sugilagming Peke

Bisaya - - Sugilagming - Ni APRONIANITO FERRATER MIRAMON Talisay, Santander, Cebu

I NGON sa gikutaw og maayo ang utok ni Mr. Jerome Villanueva. Wala siya sa kaugalingon nga nagbahas-bahas sa hawanan sa iyang opisina niini karong gabhiona. Wa na gani siya maghunahuna nga ting- off na. Maoy mihasol niya karon ang balita nga napasaka na sa hingtungdang ahensiya sa kagamhanan ang kaso kalabot sa nasakmit nga peke nga mga sinakong bugas dihang gipahigayon ang pagronda sa kapolisan sa bodega sa bugas nga iyang gipanag-iya. Gikontak niya pinaagi sa selpon si Atty. Miguel Rosales, ang iyang legal counsel. Gipangutana niyag aduna bay medyos ang maong kaso sanglit di na man sama kaniadto nga kuwarta ray katapat, mahulog na sa linaw ang mga kalapasang nahimo. Gitas-an man siyas tingog ni Judge Libre ug mihulgang pasakaan og lain nga kaso dihang misuway siyag soborno aron unta maareglo.

Sa iya karong paminaw, ingon sa misamot kadulom ang kahigayonan nga modaog kon modayon siyag dagan pagka bise mayor unya sa sunod tuig. Kay human masakmitig peke nga bugas ang iyang bodega, mao na man say nasakmitan og pekeng mga tambal ang pharmacy sa iyang igsoon. Ug segurado gyod nga mao kiniy issue nga gamiton unya sa iyang kaatbang.

Naputol ang paghinuktok ni Mr. Jerome Villanueva, dihang nahiabot si Atty. Miguel Rosales.

“Komosta, Atorney… unsay kalamboan?” Kabahin sa ilang kaso ang buot niyang ipasabot.

“Dakog purohan nga ma- dismiss na…” Malaomon ang tubag ni Atty. Rosales. “Nagkahinabi mi ni Judge kaganiha. Mao nga ayaw kaayog paapekto ana!” tambag ni Atty. Rosales. “Ang maayo natong buhaton, maglingaw-lingaw ta aron mawala nang stress nimo.”

Unya may gisenyas si Atty. Rosales nga nagtingsi ngadto kaniya. Sinati kaayo niya ang buot ipasabot niini.

“Kaguwatsi gyod nimo, Torney.” Natakdan siyas katawa ni Atorney. Ingon sa nakuha-kuhaan ang iyang pagkusmod.

“Okey, aprob.” Gipataas niya ang tuong kumagko. “Pero hapit usa tag panihapon didtos Club Ultima kay gibati kog kagutom.”

Samtang nangaon sila, nasiklapan ni Mr. Villanueva nga dihay usa ka maanyag nga kustomer nga nag-inusarang mikaon didto sa atbang nga lamesa. Sa iyang banabana mga 20 anyos pa ang pangedaron niini. Kaamgid ang kaguwapa ug ka- sexy niini sa paborito niyang sexy star nga si Diana Zubiri. Nabantayan niyang ingon sa nagpangamay kaniya ang pinahiyoman niini sa matag higayon nga magkasugat ang ilang mga panan-aw. Sayod na si Mr. Villanueva unsang matanga sa pagka babaye kini.

“Ikaw na lay lahos didtos suki ta nga kasa, Torney,” hunghong ni Mr. Villanueva. “Nakakaplag na kog tambal sa stress, he-he! Didto sa usa ka mahalong motel kalit nga nahipugwat ang pipila ka

guest tungod sa hulbaw nga ilang nadunggan. May pipila nga nanguryoso ug mihinayg lili.

“Kaayo gyod nimong i- salvage animala ka! Mangingilad kang dako!” Nagkarat ang masuk-anong tingog ni Mr. Jerome Villanueva. “Wa gyod ko magdahom nga peke diay ka nga pagka babaye, Nathalie!” (KATAPOSAN)

Sa iyang banabana mga 20 anyos pa ang pangedaron niini…

Newspapers in Cebuano

Newspapers from Philippines

© PressReader. All rights reserved.