GOODBYE, WANDA!

Bisaya - - Balaod ug Kamatuoran - Ni Atty. Ver Quimco m mco

SA pagsulat niini, mao pa lang gyoy pagbandilyo sa balita nga mi- resign na si Wanda Tulfo Teo gikan sa iyang puwesto isip Tourism Secretary. Kini human sa pipila ka adlaw nga pagsulbong sa kontrobersiya sa 60 milyones nga gibayad nga pundo sa Department of Tourism nga gipangulohan ni Secretary Wanda Teo ngadto iyang mga igsoong magsisibya nga sila si Ben ug Erwin Tulfo.

Sa pagka karon, ang isyu gipaimbestigar pa ni Presidente Duterte. Apan nagkadaiya na ang mga komentaryo ug panghukom nga mingtumaw. Dili kini katingad-an tungod kay ang nahilambigit niini kontrobersiyal man kaayo nga mga personalidad kinsa naila sa ilang kasuod ngadto sa presidente. Ang mga kritiko sa administrasyon minggamit niini nga puhunan sa padayon nilang mga atake sa administrasyon.

Wala pa gani mabutyag ang mga detalye niini nadihogan na pag-ayo kinig bulok sa partidistang politika. Si Secretary Teo nga nanghunaw sa pagingong wala siyay labot sa pagbayad sa maong kantidad ngadto sa PTV4 diin ang iyang mga igsoon may programa nga didto gisalida ang mga commercial sa iyang departamento, mipasangil nga kini pangdaot lang tungod sa iyang baroganan pagpasera sa Boracay.

Sa laing bahin, inay tubagon ang isyu sa ilang pagdawat sa maong kantidad, mismo ang mga Tulfo, mingdihog og politikanhong kolor sa maong isyu diha sa pagpasangil sa ilang mga kaaway nga maoy nagpagawas sa publiko sa maong findings sa COA sa tin-awng tumong sa pagliwag sa atensiyon sa publiko gikan sa tinuod nga isyu.

Tin-aw ug wala ipanghimakak nga ang maong kantidad pundo sa gobyerno, wala usab ipanghimakak nga ang maong pundo gikan sa Department of Tourism nga gipamunoan ni Secretary Wanda Teo. Wala usab ipanghimakak nga ang maong kantidad didto mapaingon sa iyang mga igsoong magsisibya agig bayad sa oras sa ilang programa diin didto gipasundayag ang advertisement sa Department of Tourism.

Gilimod man niya nga wa siyay labot sa kontrata kay kini iya lang sa PTV4 uban sa iyang mga igsoong Tulfo, dili niya malimod ug dili matuhoan nga wala siya masayod niini sa wala pa kini mahitabo. Labawng dili niya mapasabot ang publiko ngano nga wala siya mobabag niini aron malikayan ang intriga. Dili tiaw ang gidak-on sa kantidad kay 60 milyones ka pesos baya. Wala usab ilimod nga tinuod nga gisita kini sa Commission on Audit diha sa pagsuhid niini sa post audit sa paggasto sa maong kantidad tungod sa mga kalapasan sa pamaagi sa paggasto sa pundo sa gobyerno. Nahasubay man kini o wala sa balaod, namansahan na og dakong pagduda ang pagdumala sa Department of Tourism. Dili na legal ang isyu niini. Dili na audit procedure ang hilisgotan niini. Isyu na kini sa delikadesa. Isyu na kini sa responsabilidad. Isyu sa pagtuman sa mando sa atong Konstitusyon nga ang usa ka posisyon sa gobyerno giliminan sa pagsalig sa publiko ug kinahanglang ang tanang opisyal ug

Apan mingluwat man si Wanda Teo ug ang iyang bana sa puwesto, mauli man ngadto sa gobyerno ang 60 milyones, dili kini rason aron mapapas na ang tulubagon sa nahimo nang krimen...

empleyado sa gobyerno magbaton kanunay og kaakohan ngadto sa katawhan ug nga sila kinahanglang magbaton sa labing taas nga responsabilidad ug kaligdong sa ilang panarbaho.

Dili kini ang unang higayon nga nahilambigit si Secretary Wanda Teo sa kontrobersiya. Niadtong miaging tuig pa, nabalita ang iyang matod pa pagpangilkil ug pagpangayog designer sa usa ka mall, gatosan ka tickets sa usa ka mahalong musicale, ug sa kanunayng pagbiyahe gawas sa nasod nga kontra sa polisiya sa pamuno. Apan sayon ra kining gipanghimakak ug gieskplikar ni Secretary Teo nga padayong nagpabilin sa Gabinete tungod kuno sa kasuod ug pagsalig sa presidente.

Niadtong miaging semana, gitaho sa Malacañang nga gipaimbestigar na niini ang maong 60 milyones nga anomaliya sa Department of Tourism ug bisan ang DOTC nga gipamunoan ni Secretary Martin Andanar nga mao ang nagdumala sa PTV4. Gisundan kini sa taho nga miluwat na sa iyang katungdanan ang kapikas ni Wanda Teo nga si Robert Teo nga board member pod diay sa kalambigit nga korporasyon sa turismo sa gobyerno nga mao ang Tourism Infrastructure and Enterprise Zone Authority kun TIEZA tungod kuno sa delikadesa. Ang pangutana, nganong ang iyang bana na man hinuon ang miluwat sa katungdanan nga si Wanda Teo man mismo ang nahilambigit sa maong anomaliya?

Si Presidente Duterte na ang nag-ingon nga igo na kaniya nga may madungog siya nga tinonto sa usa ka opisyal nga iya kining palagpoton sa puwesto. Si Duterte na ang nag-ingon nga dili na angay nga maghulat pa ang mga opisyal nga nahilambigit sa korapsiyon nga papahawaon, kinahanglang moluwat na sila sa ilang katungdanan. Delikadesa sa makausa pa ang unod ning maong mando.

Mi- resign na si Secretary Wanda Teo. Kabubut-on man niya kini tungod sa delikadesa o gimandoan ba kaha siya ni Presidente Duterte kay nawad-an na gyod og pagsalig kaniya, siya lang ug si Duterte ang nasayod. Apan mingluwat man si Wanda Teo ug ang iyang bana sa puwesto, mauli man ngadto sa gobyerno ang 60 milyones nga kuwarta, dili kini rason aron mapapas na ang tulubagon sa nahimo nang krimen sa pagwaldas o plunder sa 60 milyones nga salapi nga iya sa katawhang Pilipinhon.

Kita manghinaot na lang nga kining labing ulahing witik nga gihimo ni Presidente Duterte batok sa iyang mga sinaligan ug suod nga nahilambigit sa korapsiyon makadugang unta sa kahimatngon natong tanan nga mas lig-onon pa ang atong baroganan isip katawhan batok nining kultura sa korapsiyon nga maoy nahimong anay nga halos mihurot na pagkutkot sa atong nasod.—

Newspapers in Cebuano

Newspapers from Philippines

© PressReader. All rights reserved.