Ug Akong Na-miss Ang Isla Camotes

Bisaya - - Showbiztsika - Ni NEMESIO B. SINANGOTE

“Paradise isn’t a place. It’s a feeling.” — L. Boyer

KADTO pa ko makakita sukad-masukad og bituon nga ingon kasikit nga mibaiid sa Buwan. Sa akong pamatyag bisan sa alkohol nga among nalag-ab, nanghapuhap na sa panit ang katugnaw sa nagkalawom nga kagabhion. Unya kaingnon kog di ra magdugay si Roche ug mosunod ra pod kinig pauli nilang Michael, Joy ug Ann. Pero human ko makakanaog sa motorsiklo, gipuwesto man nuon sa bigatlon ang sakyanan balik sa giparkingan niini kaganina sa dayon namong gikan padulong sa baylehan.

“Di pa diay ka mopauli, Day? Lawom na bayang gabii,” matod ko samtang nagtan-aw niya nga mipahiluna sa motorsiklo.

“Kay ngano man diayg lawom, Nemz, hadlok kag malumos kos gabii?” ug natakdan ko sa pinugngan niyang katawa. “Bitaw, ganahan pa kong maminaw sa imong mga kanta. Unya mao sad niy ako, di dayon ko katulog kon mapingis sa tagay bah,” daklit nga gipiyong-piyong sa maanyag ang iyang mga mata samtang gidaitol ang tuong palad sa iyang agtang dayong pinabarag ang hinay nga lakang ug misandig sa akong abaga. Nasingo ko na sab ang humot niyang gininhawa.

“Aw, tua pa man diay red wine sa among room, Day, kon ganahan ka, ato tong tiwasog inom,” matod ko nga kalit nakahinumdom nga may bawon man diay ming usa ka botelyang Novellino nga gitagoan sa akong bakpak ganinang buntag dihang giingon nga pabayron mig corkage fee kon magdalag pagkaon ug ilimnon sa among pag- check in sa hotel.

“Sige, kana nuon da, unya dad-a pog apil imong sista, Nemz,” milabhag sa sanag nga kagabhion ang laing madanihon niyang pahiyom.

Dihadiha, hilom ming namalik og agi atong sekretong pultahan sa kongkretong koral nga gipandongan sa naglabong nga bombil pasulod sa hotel. Daw sagol dagan ang akong linaktan nga nagdaling mipaingon sa lawak aron pagkuha sa ilimnon ug sista. Ilawom sa akong dughan, ambot naunsa to nga diha man gyoy pagbating nagyapayapa nga di ko gyod masabtan. Si Roche mipaingon diretso ngadto sa dapit sa baybayon nga among gipuwestohan

ganina sa sayong gabii. Paglabay ko sa may swimming pool, duna pay pipila ka paresang langyawng hikot nga parayganayng nanaghumol sa tubig.

Sa akong pagbalik og gawas sa lawak nga dala na ang botelya sa red wine ug sista, naabtan nakong nagyaka ang batan-ong maanyag sa puting ba’s sa baybayon samtang nagkalingawg itsa-itsa og gagmayng bato ngadto atong lim-aw-lim-aw sa may hunasan. Sa akong banabana, padu’ng nang mobalik sa taobon ang dagat.

“Ikaw lay ganer, Day, ha, kay ako may mangharana,” nagngisi kong midunol kang Roche sa duha ka basong disposabol ug botelya sa ilimnon. Unya mipaluna kog yaka pod sa ba’s tupad niya.

“Ow bah, way problema na basta kon unsay akong i- request kantahon dyod nimo ha,” giipisan niya sa ilimnon ang duha ka baso. Unya gidunol niyag balik ang usa ka baso nga hapit himabaw ang sulod.

“Cheers, Nemz, sa panagkaila!” giisa ni Roche ang may sulod niyang baso.

“Cheers, Day, alang sa wa damhang tagay!” ug nagpingki ang duha namo ka baso dayong dungan og yarok sa red wine.

