OSMEÑA PEAK SA DALAGUETE, CEBU

Bisaya - - Balaod ug Kamatuoran - NI M. ARMAN, USJR

MGA trabahante o empleyado sila sa usa ka inilang fast food chain. Kaniadtong Mayo 26-27, ilang gipahimuslan ang ilang bakasyon sa dihang temporaryong giundang ang operasyon sa ilang gitrabahoan nga nahimutang sa duol sa merkado publiko sa Dakbayan sa Lapulapu kay gi- renovate.

Napulog duha silang tanan— sila si Rian Joseph Mañus, Maria Inoc, Chrisia Icoy, Gycar Fermin, Carla Baguio, Jacquiline Lufrangco, Rosito Daligdig, Niña Vidad, Reimon Brown, Vic Pasumala, Mylan Daganasol ug Jumer Carbo. Nagkasabot sila nga mangadto sa Brgy. Mantalungon, lungsod sa Dalaguete, lalawigan sa Sugbo diin atua nagpuyo ang ilang team leader nga si Noriel Diton aron sab nga pinaagi sa ilang pag- bonding-bonding sa dapit sa ilang team leader masuod silag maayo niini.

Gawas pa, nasibot ang grupo sa pagsuroy-suroy ug paghugoy-hugoy sa Osmeña Peak aron sab pagsuta o pagpangusyoso kon unsa ba gayod kaanindot ang maong lugar nga usa usab sa nabantog nga mga tourist spot sa probinsiya sa Amihanang Sugbo. Daghang mga turistang langyaw ug lokal nga magbisitahan sa maong lugar kay hilabihan gayod kanindot sa mga talan-awon ug bugnaw sab kaayo ang klima.

Ang Osmeña Peak nahimutang ra usab sa Brgy.

Mantalungon, madala rag lakwon gikan sa balay sa ilang team leader. Mga 1,000 meters above sea level ug gitawag kinig highest peak sa isla sa Sugbo. Kabahin kini sa kabukiran sa Mantalungon ug talagsaon o lahi sa ubang mga bukid sa Pilipinas. Aduna sab kiniy mga bungtod nga naglumbay sama sa Chocolate Hills sa Bohol.

Ang nakalahi lang sa Osmeña Peak kay dug-ol ra ang distansiya sa matag peak ug may pagka talinis ang tumoy ug batoon, tandi sa Chocolate Hills. Kon atong tamdan ang mapa sa Sugbo, atong makita nga magkaatbang ra ang Lungsod sa Badian ug Lungsod sa Dalaguete ug medyo natung-an ang Brgy. Mantalungon.

Kon atua ka sa Osmeña Peak, imong makita o malantaw ang kabaybayonan sa amihanan ug kasadpang bahin sa Sugbo ug makita sab ang probinsiya sa Negros Oriental. Hinuon, ang Osmeña Peak gipanag-iya sa usa ka pribadong magpapatigayon. Ginganlan kinig Osmeña Peak isip pagpasidungog sa Osmeña clan nga inila sa Sugbo.

Sa wala pa sila mahidangat sa pinuyanan sa ilang team leader, gikan kuno sa eskina sa Mantalungon, sa ilang pagpanganaog sa Sunrays Bus gikan sa Cebu South Bus Terminal, nanakay silag habalhabal. Tag-P50 ang plete sa matag usa kanila. Ug kay 12 man sila ka buok, upat ka motorsiklo ang ilang gipangsakyan, tagutlo kada motorsiklo paingon sa balay sa ilang team leader nga si Diton.

Hapit mag-30 minutos ang biyahe sa habalhabal gikan sa eskina sa

Mantalungon ngadto sa balay sa ilang team leader. Mora kunog tambol nga gisagunson pagbasal ang dughan ni Rian Joseph sa hilabihang kakulba samtang nagdagan ang gisakyan nilang habalhabal kay motakilid kini inigliko-liko, pun-an pa inig-abot nila sa dulhogon ug tungason nga bahin sa sementadong karsada nga nagtadlas sa kabukiran.

Samtang nagdagan ang habalhabal, gipaliraw ni Rian Joseph ang iyang mga mata sa kalikopan ug mibelib kaayo siya sa kanindot sa mga talan-awon diin iya pod kunong nalantawan ang nagkalainlaing tanom ug utanon nga nanaglawod sa kalapad ug kalabong. Nalingaw kaayo si Rian Joseph ug inanay kunong nawala ang iyang kakulba sa dihang iyang nalantawan ang umahan nga adunay mga tanom nga repolyo, sunflower, petsay ug daghan pa. Hangtod nga nahiabot sila sa luho nga balay sa ilang team leader.

