Linugdangan

Bisaya - - Showbitzsika - Ni JOHN TAM. YBAÑEZ Gun-ob, Lapulapu City

WALAY Adlaw nga nagpakita nianang hapona. Gitabilan sa bagang dag-om ang kalangitan. Pipila ka buwan nang wala moulan. Kanunay lang naglagiting ang kainit sa Adlaw nga nakapakang-a sa ngabil sa yuta. Apan karon ingon sa dili na kapugngan ang pagbundak sa uwan.

Taliwala ning maong kahimtang, wala mausab ang plano ni Alfredo Fuentes pagduaw sa iyang logging company sa usa ka hilit nga bahin sa ilang lungsod sa habagatang Sugbo. Buot niyang masusi kon wala ba magpasagad ang iyang mga sakop.

Sa wala pa mogikan, gisusi una ni Alfredo Fuentes ang kondisyon sa iyang itom nga Land Cruiser. Dihang nasuta nga walay problema ang sakyanan, iya dayon kining gipaandar ug gipadagan kauban kang Fredielou, ang diyes anyos niyang anak-babaye. Dili unta niya kini pakuyogon kay dili maayo ang panahon apan namugos gyod. Hinuon, wala man kiniy klase kay Sabado man.

Kaniadto, yano lang nga mamumuo si Alfredo Fuentes sa usa ka kompaniya sa panapton. Nakasulod siya niini human sa ilang kaminyoon ni Lucia nga usa ka magtutudlo sa hayskol. Ang igsoon ni Lucia nga si Ernesto ang nagpasulod kaniya sa maong trabaho kay dako man kinig ranggo sa maong buhatan.

Nakapatukod si Alfredo Fuentes og sari-sari store kilid sa ilang balay ug, wala madugay, mitapon siya sa dakong negosyo sa pagpamutol og kahoy. Ug dihang milambo kini, nakahukom

Wala siyay pakabana sa linugdangan sa iyang binuhatan. Hangtod nga…

siya pagbiya sa kompaniya sa panapton aron matingob ang iyang pagtagad sa logging company. Sa maong higayon, duha na ang ilang anak ni Lucia nga nagtungha sa elementarya— sila si Fredielou ug Edison.

Tungod kay giharian na sa gahom sa kuwarta, gisaktan ni Alfredo Fuentes ug tinonto ang iyang negosyo sa troso. Iyang gipaapil og putol ang linghod pang mga punoan sa walay pag-isip sa mamahimong dangatan sa umaabot. Hangtod nga inanayng nagkaupaw ang kabukiran sa ilang dapit.

“Hunong na intawon anang imong illegal nga binuhatan, Alfredo, kay tingalig hisakpan ka sa mga tinugyanan sa kalikopan,” sa iyang asawa pa usa ka higayon niana.

“Hisakpan? Dili kana mahitabo, Lucia, kay nagmatngon ko sa akong mga lihok.”

“Sus, kanimo, Alfredo, wa ka lang masayod nga daghang kinabuhi ang posibleng maamong nianang imong gibuhat…” “Unsay buot mong ipasabot, Lucia?” “Ang mga katalagman nga posibleng motumaw sama sa baha ug pagdahili sa yuta!”

“A, bahala sila, wala kitay labot kanila!” Naisa ang tingog ni Alfredo Fuentes. NAG-UWAN na sa paghiabot nila ni Alfredo Fuentes sa logging company. Human ikapahiluna ang Land Cruiser sa kilid, mingkawas sila si Fredielou. Giadto niya ang iyang piniyalang si Carmelo ug gipangutana sa dagan sa iyang negosyo.

“Maayo man, Sir. Walay paltos ang tanan. Nagkadako ang atong kita matag adlaw,” pasabot ni Carmelo.

“Nakadayeg ko nimo, Carmelo, kasaligan ka gyod,” ni Alfredo Fuentes nga mipikpik sa abaga sa piniyalan.

Human maaninaw ang palibot sa iyang buhatan, nanamilit na si Alfredo Fuentes dayong sakay sa Land Cruiser uban kang Fredielou. Didto sa unahan, gipahunong niya ang sakyanan kilid sa bungtod aron mopalit og makaon sa usa ka tindahan. Gibilin lang niya ang anak ug siya ray miduol sa tindahan sa atbang.

Apan igo lang siyang nakabayad sa iyang napalit, nakabati siyag linagubo sa likod ug sa iyang paglingi, nanglurat ang iyang mga mata pagkakita nga natabonan sa dinahili nga lapok ug mga bato ang iyang sakyanan.

(KATAPOSAN)

Apan igo lang siyang nakabayad sa iyang napalit, nakabati siyag linagubo sa likod ug sa iyang paglingi…

Newspapers in Cebuano

Newspapers from Philippines

© PressReader. All rights reserved.