Sa Kabukiran, Layo Ang Kasakit...

Bisaya - - Pangunahing Pahina - NI JOSE ALLENDE

KANANG magsud-ong ko sa bukid, ang una nakong makita mao man ang iyang kamalinawon. Ang wala maangay niyang mga linya, ang kurba ug banghatay sa iyang taluktokan, ang mga dulhogon ug tagaytay, ang dalan-dalan sa mga mangatkatay— kining tanan maisip nga tipik sa iyang kamalinawon. Dako ning tamparos sa ideyal nga heyometriya ni Euclid. Dili mosalir dinhi ang abilidad ni Pythagoras. Sa igo-igong gilay-on, ang kakahoyan mawala sa panan-aw ug maoy makita ang linya sa kabukiran. Sa ato pa, ang kabukiran mao ang hiniusang dagway sa gilay-on. Ang kabukiran morag tiguwang nga magtutuo nga nagyukbo kanunay sa iyang diyos.

Kon naa may butang nga labing romantiko, kini mao ang bukid. Tingali, tungod kay ang bukid maayong himoong sumbonganan sa atong mga kasilo ug kahiubos. Ang bukid may dunggan nga andam maminaw sama sa usa ka suod nga higala. May mga maymay sa kabukiran nga madungog lang diha sa dagayday sa sapa, sa awit sa kalanggaman, sa kapa-kapa sa kadahonan, sa inga sa kabaw, sa kabuotan sa mag-uuma nga nagtanod sa iyang buluhaton, sa kadalisay sa hangin, sa gugma nga ihunghong sa yamog sa kagabhion. Mao tingali nga adunay katakos sa pag-alim ang bukid sa atong mga kasakit. Busa adunay kamatuoran ang linya sa lumadnong saluma nga nagkanayon: sa kabukiran, layo ang kasakit... ang kalanggaman, ay, nanag-awit...

Lahi ra gyod ang kahilom sa bukid, no. Ako, nagdako man tuod kog siyudad pero mas ganahan man kog bukid jod. Ambot, tingalig sa akong past life, basin taga bukid gyod ko. Who knows...

Bitaw, no. Klaro man. Recurring motif man na sa imong mga sinuwat ang bukid. Kapoy man gyod ang siyudad, uy. Awa ning mga tawo dinhi, ohh, nganong nabuhi man lagi ni sila ug malipayon man lagi gihapon taliwa sa ilang kayano. Aw, ka-relate ko ani nila kay taga bukid man ko gyod. Wala man tuoy kuwarta sa bukid apan ania man sad dinhi ang putli nga kalipay.

Bitaw. Wala man diay sa social media ang kalipay. Stressful pod kaayo ang kinabuhi nato sa siyudad kay sige ra tag gukod sa oras para mabuhi. Mora tag gikontrolar sa di makita nga gahom. Maayo dinhi sa bukid kay di ra ta kinahanglan magpa-pretend. Pero sa workplace nako, di ra man ko motingog baya. Trabaho ra ko and it ends there. Ingon bitaw ko nimo, ikaw ray makasabot pod nako. Mora baya sad kag bukid nga mao ray akong kasultihan sa tanan. Mao na nga kon naay chance, ganahan ko mosuroy og mga lugar away from the hustle and bustle of the big city.

Salamat, langga. Yeah, ang bukid maminaw ra man sa walay paghukom. Prangka ang bukid sa iyang kahilom. Mao nay tinuod nga kaalam. Ali... hug ko nimo kay tugnaw kaayo ang kaadlawon. Awa ohh... hapit na mosubang ang Adlaw.

Sa banghatay sa kabukiran sa Liloan ug Consolacion, Sugbo, malantaw kining talan-awon sa atong hapin. Ang tawhay nga talanawon sa palibot makaaghat og sukot kon nganong minghuhon man ang mga tawo sa buhilaman sa patag. Anaa, nag-ilog ang mga tawo sa patag sa pudyot nga luna samtang sa bukid naglawod ang kaluag nga nagpaabot lang niadtong buot mosinati sa kalinaw sa tinuod niining espiritu ug kahulogan. May mga walog pa gani tingali sa Sugbo nga wala mataak og tawo kay gipuy-an lang sa ihalas nga mga mananap nga ang uban wala pa gani tingali kahinganli o mamatang. Hinuon, matawag sab kinig panalangin kay aron may mga tipik pa ning lalawigan nga magpabiling sangtuwaryo sa kahilom.

Ikaw, binating magbabasa, usa ka ba sa mga nasakitan, biniyaan, o kaha gibatig kapuol sa kinabuhi? Tungas sa bukid ug ablihi ang dughan ug himamata ang gitanyag nga kalinaw sa kabukiran. Paaboton ka niya isip suod nga higala. Ayohon ka niya, maymayan, ug higugmaon sa imong pagka ikaw. Ang tinuod nga higala dili maantigong magluib. Ang bukid ray tinuod nga makasabot kanimo. —

Newspapers in Cebuano

Newspapers from Philippines

© PressReader. All rights reserved.