PEACE 911: PAGPATUNHAY SA KALINAW SA PAQUIBATO, DAVAO

Bisaya - - Sa Atong Hapin - Ni GWARGZ P. MONREAL

KAGUBOT, kaguliyang, kawalay asenso, kawalay paglaom— kini ang mga pulong nga maghulagway sa Distrito sa Paquibato nga nahimutang sa bukirang bahin sa Siyudad sa Davao sulod sa dugay nang panahon. Kanunayng gihasi sa butobuto sa mga armas, pagpanunog ug uban pang hulga sa kalinaw.

Ang Paquibato gilangkoban sa trese (13) ka barangay nga mao ang Colosas, Fatima (Benowang), Lumiad, Mabuhay, Malabog, Mapula, Panalum, Pandaitan, Paquibato Proper, Paradise Embak, Salapawan, Sumimao ug Tapak.

Adunay sementado nga parte sa dalan paingon sa maong dapit, apan mas daghan ang libaongon nga wala pa masemento. Adunay daghang parte nga hagip-ot ang dalan, aduna usay kantilado ang isigkadaplin niini. Lugar nga walay signal sa cellphone hinungdan nga lisod ang komunikasyon kon aduna kay tuyo sa mga tawo didtong dapita.

Ang mga lumulupyo didto naglangkob sa tribung Ata ug mga Kristiyano nga minglalin ug nahiluna na didtong dapita. Kon ang pag-uswag ang hisgotan, dili malalis nga layo gyod sila sa luwag. Usa ka hinungdan mao ang kasamok sa maong dapit. Daghan ang ming-abin sa kalihokan nga mikontra sa gobyerno tungod usab sa kapait ug kapitos nga ilang natagamtam sa dugayng kautigan.

Niadtong Mayo 10, 2018, ang mayor sa Davao City nga si Mayor Sara Duterte-Carpio milusad sa iyang programa nga PEACE 911 alang sa Paquibato District. Sa iyang pagdiskurso didto, iyang gisaysay ang iyang kahiubos nga sa kadaghan sa panahon niyang pakiglambigit sa lumulupyo didto nagmakuli gihapon ang katawhan ug nahitabo gihapon ang pagpanunog ug pakiggubat sa kasundalohan sa gobyerno.

Apan matod pa niya, wala gihapon siya mawad-ig paglaom. Isip inahan sa siyudad, iya gihapong giantos nga makiglambigit sa mga taga Paquibato nga ming-alsa batok sa kagamhanan, mao nga natawo ang PEACE 911.

Pu’ng pa ni Mayor Inday Sara, usa ka

pamaagi nga gitawag og “grass root approach” diin sila mismong mga lumulupyo ang maghatag og ideya kon unsay angay ihatag kanila aron molambo ang ilang kahimtang, matagamtam ang kalinaw ug kalipay.

Magahob kaayo ang pagpamakpak sa katawhan dihang iyang gisulti nga sa labing daling panahon pasudlon na niya ang Globe ug Smart. Apan iyang gihangyo ang suporta sa katawhan nga unta protektahan nila ang mga tore nga dili kini sunogon.

Iya usab nga gibutyag nga tungod kay ang Paquibato usa man sa daghan og kakawan, adunay himoon didto nga planta alang sa paghimo og tsokolate. Ingon niya, dili na ninyo dad-on ang inyong mga abot nga kakaw didto sa siyudad o duol nga dapit aron kini mabaligya. Sa ilang tugkaran mismo, ang planta maghulat na sa mga liso sa kakaw.

Miani na usab kini og gahob, lanog ug dugayng pagakpak

sa mga lumulupyo sa Paquibato. Gisundan dayon kini ni Mayor Inday Sara sa pagpangayo nilag suporta nga protektahan nga dili sunogon ang maong gambalay.

Uban sa plano sa PEACE 911 mao ang mga tabang sa nagkalainlaing ahensiya sa gobyerno nga mopasupot sa ilang mga programa alang sa kauswagan sa maong dapit. Uban na niini ang DPWH XI, Department of Health XI, TESDA XI, DOLE XI, DENR XI, Philippine Coconut Authority, Philippine National Police ug ang Armed Forces of the Philippines kun AFP, ug uban pa.

Panapos pa ni Mayor Inday Sara nganong PEACE 911, tungod kay ang tumong niini ipatunhay ang kalinaw kay ang Paquibato anaa na sa sitwasyon nga tabangonon kaayo. Matod pa niya nga ang maong programa mahimong “big and fast” dili “small and slow”, ug nga himoon niya kini sulod sa nahibilin niyang usa ka tuig nga termino isip mayor sa Siyudad sa Davao.—

Si Mayor Sara nga mipasabot sa dakong kalamboan nga iyang ibubo sa Distrito sa Paquibato.

Si Mayor Sara nga gitagbo sa mga nagpahigayon sa paglusad sa PEACE 911.

Usa sa mga sapa nga maagian paingon sa Brgy. Paquibato Proper diin pagahimoon ang paglusad sa PEACE 911.

Kon motaas ug mokusog ang bul-og sa tubig, way laing agianan ang mga lumulupyo kondili ang paglatay sa usa ka “hanging bridge”.

Ang helikopter nga gisakyan ni Mayor Inday Sara Duterte-Carpio nga mitugpa sa plasa sa eskuylahan.

Human sa paglusad sa PEACE 911, namirma ang mga nangulo sa nagkalainlaing ahensiya sa gobyerno isip ilang pagsanong sa pagsuporta sa maong programa. Mingpirma usab ang mga opisyal sa kabaryohan sa Distrito sa Paquibato.

Usa ka babayeng membro sa tribung Ata nga nagsul-ob sa iyang mabulokong sinina alang sa maong espesyal nga okasyon. Ang mga lumulupyo nga nanambong. Ang entablado diin makita ang simbolo sa PEACE 911.

Newspapers in Cebuano

Newspapers from Philippines

© PressReader. All rights reserved.