Gunman For Hire

Bisaya - - SHOWBITZSIKA - Sugilanon ni Bernito A. Dalit Cagayan de Oro City

SAMA katulin sa manatad ang dagan sa motorsiklo nga gisakyan ni Alberto Rubio. Naghaguros kining misubay sa Dalan Velez dayon gipang- oberteykan ang ubang mga sakyanan nga naagian. Si Magno Cualbar maoy nagdrive sa motorsiklong XRM ug siya igo lamang nga miangkas niini. Sa dihang miliko na sa tuo ang ilang gisakyan sa Dalan Pabayo, nangandam dayon si Alberto aron pagtuman sa gisugo kaniyang misyon.

Gihikap ni Alberto ang pistola nga kalibre .45 nga gitakin sa tuong bahin sa iyang kilid. Gitarong niya kini aron dili mahulog ug iya kining gipasalipdan sa gisul- ob niyang diyaket- maong. Walay kasayoran si Magno nga siya maoy trabahoon ni Alberto inig- abot nila sa hilit nga dapit sa Taguanao nga sakop sa Barangay Indahag, Cagayan de Oro City. Mao ni ang lugar nga napilian ni Aberto kay, gawas nga mingaw, talagsa ra sab ang sakyanan nga mangagi. Sa higayon nga mapatay na niya si Magno, dali ra dayon siyang makaikyas.

Gawas nga dili trapik, kalibonan pa gyod ang dapit ug daghan pa gyong dagkong kahoy nga nagtindog sa kadaplinan. Gisugo si Alberto sa ilang big boss sa sindikato nga si Mr. Segundo sa pagpatay og unay kang Magno tungod sa dako kuno niining atraso sa sindikato. Sa wala pa mosanong si Alberto sa gisugo ni Mr. Segundo, gipaningkamotan niyag maayo nga makakuha og eksaktong impormasyon kon unsa gyoy sala ni Magno kansang trabaho sama pod kaniya nga usa ka gunman for hire.

Tungod sa kahigpit sa mga sumbanan sa ilang pundok, napakyas si Alberto. Wala gyod niya mahibaw- i ang tinuod nga hinungdan nganong ipapatay man sa iyang agalon ang iyang kauban ug suod niyang higala nga si Magno. Bukid sa iyang buot ang pagtuman sa gisugo sa iyang agalon. Apan wala siyay mahimo. “Kon magkinaunsa man galing ni, mapugos gyod ko pagtuman sa gustong mahitabo sa akong agalon,” niya pa sa hilom. Kay basin kuno og siya na sab nuoy ipapatay ni Mr. Segundo.

“Suod kaayo mo nga managhigala, Bert, busa dili ka maglisod pagpatay kang Magno!” nagkanayon si Mr. Segundo usa ka buntag niana human siya ipatawag didto sa buhatan niini.

“Pero Boss, sa unsa nga hinungdan nga ipapatay mo man ang tawo nga maoy nautangan kog buot aron makasulod niining trabahoa!” pangahas nga tubag ni Alberto.

“Dili nako trabaho ang pagtubag sa imong pangutana, Bert!” pintok nga pamahayag ni Mr. Segundo nga napikal sa gipakitang taras ni Alberto. “Ako ang agalon busa ako ang masunod. Kon gigamyan ka sa singkuwenta mil bugti sa kinabuhi ni Magno, puyde ko kanang dugangan! Ang importante nga matuman mo ang akong gisugo sa labing madali nga panahon. Tagalan tika og duha ka adlaw sugod karon lakip na ang pagpili sa lugar diin didto mo siya tipia! Kanang walay bulilyaso, ha!” pahimangno ni Mr. Segundo dayong tindog sa gilingkoran niyang bangko ug milakaw kini gawas sa iyang opisina.

Walay nahimo si Alberto. Mitindog usab siya gikan sa gilingkoran niyang bangko ug misunod pagbiya sa buhatan ni Mr. Segundo.

Didto sa safehouse nga gipanag- iya ni Mr. Segundo, naginusara na lamang si Alberto sa pagkurikuri sa iyang armas. Iya kining gilimpiyohan alang sa sunod nga kombate. Lima silang tanan nga nagpuyo ning maong safehouse. Siya, si Magno ug ang laing tulo ka gunman for hire nga sila si Budik, Otik ug Isyot. Ang nahisgotang tulo sayo na nga nakalakaw aron pagtubag sa tagsa- tagsa nila ka trabaho.

