LOON CORAL GARDENS:

Nagbagang Lapyahan Sa Tangnan

Bisaya - - Sa Atong Hapin - TEKSTO UG MGA HULAGWAY NI COY P. PONTE

HARDIN nga naglipang ibabaw sa nangapulpog nga mga gasang. Kini ang bag-ong gihugopan karon nga adtoonon sa mga turista, lokal man o langyaw, nga nahimutang sa kabaybayonan sa Barangay Tangnan lapos na ngadto sa kabarangayang Cuasi ug Song-on sa lungsod sa Loon, Bohol.

Kahinumdoman nga kining maong dapit tipik sa naisa nga hunasan o baku’d tungod sa labihan kakusog nga linog niadtong Oktubre 15, 2013 nga mitay-og sa lalawigang Bohol. Nahisakop kini sa Loon Uplifted Intertidal Zone kun LUIZ.

Ang kalit nga pagsikat ning maong dapit napahimugso sa mga netizens sa dihang usa ka Loonanong batan-on nga mahilig sa pagpanguhag mga hulagway sa kanindot sa kinaiyahan nag- upload niini sa Facebook. Ang mga hulagway sa mga bilangbilang ug asimsim nga mingkaylap sa hunasan nahilakip sa iyang gikuhaag hulagway nga mga gasang nga wa nay kinabuhi tungod kay naladlad na man sa mga elemento sa kinaiyahan ug wa na maabot sa tubig-dagat gumikan sa pagkaisa sa baku’d.

Ang kanindot sa mga gasang nga nahisamag kinaiyanhong mga lalik natabonan sa nagbanaag nga kolor sa mga sagbot nga mingtabon sa halapad nga hunasan. Natural lamang nga, alang sa mga amatyur, malabwan gayod ang puti- abohon-itom nga kombinasyon batok sa lunhaw-amarilyo-pula. Kini ang hinungdan nga nahimong viral ang maong mga hulagway ubos sa ngalang coral garden.

Hinuon, dili gayod usab ikalimod nga ang kapiliwan sa Loonanong kadagatan napuno sa mga coral garden. Gani, ang Isla sa Cabilao nabaniog man nga usa sa mga adunay labing nindot nga

dive sites sa tibuok kalibotan. Dayohonon gyod kini sa mga diving enthusiast ug uban pang mga turista nga mahigugmaon sa nindot nga mga talan-awon ilawom sa dagat. Ang coral gardens sa Cabilao makig-indig gayod sa kanindot sa ubang sikat nga dive sites. Gawas pa niana, makita usab sa mga diver ang pygmy seahorses ug hammerhead sharks dinhi.

Sa Tangnan, ang pagkuyanap sa mga bilangbilang ug asiman makomparar sa pagkaylap sa kalayo. Masinati mo kini kon inigabot nimo didto, magkahunas ang dagat. Labi na kon ang paglihok sa dagat panahon sa kabuntagon. Madayag sa imong atubangan nga ang kabugnaw sa luspad nga kaasul sa lapyahan mohinay-hinay sa pagka bagahong pulagaw sa panahon nga mogitib ug motunga na ang unang mga dahon sa katamnan nga gitagoan unta sa tubig.

Unya, sa hingpit na nga pagbiya sa katubigan, ang lapyahan mahisama sa usa ka dakong haling nga gipadilaab sa mga bidlisiw sa bag-ong nagsidlak nga Adlaw. Kon ang pagbalik sa dagat, ang pagtaob, mahiatol sa sawumsom, ang nagbagang hunasan mahisama sa usa ka bata nga inanayng habolan sa asul nga katubigan aron pakatulgon diha sa usa ka mabugnaw nga paghinanok.

Magdugay man o dili, kining kinaiyanhong obramaestra, angay gayod nga adtoon, sud-ongon ug sination samtang nagpabilin pang tinggad ang iyang pagbaga. Dili kini lisod tuoron kay dili man kini halayo sa highway ug halos ang mga drayber ug konduktor sa mga pasaheroan o public transport nakatuod man niini. Kon aduna kamoy pribadong sakyanan, aduna usay tarpaulin signs nga gipahimutang. Hinuon, usa sa nakapadugang sa ka- thrilling sa pagadto niining maong lugar mao ang dalan.

Kon abentoroso gyod ka, gawas sa pagtimpasaw sa madanihong dagat nga giduyan sa maputi ug baga nga sandbar, mahimo usab nga imong lakipon pagsuroy nganhi ang hardin sa napaig ug lunhawng mga bakhaw, hardin sa naughan nga mga gasang ug ang Kampinggan Lagoon nga dili lang halayo sa nahimutangan sa katamnan.

Sinatia ang Loon Coral Gardens ning panahon sa ting-init samtang may higayon pa.—

Newspapers in Cebuano

Newspapers from Philippines

© PressReader. All rights reserved.