Mipasahe ko sa sista. Si Roche miipis gilayon sa duha ka nabasiyong baso. Gituyo ko pagpasahe ang kantang “Hahaha Hasola” nga giawit ni Kurt Fick kay kabalo kong maka- relate si Roche ining kantaha kay sikat man kaayo ni ron sa mga batan-on. Ug misugod ko pagsing-al…

“Maayo pa sa akong mga damgo / Aduna pay ikaw ug ako / Oohh kon mao man gani maypa matu’g kog balik / Pukawa ra kog buwag na mo…” nabatyagan nakong nalingaw sa hilom si Roche nga way tingogtingog nga mipauyon-uyon sa iyang ulo agad sa hinayng tempo sa awit samtang nagkupot sa botelya ug baso. Nagkabugnaw pa ang hangin gikan sa dagat. Mihunat ko alang sa ikaduhang estansa…

“Kuyog-kuyog pa ko ninyong duha / Sungog-sungogon ka / Pa “as if” nga gikilig /Apan diay nagsakit…” dinhi wala na kapugong si Roche. Gibutang niini sa ba’s ang gikuptang baso ug botelya unya gihapakhapak sa duha ka palad ang iyang tuhod silbing nagtambol-tambol ug andam modungan nako sa korus. Ug nagdungan mi…

“Di ta uyab / Walay ikaw ug ako / Apan kon magselos ko ayaw pagbuot / Sige na lang ta anig hahaha katawa / Hahaha hasola ning kahimtanga..”

“Selos nga lisod gyod kapugngan / Labaw nag siya ang imong kauban / Ngano mang mahadlok kong mawa ka / Nga wa man gyod tika maakoa / Maong sorry na wa ko gyod damha akong dakong sala / Na-fall ko nimo doh, promise di na gyod maotro kay..”

“Di ta uyab / Walay ikaw ug ako / Apan kon magselos ko ayaw pagbuot / Sige na lang ta anig hahaha katawa / Hahaha hasola ning kahimtanga..”

Nahuman ang kanta nga si Roche nakita nakong puwerte gyong lingawa. Gumikan sa pag-awit niyag dungan, sugot na nuon ko nga okey ra bisan pag magbuntagay ming duhag kinantahay. Human mayarok ang ikaduhang tagay, mipasahe ko alang sa ikaduhang kanta nga “Atik Ra” ni Jacky Chang nga usa sab ka Bisaya pop hit song. Ug…

“Magkatawa kong maghunahuna / Nganong naglisod kog move-on nimo sa una / Di ba limtanon man gyod unta ko / Ambot og naunsa to di gyod ko kalimot nimo…/ Apan karon nabag-o na / Ballpen man gani mawala / Feelings pa kaha…”

“Ada, ayawg tiwasa nang kantaha, Nemz, uy!” mosirit na unta kos korus dihang mipakgang si Roche.

“N-Ngano man, Day, unsa diay naa anang kantaha?” nagngisi kong mitan-aw niya. Unya giyarok nako ang sulod sa baso.

“Nah, atay ra gyod tinuod nang gugma-gugma. Bitaw, atik bitaw kaayo ning mga lalaki bah,” misamot nag kayungit ang linitokan sa maanyag. Giyarok niya ang sulod sa gikuptang baso.

Wa koy interes nga mokuti pa nganong di siya ganahan sa ikaduhang kanta. Apan gumikan tingali sa nainom, naligas ang iyang pagyawit ug wa damha nga iyang nasugid nako ang nasinating kapait ug kahapdos sa una niyang gugma. Sa palibot, gianam na gyod pagbuyok sa alkohol ang akong panan-aw.

“Sige lang, Day, di na lagi na hapdos ug sakit ang sunod,” tiaw ko dayong yarok na sab sa sulod sa baso.

“Buang, ay,” kalit gikusig hugot ni Roche ang akong kilid ug mitungab sa iyang baso. “Amaw man sad diay ka, Nemz, no,” ug minglanog na pod sa mamingawng baybayon ang gawasnon namong katawa nga daw nakighagwa sa kasikas sa pinong mga bawod didto sa unahan nga buot mohalok sa nagpadaylang nga bilahan sa hunasan.

