TIPIK SA PROGRAMANG BUILD, BUILD, BUILD, GIINAWGURAHAN

Bisaya - - SHOWBITZSIKA - Ni EDUARDO P. MONREAL

GISERAD-AN ang dakong diversion road sa Siyudad sa Davao nga gingalan kang kanhi Presidente Carlos P. Garcia, nga usa ka Bol-anon. Ang maong diversion road nanukad sa Brgy. Ulas ngadto sa pikas tumoy nga mao ang Brgy. Panacan. Ang pagsera gipahigayon tungod sa usa ka okasyon nga mao ang pag-inawgurar sa gipalapdang tulay nga nahimutang sa Brgy. Ma-a. Kini nahitabo kaniadtong Mayo 24, 2018.

Ang gihimong seremonyas isip paginawgurar mao ang pagbugto sa usa ka ribbon nga may nagbitay nga pungpong sa bulak, diin gibugto kini pinaagi sa pag-agi sa pick-up nga lulan si Presidente Rodrigo Roa Duterte og mga opisyal sa Department of

Public Works and Highways (DPWH).

Human sa seremonyas, midiretso dayon si Presidente Duterte ngadto sa usa ka dakong puting tent diin naghulat ang dagkong mga tinugyanan sa nagkadaiyang ahensiya sa gobyerno, nasyonal o lokal, mga bisita ug ang grupo sa taga media.

Ang maong tulay aduna nay gilapdon nga upat (4) ka lane, ug moserbisyo kini sa diversion road nga adunay unom (6) ka lane. Kining naasoyng diversion road adunay dako kaayong tabang sa ekonomiya sa Siyudad sa Davao tungod kay dinhi na moagi ang dagkong mga trak nga naggikan sa Cotabato, Davao del Sur ug Bukidnon nga mopadulong sa Davao del Norte, Davao Oriental, Compostela Valley Province, ngadto na sa mga probinsiya sa duha ka Agusan ug duha ka Surigao.

Tungod niining maong kalamboan, mimando si Presidente Rodrigo Roa Duterte ngadto sa namunoan sa Davao City Highway Patrol nga kinahanglan dili gamitong “parking lot” ang isigkadaplin niining maong unom ka linya ( 6 lanes) nga dalan, aron malikayan ang disgrasya. Ang paglimpiyo usab sa isigkadaplin niining maong dalan makasayon ug makapapaspas na sa mga motorista.

Dugang pa ni Presidente Duterte nga ang maong tulay gigamitan sa tukmang kalidad sa materyales aron nga seguradong maayo ang pagkabuhat sa maong tulay.

Ang tulay nga nagkantidad og P345,000,000 milyones ka pesos maoy agianan sa sobra 30,000 ka motorista matag adlaw sa Siyudad sa Davao.

Sa hinapos sa iyang mensahe, si Presidente Rodrigo Roa Duterte nag-awhag sa ubang ahensiya sa gobyerno sa pagsagop sa iyang programa nga “Build, Build, Build” aron makatabang sa pagpatubo sa ekonomiya sa nasod, ug nga himoon kini nga sihag ug paspas alang sa kabulahanan sa kinabag-ang mga Pilipino dili lang sa Davao City kondili sa tibuok Mindanao nga moagi sa nahisgotang tulay.—

Nagpasalamat si Presidente Duterte sa paspas nga paghuman sa maong tulay nga gigamitan gyod sa tukmang materyales.

Sa tunga-tunga sa iyang mensahe, gipatawag ni Presidente Duterte ang pangulo sa Highway Patrol sa Davao City ug giingnan nga “ora mismo” ipatuman ang paglimpiyo sa Carlos P. Garcia Highway sa mga illegal parking.

Yano ug hinay-hinay nga midagan ang sakyanan nga maoy mobugto sa ribbon isip simbolo sa inawgurasyon sa bag-ong gipalapdang tulay sa Carlos P. Garcia Highway.

Si Presidente Duterte uban sa dagkong opisyales sa gobyerno nga maoy maabtikong nanagpaluyo sa proyekto.

Newspapers in Cebuano

Newspapers from Philippines

© PressReader. All rights reserved.