super ma’ams and i

Bisaya - - SHOWBITZSIKA - Ni MERIAM GUMANID LAMBERTE

KON paguwapahay ang estoryahan medyo dili ra pod seguro ko mabiyaan sa ilang mga panagway, kon utokay sab ang tigian aw, dili pod ko tanto nga maulahi pero kon padakanay sa lawas ang sumbanan, aw way lalis, kay bisan kinsa ang pangutan-on winner na gyod me (Hehe) kay salad man gyod kaayo ni sila og mga lawas uy, seksi ba, ako siksik na… Agoy faets!

Sugbo, Kabisay-an ug Mindanao; himamata ang 21-anyos nga si Mary Joy Garciano ug 32- anyos nga si Jade Lyra LibaVelmonte, mga magtutudlo sa managlahing tunghaan sa among lungsod sa Hilongos. Mga magtutudlo nga angay gayod himoong sumbanan sa katilingban labi na sa kabatan-onan.

Unahon nako pagsugilon ang kabahin ni Ma’am Joy. Si Ma’am Joy akong naila-ila human siya nahimong substitute teacher sa Grelina Osmena Christian College (GOCC), ang tunghaan nga gieskuylahan sa akong anak nga si Dado. Good vibes kaayo ni si Ma’am kay bisag bag-o ko pa lang siyang nakaila apan nagsinugang ang rason kon nganong nauyonan nako siya— mapahiyomon kanunay, very entertaining and approachable. Taliwa sa iyang gihandle nga kinder students pirme lang gihapon siyang energetic. Just like me! (hehe).

Sa dihang nagtsika mi, ako siyang gisukit-sukit kabahin sa iyang kinabuhi, ug daghan gyod ko og nasayran bahin kaniya. Guwapa na, cum laude pa! Yes! Cum laude si Joy sa Visayas State University (VSU) sa iyang kursong Bachelor of Science in Secondary Education.

Kanhi kinder teacher ang inahan ni Joy (Felomina) ug maguuma ang iyang amahan nga si (Joel). Kamaguwangan siya sa duha ka managsoon. Gipadako si Joy sa iyang mga ginikanan nga puno sa paghigugma ug gipuy-an nila ang mga pagtulun-an sa Diyos.

Igo-igo lang, matod pa, ang kita sa iyang mga ginikanan maong daghang mga higayon nga moinom lang siya og tubig panahon sa reses.

“Wa na man god mi pautanga sa among utanganan kay taas na man kaayo ang among listahan,” asoy ni Ma’am Joy.

Gawas sa kahagip-ot sa materyal nga mga butang, produkto

sab sa bullying ang magtutudlo sa akong anak niadtong diha pa lang siya sa elementarya.

“Diha goy kausa nga hapit na ko nakuyapan kay gitabangan ko sa akong mga classmate og bugno,” hinubay ni Joy.

Pastilan, dinhi gyong dapita mitulo ang akong luha, uy! Kay sa pagkatinuod lang, sa elementary pa ko, produkto pod ko aning bullying. Nahinumdoman nako ang higayon nga ang taas nakong buhok mikalit lang kapugdol kay gigunting sa walay puangod nakong mga classmate.

Daghan og kasakit si Ma’am panahon sa iyang pagtungha sa pinansiyal man o sa emosyonal nga aspeto pero wa nay labing sakit sa dihang mismo sa iyang atubangan sulod sa tambalanan nabugtoan og kinabuhi ang iyang pinalanggang inahan.

“Kalit lang gyod to, Ma’am. Wala gyod namo damha nga mamatay si Mama,” saysay ni Joy.

Sayod ko kon unsa kapait ang mawad-an og inahan kay ako mismo sa dihang namatay akong mama, nasinati gyod nako ang pu’ng nga sakit, sakit nga daw molamoy sa imong tibuok kaunoran.

“Di na man ko ganahan moeskuyla, para asa pa man nga wa na man si Mama,” dugang hinubay ni Ma’am Joy. Apan gumikan sa iyang mga pangaliya daw nalamdagan ang iyang hunahuna labi na kay gusto man gyod sa mitaliwan niyang inahan nga magmalamposon siya sa kinabuhi.

“Entrance Exam, mao say adlaw sa paglubong ni Mama mao tong naningkamot gyod kong makaadto og Baybay pagkahuman gyod dayon sa lubong.”

Tungod kay utokan man ang atong bida, mipasar gyod siya sa maong tunghaan apan dili lalim ang kalisdanan nga iyang gisagubang ilabi na kay wala na ang iyang inahan nga makagiya kaniya.

Hinuon, sa ikaduhang tuig sa iyang pagtungha sa VSU, nahimo siyang scholar apan lisod gihapon ang pagsugakod sa uban pang mga balayranan. Raket-raket din pag may time ang iyang drama aron dili kaayo mabug-atan ang iyang amahan ug apohan nga maoy ming-abag sa iyang pagtungha.

Tuig 2017 wala makawang ang iyang pagpaningkamot kay mapahiyomon siyang mimartsa ug midawat sa iyang diploma nga nasundan dayon sa pagpasar niya sa Teacher’s Board Examination.

Hinuon, sa iyang pagtungha, nakaplagan niya ang binuhat nga mihatag og bulok sa madag-omon niyang kinabuhi— ang iyang best friend turned lover, si Eurice Ed Mangaoang nga maoy usa sa gihimo niyang inspirasyon.

Mag-upat ka tuig na ang ilang relasyon apan sayod sila nga daghan pang mga unos ang ilang posibleng maagian, Pero fight-fight lang para sa inaasam na forever! Ug siyempre, si God matod pa niya, ang gihimo nilang sentro sa ilang relasyon.

