Kanhi Pres. Aquino wala motambong sa hearing sa Dengvaxia

Bisaya - - Balaod ug Kamatuoran -

WALA motunga si kanhi Presidente Benigno Aquino III sa unang adlaw sa preliminary investigation sa reklamong gisangat sa Volunteers Against Crime and Corruption (VACC) ug sa Vanguard of the Philippine Constitution, Inc. (VPCI) kalabot sa isyu sa Dengvaxia.

Sa nasayran sa TNB, ang abogado ra ni Aquino maoy mitungha nga si Atty. Mildred Umali kinsa midawat sa kopya sa mga reklamo.

Wala sab manambong sila si kanhi Health Secretary Janet Garin ug ang kasamtangang DOH Secretary nga si Francisco Duque. Samtang ang mga opisyal sa Zuellig Pharma nagpadala na lang pod og abogado.

Sa gipahigayon nga hearing, gipahayag ni Senior Assistant State Prosecutor Rossanne Balauag ang desisyon sa panel of prosecutors nga ipadayon ang paghusay sa kaso. Matod niya, tungod kay dili man lang reklamo sa kasaypanan o pagpasagad ang giduso sa VACC ug VCPI kondili aduna say pagsupak sa Revised Penal Code sama sa technical malversation, criminal negligence ug pagsupak sa Procurement Law, ang maong kaso anaa sa hurisdiksiyon sa DOJ.

Ang sunod nga hearing gikatakda sa Hunyo 4 ug giaghat ang mga respondent sa pagsumiter og counter affidavit.

Kadtong mga opisyal sa Sanofi Pasteur nga respondent usab sa reklamo ug wala motambong o makatambong sa hearing ug wala pod magpadala og abogado, padad-an na pod og bag-ong subpoena.— TNB

Newspapers in Cebuano

Newspapers from Philippines

© PressReader. All rights reserved.