Mata Sa Hustisya

Anam- anam nga gisulod ni Monsour ang misteryo nga naglimin sa kamatayon ni Angelo Lopez…

Bisaya - - SHOWBITZSIKA - Nobela ni Oliver P. Flores

(Gula 3)

INANAY nga napusgay ang tingog ni Divina Lopez Singson samtang nagpadayon siya sa pagpagawas sa iyang hunahuna. Matag karon ug unya, magkatinan-away sila si Monsour ug Malou nga sukad pa ganina nagpakahilom lang.

“Di kay pagduda lang ning ako, Monsour, kondi pagtuo gyod nga gituyo pagpatay ang akong igsoon. Lig-on si Angelo kon dunay giatubang nga problema. Di siya daling mahugno niini. Mangita siyag sulbad, di pinaagi sa kaputong. Nasuheto ko niya kay magsoon mi.”

Daling gitrapohan ni Divina sa gikuptan niyang panyo ang mga luha sa iyang mga mata.

“Sa mga kaso nga giduol nako sa mga tagtungod sa nabiktima sa krimen, sama mog rason. Gipatay ug wa maghikog ang biktima. Daghan na ang kaso nga ingon niini nga akong nasulbad. Kasagaran, love triangle ang hinungdan. Duna ka bay ideya, Div, bahin niini?”

Naghinuktok si Divina. Wa siya tugawa ni Monsour sa lawom niyang gihunahuna, gipasagdan nga mangapkap og mga opinyon nga iyang ikasugilon ug makatabang sa pagsulbad sa kaso nga iyang giduol kang Monsour. Midagkot si Monsour og Marlboro. Nagpabuhot sa aso.

“Unyang gabii, Mon, puyde kang makaadto sa balay ni Angelo? Tua siya hayaa didto. Basig duna kay makita didto nga makatabang nimo sa pagsulbad aning tanan.”

Nagkatinan-away sila si Monsour ug Malou. Sa hunahuna ni Monsour, kinahanglang makaadto siya sa balay sa biktima. Usa kini sa angay niyang susihon.

“Puyde. Bisag wa ni nimo isulti, Div, moadto gyod ko. Usa ni sa agianan para nako sa pagsulbad sa kaso.” “Salamat, Mon.” Mikuot si Divina sa iyang shoulder bag. Naghinan-aw lang sila si Monsour ug Malou. Paggawas sa kamot ni Divina sa shoulder bag, dala niini ang dakong sobreng puti nga nagburot sa sulod.

“Salamat sa pagsanong mo sa giduol ko nimong kaso, Monsour. Pasiuna lang kining bayad.”

Gidawat ni Monsour ang nagburot nga puting sobre nga gitunol ni Divina kaniya. Unya mitindog si Divina.

“Di na ko magdugay, Mon, Malou. Modiretso ko sa haya sa akong igsoon gikan dinhi.”

Gihatod ni Monsour si Divina Lopez Singson kutob sa pultahan sa apartment. Dihang nakagawas na siya, gisundan ni Monsour sa pagtan-aw ang pagbiya sa Innova nga kolor pula. Si Divina mismo ang nagmaneho kay sa iyang pagtuo naginusara lang kini sa iyang sakyanan. “Mokuyog ko nimo, Mon.” Miparayeg si Malou kang Monsour sa pagbalik sa ulitawo sa sala. Ingon gyod si Malou niini kon moparayeg kang Monsour, mokabyon sa liog sa ulitawo ug hagkan-hagkan niya ang punoan sa dunggan sa detektib.

“Makabalibad ba ko nimo? Sunday ron. Gawasnon ka sa sa paglaag kay way trabaho.”

Nangahilom silang duha. Dali rang nakasapwang si Monsour kang Malou ug nanulod sila sa iyang kuwarto. SA usa ka dakong subdivision sa Banawa nahimutang ang balay ni Angelo Lopez. Daghang tawo sa pag-abot nila ni Monsour ug Malou. Sa gawas sa dakong balay nga duha ka andana, sa sulod sa lagwerta, dunay nanagsugal og madyong ug tong-it. Duna pa ganiy naghantak. Naandan na kini sa mga sugarol, nga ampay kon dunay mamatay kay naa man ang hapit tanang klase sa sugal. “Ganina ra mo?” Gisugat sila si Monsour ug Malou ni Divina Lopez Singson. Nagtuo si Monsour nga gituyo gyod ni Divina ang paghuwat kanila.

“Wa ko kamatikod sa inyong pag-abot. Didto ko sa sulod, nanihapon ko. Tana nuon sa sulod aron makapanihapon mo, Mon… Malou.” “Human na mi, Div.” Mikupot si Malou sa bukton ni Monsour. Nag-una kanila si Divina. Unya nanglingkod sila sa bakanteng mga lingkoranan duol sa lungon ni Angelo Lopez. Medyo lawom nang gabii niadtong tungora. “Nahuman nang pangadye.” Miyango-yango si Monsour kang Divina. Gipaliraw ni Monsour ang iyang panan-aw sa dako ug nindot nga sala. Daghang appliances nga pangsala. Duna pa ganiy piyano.

“Maayong motugtog si Cassandra sa piyano. Ang paborito nga My Way ni Angelo ang kanunay tugtogon ni Cassandra nga ubanan sa pagkanta ni Angelo.” “Kinsa man nang Cassandra?” “Kakita ka anang nagbistedag itom nga naglingkod sa may tiilan sa lungon? Mao kana si Cassandra Galvez, ang gipuyo-puyo ni Angelo mga tulo ka buwan na.”

Wa magtingog si Monsour. Nakatutok siya kang Cassandra Galvez. Bisag nagtakilid kini kanilang tulo apan nasuta ni Monsour nga maanyag kini. Sa iyang pagbanabana, puparehas lang kinig edad kang Malou. Bisag naglingkod, naseguro ni Monsour nga slim ang lawas ni Cassandra. “Taga diin man na siya, Div?” “Wa ko makahibawo, Mon. Dihang nagbuwag sila si Angelo ug Donna, mao na lay akong nahibaw-an nga duna nay kaubang babaye sa pagpuyo si Angelo dinhi. Gipaila ko ni Angelo kang Cassandra. Sa akong paniid, buotan si Cassandra. Matinahoron siya nako ug sa akong bana. Giatiman niya si Angelo bisag badlongon kini. Hilig og babaye ang akong igsoon. Medyo nasuheto ko sa kahimtang sa ilang pagpuyo dinhi kay tua ra man sa unahan ang among balay sa akong bana.” “Nagtrabaho ba si Cassandra?” Midagkot si Monsour og usa ka stick sa Marlboro. Nanabon si Divina sa iyang ilong sa gikuptan niyang panyo. Apan wa magtagad si Monsour niini. Naandan na niya ang pagpabuhot sa aso sa sigarilyo kon duna siyay lawom nga hunahunaon. “Wa. Nia ra siya sa balay.” Nahilom si Divina ug mitan-aw sa bag-ong nahiabot, babaye ug lalaki. Namatikdan ni Monsour nga mikalit og kaaslom ang nawong ni Divina. Nagmugot kini. ( PADAYONON)

“Ganina ra mo?”

Newspapers in Cebuano

Newspapers from Philippines

© PressReader. All rights reserved.