Nagpakabanang grupo miawhag nga ibalik ang death penalty

Bisaya - - Showbitzsika -

ANG Volunteers Against Crime and Corruption (VACC) miawhag sa gobyerno nga ibalik pagpatuman ang silot nga kamatayon gumikan sa nahitabong pagpamatay sa nagkalainlaing mga indibidwal nga naglakip na gani sa mga pari.

Miingon si VACC Vice Chairman Arsenio Evangelista nga sa kadaghan karon sa mga pagpamatay nga hasta ang alagad sa simbahan giapil na, dili na makataronganon busa angay na nga ibalik ang death penalty ilabi na nga aduna na poy pari nga gipatay.

Kahinumdoman nga dili pa lang dugay sa pagsulat niini, usa ka pari nga gipusil ug namatay sa luyo sa altar sa wala pa kini magmisa sa usa ka simbahan sa Zaragosa, Nueva Ecija.

Sumala pa sa report, si Fr. Richmond Nilo, 40 anyos, nag-ilis sa luyong bahin sa altar aron unta magpahigayon og misa sa dihang adunay duha ka tawo nga nagsakay sa usa ka motorsiklo, nanglili sa bentana sa simbahan ug unya gipusil ang pari sa ulo ug ubang bahin sa lawas niini.

Kalabot niini, si Philippine National Police Chief P/ Director General Oscar Albayalde miumol og Special Investigation Task Group (SITG) nga maoy gitahasan sa pag-imbestigar sa pagpatay kang Fr. Nilo. Ug gimandoan sab niya ang tanang mga hepe sa kapolisan sa tibuok nasod sa pagpaniid niadtong mga pari nga adunay death threat aron mahatagan sila og proteksiyon ug giawhag sab niya ang tanang pari sa tibuok nasod sa pagpakigkoordineyt sa PNP alang sa ilang kaluwasan.

Base sa record sa PNP, si Nilo ang ikatulong pari nga gipatay sukad niadtong Disyembre 2017. Kaniadtong Abril 29, si Fr. Mark Ventura gipatay sab human magpahigayon og misa sa Gattaran, Cagayan. Ug sa miaging Disyembre 4 sa milabayng tuig, si Fr. Marcelino Paez, kura paroko sa Jaen, Nueva Ecija gipusil sab ug namatay.— TNB

Newspapers in Cebuano

Newspapers from Philippines

© PressReader. All rights reserved.