UG NAUMOL ANG ‘KAMALACOR’

Bisaya - - SHOWBITZSIKA - Ni JOHN TAM. YBAÑEZ Gun-ob, Lapulapu City

PALIS sa Mayo 24, 2018. Nakadawat kog teks gikan ni Mar Manus, Jr. nga nagpahibawo nga moduaw sa ilang panimalay sa Basak, Lapulapu City si Nor Dungog, usa ka magsusulat nga nagbase sa Babag, ang barangay nga nabaniog sa pagpamuhat og pabuto. Si Nor talagsa ra mobakyaw sa iyang dagang ilabi na dihang nahingag sa kalibotan sa politika diin nagsugod siyag pangalagad isip pangabaga sa kapitan. Giaghat kong MMJ nga moadto usab aron kaming tulo ang mag-atubang. Si MMJ igtagsa ning tagsulat ug kanhi managing editor ning Bisaya.

Dali kong nananghid kang Remy, akong kapikas, ug nag-ilis. Apan wala motugot si ‘komander’ nga mag-inusara kong moadto sa Basak hinungdang iyang gipauban ang sipat ug 6 anyos kong apo, si John Kurt, nga gitawag nakog Tiyo isip palahi.

Gikan sa among panimalay sa Purok Lemonsito, Barangay Gun-ob nagbaktas ra mi ni Tiyo subay sa dalan A. Tumulak ug didto na mi manakay og traysikol sa dalan S. Osmeña. Apan sa ekstensiyon ko nakalingkod hinungdang dili ko masabak si Tiyo. Gipabarog ko lang unta siya sa akong likod sikit sa tuhod niadtong duha ka maanyag nga unang nakalingkod apan miboluntaryo ang usa, habig sa drayber, nga iya lang sabakon ang bata. Igo lang kong mipahiyom dayong ingon: “Sige, Tiyo, anha lang kas tsik, hehe!”

Samtang nagdagan ang pedikab, miteks na pod si MMJ nga nagtug-an nga anaa na si Nor sa ila. Gibaslan ko kini sa pag-ingon nga padu’ng na mi. Tingali natingala siya nganong ‘mi’ man ang akong gisulti kay wa man nako siya sultihi nga may kauban ko.

Paghimuntog sa eskina Tamiya, nanganaog tong duha ka babaye nga sa akong tan-aw wala pay 30 ang panuigon ug mga dalaga pa. Apan una kong mikawas ug gigunitan ang bukton ni Tiyo dayong bira padaplin aron makaagi ang duha ug pagkahuman mipuli ko sa ilang gilingkoran tupad niadtong huhamtong na nga laing babaye nga gikang naglingkod sa gamayng lingkoranan kilid sa drayber ug si Tiyo mipahiluna sa ekstensiyon. Tungod sa kamadanihon sa duha ka maanyag nga nangalimyon sa kahumot, nakalimot hinuon ko pagpasalamat niadtong nagsabak kang Tiyo. Unsa kahay hunahuna sa kanahan? Tingaliy nakaingon to nga wala koy batasan! Paghiabot namo sa Basak-Iba diin nagpuyo si MMJ, gipara nako ang sakyanan ug nanganaog mi si Tiyo. Nakaplete na ko daan sa drayber kay nangita man siyag sensilyo nga ikasukli niadtong nanganaog sa may Tamiya.

Nanglakaw mi si Tiyo subay niadtong hagip-ot nga agianan kilid sa koral nga semento paingon sa ilang MMJ. Didto among hitangkaan si Nor nga naglingkod kilid sa bukana sa gamayng

terasa, nagtamod niadtong usa ka hulad sa Bismag. Mitimbaya ko kaniya ug iyang giuslan ang akong anteyohos apan iyang giuli kay dili gihapon siya makaklaro sa pinong mga letra sa magasin. Gitimbaya ko usab si MMJ nga nagbarog-barog lang ug miamen kang Tiyo Binog (Mariano Manus, Sr.) nga naglingkod sa iyang higdaanan. Diha usab si Josephine, kapikas ni MMJ, ug si Lina, bayaw ni MMJ.

Nakita kong nagbarog sa lamesa ang duha ka dakong botelya sa Coke ug duha ka lapad nga 65. Diha poy usa ka dako-dakong putos sa pan nga dala ni Nor nga maoy among gisaw-an pagsima-sima.

