Siled ti Kararag
Basaentayo ti Salmo 46:1-5:
Kinuna ti Apo, “Inton’ ballasiwem dagiti dandanum, addaakto kenka; ket iti pannakaballasiw dagiti karkarayan, didakanto layusen.” — Isaias 43:2
SAPASAP a nalayus idi Agosto 2016 ti akin-abagatan a Louisiana a nakaigapuan ti sapasap met a pannakadadael. Adu dagiti nadidigra a pagtaengan ken negosio ken adu dagiti tattao a napukawan kadagiti sanikua. Nakalidliday ken makapaburibor daytoy a pasamak.
Ngem babaen daytoy, naimatanganmi ti panaggaraw ti Espiritu ti Dios. Nagbalin a gagangay a makita dagiti tattao nga agkarkararag kadagiti kalsada, kas panagsagsaganada iti nadagsen a panagtrabaho. Adu a gagayyem ken uray pay dagiti saanmi nga am-ammo ti nangted kadakami kadagiti taraon. Adu dagiti naawatmi a tulong manipud kadagiti amin a paset ti pagilian. Dagiti nadumaduma nga iglesia ken organisasion, nagiwarasda kadagiti pagimeng, kawes ken dadduma pay a kasapulan. Adda latta umay tumulong aggapu man iti asideg wenno adayo. Adda grupo manipud iti Los Angeles a nagtrabaho iti nagmalmalem iti pagtaengan ti maysa a gayyem, sa kalpasanna inikkanda isuna iti baro a Biblia. Kalpasan met daytoy, inawisdakami a makipangrabii iti simbaan a nagdagusanda. Dagitoy a kinaimbag ti nanginspirar ken nangpapigsa kadakami.
Naunday ken napaut ti ibabangon wenno itatakder manen manipud iti didigra. Ngem nagtrabaho ti Dios babaen dagiti gagayyem ken ganggannaet tapno masaranaykami iti material man wenno naespirituan a banag. Narigat a panunoten a makabangonkami manen no awan ti pannakitakunaynay ti Espiritu ti Dios. Manipud iti adayo ken nadumaduma a lugar, inyeg ni Apo Dios dagiti adu a tattao tapno isalakandakami manipud iti layus. Kararag: Agyamankami, managayat a Dios, iti panangtarabaymo kadakami no narigat ti biag. Amen. Kapanunotan: Kanayon a kakuykuyogko ti Dios. Ikararagan: Dagiti biktima ti didigra.