Matahom kuno kaayo ang dapit nga gitarokan sa balay sa ilang team leader. Presko kaayo ang hangin. Halayo kaayo og malabogan ang atong panan-aw lahos ngadto sa nag-anago o nagkahanap nga talan-awon tungod

sa walay utlanan nga gilay-on nga giulang lamang sa kalangitan ug kabukiran. Sa dili halayo o sa palibot sa balay ni Diton adunay halapad nga talamnan sa mga repolyo ug petsay. Ug gipanag-iya kuno kadto sa pamilya ni Diton.

Ang grupo nila ni Rian Joseph miestar og usa ka gabii sa panimalay sa ilang team leader. Matod pa niya nga naghingasoy ning tagsulat, labihan kunong tugnawa sa maong dapit ilabi na sa pagkagabii sa ila nang pagpanghigda.

Pagkabuntag, human sa ilang pagpamahaw, nanglakaw sila aron mamagdoy na sa Osmeña Peak. Wala na lang mokuyog kanila si Diton. Ang Osmeña Peak kon lakawon gikan sa ilang Diton, moabot kuno og kapin kun kulang sa 45 minutos. Apan tungod lagi kay pamagdoy o laag-laag man ang tuyo sa grupo, nagkasabot sila nga dili na lang manakay og habalhabal aron makita o masud-ong gyod nilag maayo ang maanindot nga mga talan-awon sa maong dapit.

Daghan pang mga tanaman nga nabaniog sa Dalaguete nga gitawag sab og “Little Baguio”nga wala na masuroy nila ni RJ ug mga kauban tungod kay nag-apas sab sila sa oras sa tingpamauli kay layo pa kaayo ang Dakbayan sa Sugbo. Wala na sila makasuroy sa Strawberry Farm ug uban pa.

Ang Osmeña Peak sa Mantalungon haom niadtong mga mahiligon sa pagbaklay ug pagkatkat sa bukid apan tungod kay ang mga bulan sa Hunyo ngadto sa Oktubre ting-ulan man, kanunayng basa ug dangog ang kabukiran busa mas maayo nga kon gusto silang mag- bonding-bonding didto, iatol lang nila sa unang tunga sa tuig kay tukma gayod sa ilang paglihok-lihok kay ting-init man.

Ang Lungsod sa Dalaguete may gilay-on nga 85 kilometros gikan sa Dakbayan sa Sugbo ug gikan sa Cebu South Bus Terminal, ang biyahe sa bus kapin sa duha ka oras. Ang sakyan nga bus kanang ang ruta Oslob o Bato via Dalaguete. Manaog sa Dalaguete junction. Sakay og traysikol og pahatod sa Brgy. Mantalungon ug gikan didto mahimo rag lakawon ang Osmeña Peak. Pero kon magdali, adunay mga habalhabal.

Sa hilom nakadayeg si Rian Joseph sa ilang team leader nga si Noriel Diton kay bisan og halayo kaayo ang Mantalungon sa Dakbayan sa Lapulapu, nakadesidir gayod si Diton nga manrabaho sa usa ka fast food chain sa Dakbayan sa Lapulapu.

“Kon determinado gayod ang usa ka tawo, bisan unsa pa kalayo basta naglantaw sa “ugma” ilabi na kon anaa kanunay sa iyang panumdoman ang pagsagop sa duha ka pulong— ang “vision” ug “mission”, dili babag ang gilay-on kon gusto ka nga makab-ot ang imong gilantaw o gipangandoy ( vision), kinahanglan gayod nga imong buhaton ang makuting buluhaton o tahas (mission).” Kini ang kanunay nakong ipahinumdom kang Rian Joseph kay mao sab kining prinsipyoha ang akong gisilsil sa akong alimpatakan sukad sa mga gagmay pa sila si Rian Joseph ug Julius Ceasar nga mga salingsing sa among panagluon ni Josephine nga akong kapikas.

Sa pagka karon, si Rian Joseph nagtrabaho sa usa ka fast food chain sa Dakbayan sa Lapulapu ug nag-eskuyla usab sa Philippine State College of Aeronautics sa Mactan Air Base, Dakbayan sa Lapulapu sa kataposang tuig sa iyang kurso nga Bachelor of Science in Information Technology kun BSIT. Ug mao lagi nga sa dihang gi- renovate ang ilang gitrabahoan, wala nako siya pugngi sa dihang miingon siya nga mag- bonding-bonding sila sa Osmeña Peak aron sab nga ma- expose siya og dili kay magmukmok lang sa suok. Maayo man gyod nang makighugoy-hugoy, kon sa mga milenyal pa, bonding-bonding lagi.—

Sa compound sa Osmeña Peak.

Laing anggulo sa ibabaw sa usa ka peak.

Si Rian Joseph (ikaduha gikan sa wala) sa ilang pag-abot sa Osmeña Peak.

Ang repolyohan nila ni Noriel Diton.

Picture taking nila sa ibabaw sa usa ka peak.

Laing talan-awon sa compound sa Osmeña Peak.

Newspapers in Cebuano

Newspapers from Philippines

© PressReader. All rights reserved.