Sa amo nang panagsulti ni MMJ ug Nor, akong gihisgotan ang plano pagtukod og kapunongan sa mga magsusulat sa Lapulapu. Gisultihan namo si Nor nga dugay-dugay na ang mao namong laraw ni MMJ apan wala lang mapalig-on kay kami ra mang duha. Ang una namong gibunyag-bunyag kunohay mao ang KANILA (Kaliwat ni Lapulapu) nga pagasabakon sa BATHALAD (Bathalanong Halad sa Dagang) maong gitawag namo kinig KANILABATHALAD. Dayon sa pagpanglabay sa panahon nakahunahuna na sab mi si MMJ nga KAMAO (Kapunongan sa mga Magsusulat sa Opon) ang among ugbahon.

Giganahan si Nor ug miingon nga mas maayong sa maong higayon pormal namong umolon ang grupo. Apan iya ming giagni nga manglakaw ug adto sa usa ka mabugnawng dapit hisgoti ang maong butang. Tuod man, nag-ilis si MMJ ug miuban kanamo ngadto sa usa ka fast food chain dili layo sa Tamiya.

Paghiabot namo sa luhong kan-anan, miorder si Nor og pagkaon alang namong tulo ni MMJ kay kang Tiyo ice cream ra may gipangayo. Gipasagdan lang namo siya kay siya may mibangka. Nagpahimutang mi si MMJ ug ang akong apo niadtong talad simpig sa bungbong nga bildo samtang nagpaabot kang Nor ug sa iyang gipalit.

Human sa among pagpangaon, naghisgot-hisgot dayon mi unsay maayong ingalan sa among pundok. Naggikan ra kanako ang tanang sugyot sa maayong ibunyag sa kapunongan. Nakahunahuna kog KAMAISMAK (Kapunongan sa mga Magsusulat sa Isla sa Maktan) kay buot man namong mahiapil niini ang mga magsusulat sa lungsod sa Cordova. Apan maoy among nauyonan ang KAMALACOR (Kapunongan sa mga Magsusulat sa Lapulapu ug Cordova).

Gikan sa fast food chain namalik mi sa ilang MMJ ug didto gipadayon namo ang kulukabildo bahin sa panuwat samtang gatungab-tungab niadtong ‘sikit’ nga gisaktan og kola. Hangtod nakahunahuna ko pagtawag kang kadagang Prescil Cañete aron suginlan bahin sa among nasabotan— ang pagtukod sa KAMALACOR.

Gipasa ko kang MMJ ang selpon kay nagdumili man si Nor ug silay nag-estorya bahin sa bag-ong kapunongan nga buot namong mugnaon. Nalipay si Prescil pagkasayod sa among tinguha ug mipasalig pagtabang sa grupo. Gipiyal namo kaniya ang pagkontak sa ubang magsusuwat sa Cordova aron agnihon pagpasakop sa KAMALACOR. Gisultihan kini ni MMJ nga unya na kami magpili og mga haligi nga manimon sa pundok sa higayong daghan na ang magpasakop ug manambong sa tigom.

Nangutana ko kanila kon di ba mopasilong ang KAMALACOR sa LUDABI o BATHALAD, si Nor mipadayag nga dili. Lahi ug gawasnon ang maong grupo bisan kon nagmanggad ug nagpadisog gihapon sa pinulongang Binisaya. Maoy among plano nga magpasiugda usab unya og indigay sa panulat, pandayan sa panulat ( workshop) ug ubang tulumanon nga magpalambo sa dila ni Lapulapu ug Dagohoy sa umaabot nga mga adlaw sama sa gibuhat sa Bathalad ug ubang kapunongan sa mga magsusulat.

Sa wala pa mi mamiya si Nor sa ilang MMJ nianang hapit nang alas 7 sa gabii, gipasalo una mi nilag panihapon. Wala pa gani mahilis ang among gipangkaon sa fast food chain, gisansanan na usab og lain. Nangabusdik mi sa kan-ong humay uban sa sinabawng munggos ug letsong manok nga gibayang sa talad.

Gihatod mi ni MMJ sa karsada ug misugyot si Nor nga manglakaw lang una mi aron mahilis-hilis ang iyang gikaon kay labihan niyang busoga ug sa unahan na mi manakay og traysikol. Samtang hinay-hinay ming nagbaktas, miingon si Nor nga magpakyaw lang siyag traysikol para Timpolok ug ihapit lang mi sa may district hospital kay adto man sila moagi. Ang Timpolok usa ka sityo sa Barangay Babag diin nagpuyo si Nor Dungog ug mao ni sagad niyang agian pagpauli ilabi nag magabii.—

Nor Dungog.

Ang tagsulat.

Mar Manus, Jr.

Prescil Cañete.

Newspapers in Cebuano

Newspapers from Philippines

© PressReader. All rights reserved.