Samtang si Magno, tulo na ka adlaw nga wa niya makita sa ilang safehouse. Mao sab ni karon ang namatikdan ni Alberto sa iyang higala kay morag wala nay interes sa iyang trabaho. Sa iyang tan- aw, morag nagpasagad na lang ug talagsa na lang gani mag- monitor sa ilang kalihokan isip team leader. Namatikdan ni Alberto ang pagka wala na niiniy kadasig sa higayon nga duna na silay likidahon.

Sukwahi kaniadto nga mao pa kini ang mopukaw kanilang upat. Isip team leader, si Magno mismo pirmeng ga- motivate

Ang hustisya lainlain og bulok. Sa ilang kalibotan, ingon niini ang hustista…

sa ilang mga trabaho. Sa ilang atubangan nahikyad na ang ngalan ug hulagway sa mga tawong patyonon with the corresponding amount. Sagad sa ilang gipangtumba— mga politiko, polis, mediamen ug mga drug pusher ug user nga dakog batal sa gikuha nilang shabu. Buot ipasabot, wala gyoy patawad. Bisan yano nga mga manggamitay og droga mahiagom gyod sa mabangis nga kuko sa kamatayon basta dili kini makabayad sa giangkat nilang shabu.

Ingon niini ang nature sa ilang trabaho diha sa mga kamot ni Mr. Segundo. Gawas sa basic salary, kompleto usab ang ilang benefits nga madawat puhon sa ilang mga pamilya. Alang kang Alberto, si Mr. Segundo maoy nakatubag sa iyang mga panginahanglan sa materyal nga mga butang lakip na ang kaugmaon sa iyang pamilya ug mga anak. Apan wala siya malimot kang Magno nga maoy nagdaldal kaniya aron makasulod ning maong pundok.

Usa lamang siya ka yanong mag- uuma sa Malitbog, Bukidnon. Sa dihang nakabakasyon sa ilang dapit ang suod niyang higala ug silingan nga si Magno, mihangyo siya nga mokuyog aron manimpalad dinhi sa Cagayan de Oro. Naibog siya sa kahimtang ni Magno. Luho ang pamiste. Ang kalawasan namungingi sa naggilak- gilak nga mga alahas ug mahalong relo. Sulod sa tulo ka tuig nga nawala kini sa ilang dapit, kompleto na sa appliances ang bag- o niyang balay nga iyang gipatukod sa bag- ong pinalit nga lote.

Giila niya nga dakong utang kabubut- on ang mga paningkamot ni Magno aron makasulod siya sa maong trabaho. Dili ikalimod nga miarang- arang baya pod ang iyang kinabuhi. Nakabayad na siya sa daghan niyang utang. May yuta na pod siyang napalit nga maoy gitukoran sa bag- o niyang balay. Kini maoy pipila lamang sa iyang mga abot sa iyang pagka gunman sa mga kamot ni Mr. Segundo.

Apan dili ikalimod nga kinahanglan pa gyod siyang mokayod og maayo tungod kay ang lima ka buok niyang anak gusto pa niyang paeskuylahon sa desenteng tulunghaan. Taas pa ang iyang labangon sanglit ang kamagulangan niyang anak- babaye mao pa say pagkatapos sa senior high school. Maoy iyang gusto nga mapropesyonal ang iyang mga anak aron makabaton kinig maayong trabaho puhon sa ilang pagpangdagko. Ug dili kini mahisama kaniya nga wala gani makahuman og elementarya.

Kalit nga mikiring ang iyang selpon nga diha niya ibutang sa lamesita. Dunay nanawag. Iya kining giduol. Si Magno ang nanawag nga nag- agni kaniya sa pag- adto sa nahimutangan niini sa VIP Hotel nga anaa sa kanto sa Dalan Antonio Luna ug Don Apolinar Velez, CDO. Duna kunoy importanteng tuyo kaniya si Magno. Gikan sa Barangay Bulua nga maoy nahimutangan sa safehouse ni Mr. Segundo, nakahukom na lang si Alberto sa pagsakay og taksi. Nagdag- om man god ang langit. Nahadlok siya nga basin masapnan siya sa ulan sa dalan kon magmotorsiklo pa siya.

Samtang nagdagan ang taksi nga gisakyan ni Alberto, giliraw niya ang iyang mga mata sa iyang relo de pulso. Alas 11: 00 pa man diay sa buntag. Gipakaingon niyag alas 12: 00 na sa udto tungod sa paghilab sa iyang tiyan sa kagutom. Wala pa man diay siya makapamahaw. Nahinumdom siya nga igo ra man diay siyang nangape kaganina sa buntag didto sa opisina ni Mr. Segundo. “Husto gyod ang pagdapit ni Magno kanako og paniudto.” Gikan sa Bulua, dili ra mag- usa ka oras ang dagan sa sakyanan basta di lang bug- at ang trapiko.

