Dear Doc

Bannawag - - Itoy A Bilang - Doc Gener ken Doc Lorna Da DR. GENERALDO D. MAYLEM ken DRA. LORNALYN C. COLOMA-MAYLEM

TULOY ti sungbat iti surat ni Mr. John De Uban ti Ramon (Isabela), 35 anios a mannursuro iti para publiko a pagadalan. Problemana ti nasapa a panagubanna ket damdamagenna no nadagsen kadi daytoy a parikut.

Okey kadi no pag-utek ti uban?

Saan a maibalakad ta ibaybayagmo laeng ti saan a maliklikan a mapasamak. Malaksid a madidigra ti pagparutan iti buok ta saandanton nga agtubo pay. Ad-adda laeng a rumasay ti buokmo.

Mailadladaw ketdi ti panagubanmo no baliwam ti estilo ti panagbiagmo. No mannigarilioka, isardengmo daytan. Nasapsapa nga aguban dagiti mannigarilio.

Maipalagip pay kenka a liklikam ti sobra a pannakaibilag iti init ta makadadael iti buok. Ti sobra a pudot, pakersangenna ti buokmo ket nalaka laeng a matukkol.

Tapno adda met tarabaymo, dagitoy ti sustansia a masapul tapno maliklikan ti panaguban: • Iodine – makatulong a manglapped iti panagpamarut ti buok. • Niacin – makatulong iti sirkulasion ti dara. • Calcium pantothenate, pantothenic acid wenno vitamin 5 – tumulong a mangusar iti copper; no awan wenno bassit ti copper, nalaka a kumersang ti buok.

• PABA (para-amino benzoic acid) – tumulong a mangmantener iti maris ken kinalamuyot ti buok. • Vitamin B-12 – makatulong iti panagtubo ti buok. • Zinc – napateg a tumulong a mangpalagda iti buok. • Iron & Manganese – makatulong iti panagtubo ti buok ken mangpasayaat iti buok ta pasayaatenna ti sirkulasion ti dara iti bagi. • Cysteine & Glycerin – napateg iti panagtubo ti buok. • Proteins & Amino acids – mapan a 98% a protina ti imet ti buok.

Gapu ta agubankan, dina kayat a sawen a patinaam metten. Mabalin met nga agpapukiska wenno urnosem ti buokmo a napintas ti buyana.

Maipalagip ketdi a saan met a masapul nga ibain wenno ilemmeng ti panaguban. Ti panaguban, napintas ken natural. Paset daytoy ti biag. Ikagumaanan ngarud nga ipannakkel no ania ti adda kenka ket saan a rebbeng a pagbainan ti maysa a natural a banag.--

(Adda saludsodmo maipanggep iti salun-at? Ipatulod iti: gdmaylem@yahoo.com wenno iti “Dear Doc” c/o Dr. G.D. Maylem, Lot 11, Blk. 11, Teodora Alonzo St., Rizal Village, Rizal, Santiago City.)

Newspapers in Tagalog

Newspapers from Philippines

© PressReader. All rights reserved.