BAG-ONG KAPITOL TUKORON ALANG SA BAG-ONG PROBINSIYA

Bisaya - - Showbiztsika - Ni EDUARDO P. MONREAL

GIPAHIGAYON kaniadtong Hunyo 8, 2018 ang seremonyas sa “Groundbreaking” alang sa pagtukod sa bag-ong kapitolyo sa probinsiya sa Davao Occidental. Ang maong probinsiya maoy ikakawaloag usa (81st) ug labing bag-o nga probinsiya sa Pilipinas. Ang lungsod sa Malita maoy nahimong kapital sa bag-ong nadeklarar nga probinsiya.

Ang probinsiya sa Davao Occidental gitipak gikan sa kinatibukang probinsiya sa Davao del Sur. Sa iyang paglahi, dala niini ang lima (5) ka lungsod nga mao ang Don Marcelino (DonMar), Jose Abad Santos (JAS), Santa Maria, Sarangani ug Malita.

Si Eduardo “Danding” Cojuangco nga tag-iya sa San Miguel Corporation adunay 800 ka ektarya nga pang-agrikulturang yuta sa maong dapit, diin 30 ka ektarya niini iyang gihatag nga libre sa

pangagamhanan sa probinsiya sa Davao Occidental.

Aron masugdan gilayon ang gambalay sa bag-ong kapitolyo, si Senador Manny Pacquiao migahin og 200 milyones ka pesos alang lamang niini.

Si Gobernador Claude Bautista sa Davao Occidental namahayag nga ang maong gambalay tipik sa programa ni Presidente Duterte nga “Build, Build, Build” aron maserbisyohan pag-ayo ang mga lumulupyo sa maong probinsiya. Dugang niyang pangandoy nga ang Malita mahimo ra unyang “City of Endless Possibilities” tungod sa daghang mga proyekto nga

gikatakdang buhaton para sa probinsiya. Ingon pa ni Gobernador Claude nga aduna nay dunggoanan sa barko nga gihimo sa kasamtangan diin si Presidente Duterte mibubo og 100 milyones alang niini.

Ang Guest Speaker sa maong okasyon mao ang abogada nga anak sa presidente nga si Inday Sara Duterte-Carpio, kinsa maoy mayor sa Siyudad sa Davao. Sa iyang pakigpulong sa entablado, mibutyag si Mayor Sara nga madasig siya kon makasuroy og mga lungsod o siyudad nga adunay giusa nga gambalay sa gobyerno tungod kay sa hiniusa nga pagkabutang niini ang mga tawo dili na moadto og layo sa pagproseso sa ilang papeles tungod kay anaa na man kini sa usa ka dapit.

Lanog ug dugay napawong ang katawa sa katawhan dihang milakbit si Mayor Sara sa babayeng mihalok sa iyang amahan didto sa Korea. Ingon pa niya, ang maong hitabo nakahimog kasamok tali ni Mocha Uson ug Kris Aquino. Dugang pa niyang estorya nga basin sulatan niya ang PMS kun Presidential Management Staff nga kon naay lakaw ang presidente nga susama niini, mokuyog siya aron mapakgang ug di na mausab ang paghalok sa iyang amahan. Mingsamot kabibo ug kalanog ang katawa sa katawhan nga nalingaw ni Mayor Inday Sara.

Sa seryosong bahin, si Inday Sara nag-ingon nga ang iyang pagbisita sa Davao Occidental aron usab magpasalamat sa katawhan nga mingsalig ug mingbotar sa iyang amahan sa miaging piniliay.

Ang Davao Occidental suroyanan usab sa mga turista tungod sa iyang matahom nga mga lapyahan ( beaches), mga langob ( caves) ug mga busay ( waterfalls). Ang probinsiya giuwang lamang sa dagat sa North Sulawesi, Indonesia. Gipuy-an kini sa nagsagol nga tribu sa B’laan, Tagakaulo, Muslim, Aeta, Manobo, Maguindanao, Bagobo ug Sangil.

Gitapos ang maong okasyon pinaagi sa paghatag og puhunan gikan sa provincial government ngadto sa mga asosasyon sa maong dapit aron masugdan ang proyekto nga ilang naduso aron mahatagan og pundo.—

Mga sakop sa nagkadaiyang tribu sa Davao Occidental misaksi sa makahulogan nga okasyon.

Ang representante sa usa sa mga grupo midawat sa dakong cheke isip simbolo sa paghatag sa tseke nga nagkantidad og dos milyones ka pesos (P2,000,000).

Ang “interview portion” sa taga media kang Governor Claude Bautista ug Davao City Mayor Sara Duterte-Carpio.

Mga lider sa nagkadaiyang tribu minggahin og pag-ampo alang sa pagsugod sa programa.

Si Davao City Mayor Sara Duterte – Carpio uban kang Davao Occidental Governor Claude Bautista og mga opisyales sa probinsiya. Likod sa entablado makita ang bahin sa kalasangan sa Davao Occidental.

Nagpahulagway ang opisyales sa Davao Occidental kauban si Davao City Mayor Inday Sara Duterte-Carpio human sa pagtabon sa kapsula.

Si Gobernador Claude Bautista miplastar sa kapsula aron kini isulod na sa bangag.

Ang Obispo sa Malita mibendisyon usab sa bangag diin ihulog ang kapsula nga gisudlan sa plano sa gambalay nga tukoron.

Itlog ug pagkaon. Halad sa mga lumad ngadto sa tag-iya sa Kinaiyahan aron hapsay ug malinawon ang maong okasyon.

Newspapers in Cebuano

Newspapers from Philippines

© PressReader. All rights reserved.