Untop alas 12: 00 sa udto nga nakaabot ang taksi sa VIP Hotel. Human makatunol og pamilete, gitulod ni Alberto ang nagtak- om nga sera sa sakyanan ug mitabok subay sa pedestrian lane diin didto sa atbang nagbuntaog ang tulo ka andana nga VIP Hotel. Sa first floor pa lang, girumbo niya ang kan- anan ug imnanan diin sa suok nga bahin niini nakita niya si Magno nga nagpadistansiya sa ubang mga kostumer. Nagpayungyong kini sa kalo nga sa matag karon ug unya motungab sa inipis nga pulang kabayo.

Gisenyasan ni Magno si Alberto sa pagpaduol sa iyang nahimutangan human kini makamatikod sa iyang pag- abot. Mihagad si Magno og paniudto. Gitawag ni Alberto ang waiter. Miorder sab siya sa iyang paboritong sud- an nga karikari, apritada, sinugbang bangus ug duha ka platong kanon ug naniudto silang duha. Humag pangaon, gikab- ot ni Alberto ang usa ka botelya sa pulang kabayo nga gitunol ni Magno kaniya.

“Unsay tuyo mo nako, Bay Magno? Ug nganong wala ka na man magpakita didto sa atong safehouse sa compound ni Mr. Segundo?” pangusisa ni Alberto sa iyang higala nga naglingkod sa iyang atbang.

“Bay Bert, duna koy isulti nimo! Ayaw lag kakurat, ha!” nagkanayon si Magno nga nagpanglingi ug nagpaniplat sa mga tawong nagsulod- gawas sa VIP Hotel.

“Kay unsa man na, Bay?” tubag ni Alberto nga morag nahibulong sa gipakitang lihok ni Magno.”

“Ipasalig sa nako, Bay, nga dili ka magsaba sa atong mga kauban labi na kang Mr. Segundo kay sekreto ra ba ni,” sumbalik- tubag ni Magno nga ang panagway gisambogan og kabalaka samtang nagtutok sa iyang higala.

Gipasaligan ni Alberto si Magno nga wala gayoy masayod sa tanan.

Gibutyag niya ang iyang katuyoan. Nanagko ang mga mata ni Alberto sa tumang kahikurat.

“Unsa?! Moundang ka na pagka gunman, Bay Magno?” ni Alberto sa pinugngan niining tingog.

“Mao kana ang nakab- ot kong desisyon, Bay. Ug wala nay makausab pa sa akong hunahuna. Gitulisok na ko sa akong konsensiya. Dili ko na kaya ang pagsigeg patay sa mga tawong dili nato kontra, Bay!” tubag usab ni Magno dayong tungab sa beer nga giipis ni Alberto kaniya.

“Bisan pa ba kon ako na mismo ang mohangyo nimo nga ayaw pag- undang?! Ato lang gong pasabton si Mr. Segundo!” pasabot ni Alberto sa pamasin nga mosugot pa ang iyang higala. Apan napakyas siya.

Alas 2: 00 na ang takna sa kahaponon sa dihang nanggawas sa VIP Hotel sila si Alberto ug Magno. Giagda sa naulahi si Alberto sa pagkuyog niini didto sa Zords Beer Garden kansang location nahimutang sa sentro sa Taguanao. Mihayag ang kalangitan ug wala modayon pagbundak ang ulan. Mao tong miangkas si Alberto sa motorsiklo ni Magno. Pulos sila armado nga nagdyaket. Si Magno lamang ang nag- helmet. Samtang si Alberto nagkalo ug nag- sunglass. Nagkasabot ang duha nga adto magtiwas pag- inom sa Zords Beer Garden sa Taguanao tungod kay layo ra kini sa siyudad ug safety sila sa mga tinugyanan sa balaod.

Apan lahi ang diha sa hunahuna ni Alberto. Samtang linga si Magno sa iyang pagmaneho sa motorsiklo, si Alberto usab hugot nga nakadesisyon sa paghunos sa kinabuhi sa iyang higala. Gisakyan niya ang maayong kahigayonan. Wala nay laing higayon aron mapatay niya si Magno. Sakit man hunahunaon apan wala siyay mahimo tungod kay nahitaya na ang iyang kinabuhi.

Alang kang Alberto, ang paghagad ni Magno sa pagpakig- inom sa naasoyng beer garden maoy tulay sa iyang kalamposan. Dili man god puyde nga adto niya patyon si Magno sa VIP Hotel tungod kay wala man siya makapangandam. Karon kay nakaangkas siya sa gisakyan niining motorsiklo, dili na niya pasagdan nga mangabot pa sila sa Zords Beer Garden. Sentro ang maong dapit. Bibo ug daghan kaayong tawo, busa dili gihapon matuman ang maitom niyang laraw kang Magno.

