MAAYO BANG MOINOM DAYON OG TUBIG INIGBANGON SA BUNTAG?

Bisaya - - SHOWBITZSIKA - Ni MAR MAÑUS, JR.

DINHI sa ato lainlain lang nga mga komentaryo ang akong nadunggan bahin sa pag-inom dayon og tubig inigmata o inigbangon sa buntag. Adunay miingon nga dili kuno maayo nga moinom og tubig nga wala pay kaon ilabi na sa buntag kon wala pa makapamahaw. Aduna poy miingon nga makadulot kinig kaayohan sa panglawas. Aron pagpiho nag- research ko. Ug tuod man, niay akong nasayran gikan sa source nga akong nabasahan.

Didto sa Japan nabatasan nila ang pag-inom og tubig inigbangon nila sa buntag. Ug sumala sa mga siyentipiko, maayo kuno sa kahimsog ang maong kinaiya o batasan. Matod pa, ang pag-inom og tubig sa buntag nga wala pay pamahaw maayo niadtong mga tawo nga adunay gimulo o sakit sama ning mga mosunod: epilepsy, bronchitis, asthma, diarrhea, vomiting, urine ug kidney diseases, diabetes, menstrual disorder, meningitis, arthritis, headache, irregular heartbeats ug eye diseases.

Tukmang pag-inom og tubig inigmata sa buntag

Sa dili pa manotbras, moinom una og 4 x 160 ML nga tubig. Pagkahuman dili dayon mokaon og bisan unsang makaon sulod sa 45 minutos. Paglabay sa 45 minutos mahimo nang mokaon o mamahaw. Human mamahaw, maniudto ug manihapon dili moinom o mokaon og bisan unsang pagkaon o timo sulod sa 2 ka oras.

Alang sa adunay mga sakit, magsugod og inom og tubig mga 4 ka baso kada adlaw ug anam-anamon pagdugang kutob sa mahimo o makaya sa mosunod nga mga adlaw. Kadtong mosunod sa nahisgotang proseso hayan nga makabaton og alibyo sa ilang gipangmulo sa lawas.

Kining maong proseso wala pay gikatahong side effect sa panglawas niadtong nagsunod niini gawas lang sa pagsigeg pangihi. Ug kon buot ninyong makalikay sa bisan unsang sakit kinahanglan lang nga batasanon ang pag-inom og daghang tubig ilabi na sa buntag sa dili pa mokaon. Ug timan-i kining panultihon sa English: “When you feel thirsty, you are already dehydrated.”—

Newspapers in Cebuano

Newspapers from Philippines

© PressReader. All rights reserved.