Si Jade usab, nagkatagbo ang among dalan kay classmate sa iyang anak nga si Ann ang akong anak nga si Dado sa una. Pero ang tinuod, una nakong nakaila ang iyang inahan nga si Mana Lourdes ug lagi kay wa na man koy nanay gaan kaayo akong buot sa iyang mama. Sa ngadto-ngadto, nagkasuod mi sa iyang inahan ug hasta usab si Jade, ilabi na kay nadani pod ko sa iyang hagtik nga

katawa. Pero luyo sa mga katawa ni Jade akong nadiskobrehan ang iyang kanhi kasakit ilabi na sa iyang pagtungha. Sama kang Joy, daghan usab ang kalbaryo nga iyang gitungas una niya nakab-ot ang iyang nahimutangan karon.

Kamaguwangan usab sa tulo ka managsoon si Jade sa magtiayon nga Florencio ug Lourdes Liba. Apan gumikan lagi kay hagip-ot man ang panudlanan sa iyang mga ginikanan, napugos si Joy sa pagsulod isip working student pagtungtong sa college didto sa higala sa iyang inahan sa Dakbayan sa Sugbo. Katabang sa panimalay ug tigtudlo usab sa mga anak sa iyang amo, samtang ang iyang inahan nga si Mana Lourdes kosinera sa karenderiya nga gipanag-iya gihapon sa ilang amo.

Mapasigarbohon ko nga ingon ani usab ang akong gibuhat aron makalampos sa akong pagtungha sa una. Tabang-tabang sa balay ug tutor usab sa mga anak sa akong igsoon nga maoy

nagpaeskuyla nako gawas pa sa pagtrabaho nako sa nagkadaiyang fast food chain pagtungtong nako sa kolehiyo.

“Nah, tag-alas onse na god ko katu’g, Madam, kay daghan pa man kaayo og buhaton unya 3 am mata na,” hinubay ni Jade ngari nako.

Pero sa pagdis-og sa katuigan, taliwa sa mga kalisdanan nga naagian, nagmalamposon ra gyod si Jade sa iyang pagtungha sa kolehiyo ug migradwar sa University of Cebu (UC) niadtong tuig 2007 sa kursong Bachelor of Science in Secondary Education. Ug dili pa lang dugay, nalangkat na usab sa akong higala ang laing ang-ang sa kalamposan kay siya nakahuman na sa iyang Master’s Degree ug kasamtangan nga nagtudlo sa Concepcion National High School.

Human sa iyang pagradwar, miuli dayon siya sa Leyte ug nanarbaho isip magtutudlo sa Bato Institute of Science and Technology (BIST). Pero ang tinuod, gawas sa mga kasakit nga iyang naagian sa iyang pagtungha, labing nasakitan diay ang iyang kasingkasing. Napakyas siya sa iyang unang gugma— rason nganong daw dili na siya buot mahigugma pag-usab (Charing, Madam!).

Pero usa diay ka dayo sa ilang dapit ang gitagana sa Ginoo alang kaniya. Nahimamat niya ug nahimong higala si Josephus nga niadtong mga tungora uyab sa ilang silingan. Pero seguro kon ang duha ka binuhat gitakda sa usag usa, mohimo gayod og paagi ang kahigayonan aron magkatakdo ang ilang mga dughan.

Nasayran na lang ni Jade nga buwag na si Josephus ug ang iyang silingan ug sa ngadto-ngadto nagkasuod sila pag-ayo ilabi na kay daw dugay na nga adunay gusto niya ning lakiha (magpunay na man diay ni og text niya bisan naa pa ni uyab).

Pa- hard to get ang drama sa akong higala kay lagi di na siya buot masakitan sa gugma. Apan sa kadugayan, ang puso’ng bato nahimong puso’ng mammon, uy! Giangkon niya nga may ginagmayng mga kakulian sa sinugdanan sa ilang relasyon apan misangpot ra gayod kini sa altar sa kaminyoon. Sa pagka karon, duha na ka buok ang bunga sa ilang panaghigugmaay apan nagduda ko nga inig-uli sa iyang bana nga atua sa New Zealand mapun-an dayon ni (haha!).

Nganong maka- relate ko nilang duha? Gawas sa parehas mi nga mga guwapa, buotan, utokan, (Pasensiya na mo, alsahay sa ta og kaugalingong bangko ron, ahahah!), parehas pod mi nga nagkamang sa kawad-on apan nanglimbasog alang sa among maayong kaugmaon, inubanan sa kakugi ug makanunayong pagampo sa Labawng Makagagahom. Kon si Jade adunay Josephus ug si Joy adunay Eurice, ako pod naay Dondon nga sa kanunay nagpangga ug nagsuporta sa tanang butang nga akong ginahimo.

Sayod ko nga wala pa dinhi matapos ang among mga sugilanon ug taas pa kaayo ang dalan nga among pagasubayon apan segurado ko nga bisan moapas man sila sa akong gidak-on pagabot sa panahon, magpabilin nga matahom ug bulawanon ang ilang mga kasingkasing. Gasgas man nga panultihon pero ako kining balik-balikon, “Ang kawad-on dili babag aron makab-ot ang hayag nga kaugmaon!”—

Si Ma’am Jade sa iyang unkabogable pose.

Si Ma’am Joy ug ang pinakalit nga posing.

Uban ni Ma’am Joy ang pipila sa iyang mga tinun-an sulod sa classroom.

Silang mga seksi uban ang siksik nga tagsulat.

Si Jade uban sa produkto sa ilang panaghigugmaay sa iyang bana.

Nagmoment ang duha ka magtutudlo.

Newspapers in Cebuano

Newspapers from Philippines

© PressReader. All rights reserved.