Maoy iyang plano nga pag- abot nila sa hilit nga dapit sa Forest Lake, tionan niya si Magno sa dala niyang kalibre .45

aron mohunong kini pagmaneho. Inigkanaog nila, iya dayong pusilon ang ulo niini aron diretso kining mamatay. Sa maong kahimtang, libre siya kay wala may mga tawo nga makakita sa iyang pagabuhaton. Luwas usab siyang makapahilayo sa maong dapit ug siya na dayon ang mogamit sa motorsiklo ni Magno.

Tungod sa kakusog sa dagan ni Magno, nakaabot na sila sa Sityo Aluba. Duha na lang ka sityo ang labangon ug moabot na dayon sila sa Forest Lake. Kulbahinam na ang gibati ni Alberto. Wala siya makasabot sa talagsaong kuba sa iyang dughan. Lahi ang iyang gibati karon tungod tingali kay suod nga higala ang iyang ihatod sa impiyerno.

Pag- abot nila sa Stargate, mihunong ang motorsiklo nga ilang gisakyan diin ang sunod nga sityo niini mao na ang Forest Lake. Mimando si Magno sa pagpakanaog kang Alberto kay sugo kuno sa lawas. Midistansiya si Magno kang Alberto. Si Alberto mikuot og sigarilyo sa iyang dyaket dayong kuot sa lighter sa bolsa sa iyang karsones aron dagkotan ang sigarilyo nga diha sa iyang baba. Milingi siya aron pagtan- aw kang Magno. Apan dako na lang ang kahikurat ni Alberto kay si Magno nakabunot na sa pistola ug nagtion na kini kaniya.

“Unsaon ta man, Bay, liba ka man kaayo! Nasayod na ko, uy, nga gisugo ka ni Mr. Segundo sa pagpatay nako!” nagkanayon si Magno nga ang tuong kamot hugot kaayong naggunit sa iyang armas.

“Ta…. ta… taym sa, Bay! Ki… kinsa bay nagsulti nimo nga gisugo ko sa pagpatay nimo?” tubag ni Alberto.

“Nabati ko ang inyong panagsulti kaganinang buntag!” direktang tubag ni Magno nga nag- anam pagpaduol sa nahimutangan ni Alberto.

“Gioperan ka pa man gani og singkuwenta mil bugti sa akong kinabuhi!” padayon pa ni Magno.

Gipadayag ni Magno nga samtang naghawid siya sa doorknob aron mosulod na unta sa opisina ni Mr. Segundo wala na lang siya modayon tungod sa kabanha niini. Ang iyang gihimo milili siya sa gamayng bangag aron pagsuta kon tinuod ba nga si Alberto ang tua sa sulod. Ug wala gyod kuno siya masayop.

Wala na makalimod si Alberto. Samtang nag- inatras siya tungod sa hinay- hinayng pag- abante ni Magno sa iyang nahimutangan, nagplano siya nga makigpanabla niini. Iya kining tubayan sa pagpakigsulti, inigkalipat niini kaliton niya pagbunot ang iyang armas ug idiretso niya kinig pusil kang Magno. Miduyog kang Alberto ang kahigayonan. Sa kalit lang may nagsingabot nga dakong sakyanan nga maoy nakaanghel kaniya.

Gibunot ni Alberto pagkalit ang iyang pistola nga diha sa iyang kilid og gidiretso pagpusil si Magno. Apan dali kining nakalikay ug igo lang natapsingan ang walang bukton. Mibalos si Magno pagpusil kang Alberto nga niining higayona nagdagan ug buot na untang mopahilayo kaniya. Apan wala makalingkawas si Alberto sa nagpungasing mga bala sa armas ni Magno. Giduol ni Magno ang iyang higala nga nahay- ad na sa yuta. Mitikubo siya ug gihikap ang pulso niini. Wala na kini magpitik.

“Ayawg kabalaka, Bay, hatagan kog hustisya ang imong kamatayon!” nagkanayon si Magno. Miduol kini sa nagparking niyang motorsiklo. Iya kining gipadagan balik sa ilang agi kaganina. Pag- abot sa unahan, miliko kini sa tuo diin ang rumbo niini paingon sa tagong buhatan ni Mr. Segundo.

(KATAPOSAN)

“Ta….ta…taym sa, Bay! Ki… kinsa bay nagsulti nimo nga gisugo ko sa pagpatay nimo?” nagkabungabungang tubag ni Alberto…

Newspapers in Cebuano

Newspapers from Philippines

© PressReader. All rights reserved.