balayda da ‘Tang Doning ken Mang Narsing. Ket nakaragragsak pay ni amangda a makipagbuybuya iti ay-ayamda nga ahedres.

(Maika-8 a Paset)

MAKASUYA ti langa dagiti adu a sagana da Uliteg Fredo a naidasar iti agarup tallo nga agpa a lamisaan. Adda pay potahe a manteka ti pannakadigona. Kasla inranta ti nagluto tapno saan unay a makaadu dagiti umay makipunsion ti kanenda ket saan nga agkurang ti sagana. Dakkel ti pasken ta Golden Anniversary. Adu ti bisita.

Nag-Barong Tagalog ni uliteg idinto a nakaterno iti sumileng a kiaw ni Ikit Loling a baketna. Maris-kiaw met ti aruat dagiti annak, mamanugang ken appokoda. Naintaren dagitoy iti yan ti sagana ket kumanabsiit ti pamay-an ni ‘Tang Doning iti kamerana. Nakalawlawa ti isemda ta inkari ngata manen ni ‘Tang Doning nga ipatulodna iti Bannawag dagiti ladawan.

“Mangankayo pay, a,” kinuna ni Ikit Loling ken ni ‘Tang Doning idi malpas ti panagreretratoda. Kaab-abay ni ‘Tang Doning ni Mang Narsing ngem kasla di nakita ni Ikit Loling daytoy. Immay la ket ngarud iti yanmi kada Ikit Monang ni Mang Narsing. Saksaklotek ni Jeruel. Saan nga immay ni Manang Anita ta napan nagreport iti District Office-da.

“Apay, dikayo pay nakipila?” dinamag ni Mang Narsing. Buffet style ngamin ti inaramid da Ikit Loling. Saan a daytay gagangay nga adda mairanta nga attiddog a lamisaan a sumango dagiti mangan ken adda agibunong iti makan. Sabagay, nalabon ti sagana. Lima a baboy ken dua a kalding ti pinartida. “Madamdama. Atidogen ‘ta pila,” kinuna ni Ikit Monang. Inlikudko ti libbik ta itay pay a guyguyodennak ni ikit a mapan makipila, ngem gapu ta nakapila metten dagiti uppat nga addik, kinissiimak ni Allison nga alaenna ni Jeruel ta madamdamanton a makipilakami. Kababain met no dakami la nga agkakabsat ti makitkita iti pagalaan iti makan. Ibagadanto pay a marawetkami a pamilia.

Sinimpa ni Ikit Monang ti panangkayumkomna iti kasla kain a paldana. Dimmenden ken ni Mang Narsing.

“Awan sa pay nangikararag kadagiti makan,” inyarasaas ni Ikit Monang ken ni Mang Narsing ngem mangngeg met ti sangakaarrubaan.

“Ay, wen, adi, pudno ‘ta kunam,” insagpaw ni Apong Udis, “saanen a malagip ti tao ti agkararag sakbay a mangan ita.” Naglibbi ti baket.

“Uray ta napiktiur metten dagita makan, mabalinen ti mangan,” adda agkabannuag a nangisungbat.

Kinidag ni Mang Narsing ni ikit idi taliawen ni ikit ti nagsao. Ungapen koman ni ikit ti ngiwatna ngem inapput ni Mang Narsing. “Dikan agsao…” kinunana.

Kineddel ni ikit ti bakrang ni Mang Narsing. Nagin-aanikki ni Mang Narsing. Kasla man kaissaltada nga agkabannuag aglalo ta tiniliw pay ni Mang Narsing ti ima ni ikit.

“Ne, ay, kaska met la uken nga agan-anil-ilen, Monang?” inkatawa a kinuna ni Apong Udis.

Nagpaggaak da Ikit Monang ken Mang Narsing ket naisursurotak.

Timmaliaw ni ‘Tang Doning iti yanmi. Indissona ti pingganna a napunno iti nadumaduma a makan. Inasitgannakami. Kellaat, rinabsutna ti ima ni Ikit Monang. Naimayeng da Mang Narsing ken Ikit Monang. Nakigtotkami met amin a nakaimatang iti inaramidna.

Naburburtiaannak ti lakay. Ania a gapu nga inaramidna ti kasdiay? Agimon? Ngem di met ni Manang Anita, aya, ti apappayawanna?

AGBUNGBUNGONKAMI ken Manang Anita iti tinapa wenno sinuoban nga ikan idi paguniannakami ti kapitan ti barangaymi. Nakabannikes daytoy iti ruar ti inaladan ngem nalawag a makitanakami iti yanmi a balkon ti balaymi. Makaunget ti langana. Nagkinnitakami ken manang. Apay ngata? Inawagan ni manang ni Allison. Isu ti binaonna nga umasideg iti kapitan. Ngem idi agangay, inayaban met laeng ni Allison ni manang ti isu kano ti makisarita.

Kinuyogko ni manang a napan iti ruangan. Dimi kayat a pastreken ti kapitan ta dakdakami laeng a babbai ti adda. Adda met ngarud langlanggongna no maminsan daytoy ama ti barangaymi. No nakainum iti marka demonio, baribar ti panagrasrasonna. Nasingpet met no di nakalidok.

“Ania kadi daydiay, kap?” natanang ti panagsaludsod ni manang.

Pinerreng ti kapitan ni manang. Idi kuan, adda inyawatna a Bannawag. Nakaukrad daytoy iti panid a yan ti “Tao, Lugar,

Newspapers in Tagalog

Newspapers from Philippines

© PressReader. All rights reserved.