Bannawag : 2020-10-16

Contents : 46 : 44

Contents

Gil-ayab Nobela ni ARSENIO T. RAMEL, JR. Immuna a naipablaak iti Bannawag idi 1962. Kellaat ti idadateng ni patay ket kellaat met ti gil-ayab ni bales a nangkayamk­am iti sibubukel a pagilian. (Umuna a Paset) IMTAK a kasla bomba ti irarasuk manen dagiti Huk iti maysa a natalna a rabii ti Disiembre idiay Tengnga ti Luzon. Naggigidda­n dagiti nakaal-alingget a pasamak iti nadumaduma a disso iti dayta a rabii. Imparangar­angda ti maysa a dakkel ken nakabutbut­eng a wayat. B Maysa a destakamen­to ti konstable nga addaan iti walo a kameng ti napunas iti maysa nga ili. Maysa met a patrulia a kasta met laeng ti kaadu ti natatek iti bala idi agawiddan nga aggapu iti maysa a bario iti sabali nga ili. Rinaut dagiti Huk ti maysa pay nga ili ket pinuoranda ti munisipio ken dagiti balbalay sa pinapatayd­a amin a natiliwda a kameng ti turay. Simpegda kadagiti dadduma a disso ket innalada amin a taraon a mabalinda nga alaen sa pinapatayd­a amin dagiti simmupring iti pagayatand­a. Binangenan­da ti maysa a nawatiwat a paset ti kalsada nga agturong idiay Manila ket sinamsamda amin a napateg nga alikamen dagiti pasahero. Saanda a nagamak a nangkettel iti biag dagiti nangipakit­a iti uray bassit laeng nga isusupring. Sinerrekda dagiti dadduma pay a lugar ket intalaw wenno pinapatayd­a dagiti sigud a kakaduada a simmuko ken tumultulon­gen iti turay, kasta met dagiti ammoda a sigud a bumusbusor kadakuada. Nagpipilit­da. Gapu ta kellaat, naggigidda­n ken nadumaduma a disso ti nakaaramid­an dagitoy a pasamak, nagpukawen dagiti akingapuan­an idi sumangpet dagiti arayat. Ket nagkintaye­g ti pagilian idi nakariing iti dayta a bigat. Nadara ken nakaal-alingget ti pasamak iti napalabas a rabii. Nalaus ti pannakarir­ibuk dagiti agturay. Iti Tengnga a Luzon, mailasin kadagiti rupa dakiti kameng ti Siiigam a Bileg ti dida pannakatur­og iti napalabas a rabii, manipud iti kababaan a soldado iti tay-ak agingga iti kangatuan a turayen. Agsasallup­ang ti patrulia, magmagna ken silulugan, kadagiti kalsada ken babassit a dalan, nabantayan dagiti disso a mabalin pagparanga­n dagiti Huk. Nakumikon ti buyot. Nagsagana. Kangrunaan a naseknan ti Konstabula­ria, ti takiag ti Siiigam a Bileg ti pagilian nga akinrebben­g iti pannakaipa­sdek ken pannakatag­inayon ti talna ken kappia iti uneg ti pagilian. Ket iti PC Zone Command iti Akintengng­a a Luzon, naipabakla­y kadagiti abaga ni Koronel Santiago, ken dagiti kameng ti hunta dagiti opisial nga ipanguluan­na, dayta a pagrebbeng­an. Dayta ti gapuna a nalaus ti pannakakum­ikomda iti dayta nga aldaw. Nakaumanen ni Koronel Santiago ida. Ket gapu iti ayat ti tunggal maysa a mangibanag iti pagrebbeng­anna, adu payen ti saan a namigat wenno nangaldaw. Namrayanda laengen nga impauneg ti kape ken tinapay nga indanon kadakuada dagiti taoda. Maysa kadagiti kameng ti hunta ti PC Zone Command ni Koronel Geronimo, ti hepe ti PC Zone Intelligen­ce Section. Saan a makatalna iti uneg ti opisinana. Agpagnapag­na. Nadagsen unay a panunotenn­a. Ket idi agsao, marikna ti naibinggas a panangbaba­lawna kadagiti nangatngat­o a turayenna. “Saan koma a mapasamak dagitoy no namatida kadatayo,” kinunana. “Ngem ania ti kunada? Nabayag kanon a natukkol ti duri ti bileg dagiti Huk. Sumagmaman­o kano laengen dagiti kakaduada nga aglemlemme­ng iti kabambanta­yan. Inwaksida kanon ti panangrabs­utda iti turay babaen ti bileg ket nagbaliw kanon ti panglakaga­nda a mangrabsut iti turay babaen dagiti pamuspusan a saan a kasapulan ti bileg. Kasta kano ti imbaga dagiti natiliwda a pangulo dagiti Huk ken kameng ti Politburo wenno ti kangatuan a hunta a mangituray kadagiti komunista iti Filipinas. 44 Oktubre 16-31, 2020

© PressReader. All rights reserved.