Mipalain kog sing-al og bisag unsa na lang tong mga awita. Wa na ko kahinumdom kon ikapila na to namong pingki ug tungab sa baso, pero wa sab ko kalimot sa uban namong gipangkanta sama sa “Pasabta Ko” ni Kuya Bryan, “Ayaw Pagsaad” ni Edgar Butalid, “Sugta” sa Apos Tuhod, “Wonderful Tonight” ni Eric Clapton, “Your Love” sa Alamid, “Just A Kiss” ni Lady Antebellum ug daghan pa.

Hangtod nga nabantayan nakong wa na maggunok si Roche. Nakatulog ba kaha siya, o ambot ba, basta kay nagpiyong iyang mga mata samtang ang ulo gisalay sa akong abaga. Misamot kahumot ang iyang gininhawa. Gibutang nako ang sista sa ba’s. Hinay nako siyang gipukaw aron mamauli na. Apan imbes momata, gilikos na hinuon niya sa akong hawak iyang mga kamot.

“Aykog biyai, Nemz, bah,” mao ray iyang nalitok dihang gipukaw ko unta siya.

Pero imposible pod nga siya natulog o katulgon ba kaha. Kay nagpiyong tuod iyang mga mata pero iyang duha ka kamot nahimong lihokan nga daw naa siya sa dakong lawod nga hapit na malumos ug nagpangapkap og lig-ong tuod nga sarang unya niyang kahawiran sa iyang pagkaanod sa dagkong bul-og sa mga balod.

Gumikan tingali sa daghang nainom mao nga inanay pod kong nawad-ag kusog. Daw diha sab ko taliwala sa dakong lawod nga bisan nakog unsaon maanod gyod ko sa nagkakusog nga bul-og sa dagkong mga balod. Mao nga nahimo pong lihokan ang akong mga kamot. Daw nagpangita og laing linaw nga sarang kalangoyan alang sa seguradong kaluwasan.

Morag giganoy sa katulogon ang akong mga mata pero sa wa pa ko makapiyong, nakita kong sa di madugay moabot na gyod ang pagtaob sa dagat. Ang laagang mga agukoy nanagdali nang makaabot pagsulod sa ilang mga pinuy-anan samtang di pa hingpit nga banwasan sa tubig ang kaganina nag-ugang hunasan. Apan may duha ka bugoyng agukoy nga nasiplatan kong daw nagdudakpanay paingon sa ilang balay ug ambot unsay nakaon sa usa nga imbes modiretso, takulahaw kining nag-atras-abante pasulod-gawas sa puwerta sa usa ka lungag. Sa unahan, nagdayak ang nagkakusog nga kasikas sa mga balod nga sa di madugay ang lapyahan hingpit na gyong takyapan sa taob.

Pagkabuntag, wala koy gana nga mibiya sa hotel. Wala nako makita nga mi- duty ang batan-ong maanyag. Mao nga wala na sad ko maeksayt nga moadto pa sa ubang laaganang tourist spots sa isla. Ang akong hunahuna nahabilin didto sa baybayon. Sa mga bugoyng agukoy sa hunasan. Ug sa puting ba’s sa lapyahan nga nindot kaayong yak-an uban sa mga awit nga bisan ang gabii walay pakabana kon ang linya mayungit nimo pagyawit.

Sa dayong biya sa isla balik sa Sugbo, sa akong hunahuna nagduwaduwa si Nang Eda ug Noy Otek nga malipayon kaayo sa ilang panaghadla.—

Ang matahom nga bukana sa Santiago Bay.

Ang kalipay anaa ra sa pagbasa-basa daplin sa Santiago Bay uban sa bugnawng serbesa.

Ang tagsulat sa Bojo Rock, usa sa dapit nga ginadugok sa mga turista nga nahimutang sa San Francisco, Isla sa Camotes.

Newspapers in Cebuano

Newspapers from Philippines

© PressReader. All rights reserved.