Ayaw lang god mog kaitok sa mga Katolikong sama ni Tatay Digs – hinawayon sa iyang kaugalingong relihiyon

Bisaya - - Balaod ug Kamatuoran - Ni Amelia H. Catarata-Bojo

PASTILAN, ang ako ra gyong masulti mao ni: Ngano man diay og moingon si Presidente Duterte nga “buang nang inyong Ginoo”? Kang kinsa mang baba ang malata kon masuko ang Ginoo nga gihinganlan siyag ingon? Kon masuko ta unya mangyam-id ta niya, dayon atong utok ang kumoton sa Ginoo, nindot na? (Taray, uy. Hehehe.) Aw, pasayloa una kong makiglantugi sab sa akong mga kagupang Katoliko. Catholics, this is for us, kumbaga.

Samoka bitaw, apan unsaon, hait man sab god ang gibuhiang mga pulong ni Tatay Digs batok sa Katolikong Simbahan ug Katolikong edukasyon, igo gyong nakauyog sa ordinaryong mga tumutuo. Ang akong pangutana lang diha mao ni: Ngano bang kay gisaway ta, manaway tag balik? Di ba gitudloan ta nga kon laparohon ang atong walang aping, atong itaon ang atong tuo nga aping? Kon labayon tag bato, labayon natog pan? Nan, kay giyam-iran ta, nganong dili ta magngisi? Mao na, unang palpak: wala katuhop ang atong Katolikong tinuohan sa atong pamatasan. Hehehe.

Dah, manghinaway pod ta ingog wala na nato ginabuhat sa Ginoo nang mga gipangyawyaw ni Tatay Digs sab. Dili ba ang gitudlo kanato kay miingon ang Ginoo nga kon unsay atong ginahimo sa labing menos sa atong mga igsoon (ug silingan), kana ginahimo nato Kaniya? Unya kanang pamentaha, dili diay na pagpahimulos sa kahigayonang makaibabaw kaysa mga menos? Ayna lang ta. Bisan magtutudlong Katoliko ingon ana. Kon naay kahigayonang makapamilok ang mga estudyante, hala, bira. Mao nay pagaingnon kaniadto nga uwatatits. Hehehe. Mao na nganong daghan gradwado, apan walay edukado, bisan kon sa Katoliko pang tunghaan nakagradwar, bisan kon Katoliko pay magtutudlo sa dili Katoliko nga eskuylahan. Sipyat gyod. Maong nangutana si Tatay Digs: “Pari, sus. What have you done except to collect money from the people?”

Maong makaguol sab hunahunaon. Morag wala na tay tarong nga tawo kay bisan mga Katoliko nga mao untay nagsubay sa Simbahan nga gitukod ni Kristo, magsalimuang man gihapon kon mahatagan nag puwesto, kahigayonan ug gahom. Kadto lang si kanhi Chair sa Commission on Higher Education Dr. Patricia B. Licuanan, grabe to ka-Katoliko pod, suod pa gyod kaayo sa mga Heswitang pari sa Pilipinas, apan matayg motubag tog sulat. Di pod mahadlok mobuhat sa ingon bisan kon naay balaod nga nag-ingon nga angayng motubag ang usa ka opisyal sa gobyerno sulod sa lima ka adlaw. Naa diay tinuod nga Katolikong ingon ana? Maong uyon sab ko sa giingon ni PRRD nga walay nahimo ang Katolikong edukasyon sa Pilipinas. Aw, hinuon, ambot lang sab kaha ang dili Katolikong edukasyon, sa? Ngano pod kahang walay nagtuki ining isyuha ni. Puwerte ra bang daghana og mga tulunghaan sa Pilipinas, Katoliko man o dili Katoliko.

Dihay nakapangutana nganong ang Simbahang Katoliko ra say sigehag pukpok ni PRRD? Diha say mitubag nga “kay kinsa man say sigeg panghilabot niya?” Hahaha. Hinuon, duda ko kon ingon niana ba ang dagan sa pangrason ni PRRD. There is more to PRRD than meets the eye, maoy unang leksiyon nga gabansiwag ining hitaboa. Dili sab na ordinaryong tawo si PRRD, uy. Gawas nga dako na siyag kasinatian sa kinabuhi, street smart siya. Kon sa ato pang kinalye nga estorya, maru siya. Kanang maru, sa negatibo nga panahom, maoy atong ginahinga’n sa mga tawong maayo kaayo mopalusot, bahalag mangilad basta makalusot sa usa ka piot nga sitwasyon. Sa positibo nga panahom, puyde sab ning ihinga’n, dala pagdayeg, sa mga tawong kamao mopatuyok sa sitwasyon aron makita ang katag. Mao ni usahay estratehiya sa mga sinsero nga tawo. Mao ni ang kamaru ni PRRD. Dili malalis nga sinsero siya apan bugoy siya. Lahi iyang kaisog. Lahi sab ang kataw-anan alang kaniya. Maong inay maitok ko ining kagubot karon, makakatawa ko. Ingon lagi sa usa nako ka higalang taga Manila, nawala kuno akong pagka siyentista sa paglinaban ni Tatay Digs. Ingon sab nako, mao ganing milaban

ko kay kasabot ko. Siyentista god. Hahaha. Usa lang gyoy matambag nako ini: do not take anything at face value. Sa ato pa, angay lang nga inusapay muna tayo bago lamoy. Hahaha.

Paminaw nako, gawas nga maayo ang panabot ni PRRD sa atong kasaysayan, lawom sab iyang panabot sa misyon sa Ginoo kaniya. Kinsa goy nagtuo nga modaog siya? Maong sakto siya nga posibleng giganahan ang Ginoo nga mapresidente siya. Ubos niana nga pagtuo, makasabot ko nganong grabeng paninguha ni PRRD nga mausab ang panabot sa tawo, labi nas mga Katoliko, bisan kon uban sa maong paninguha mao ang pagnawong-nawong og tulisok niya sa Simbahang Katoliko. Maong dili ko motuo nga balos kini sa Simbahan sa gihimong pagpakahilom niini sa dinaotan nga mga buhat sa mga pari ug mga Katoliko. Gigamit ni niya nga estratehiya aron ta magmata. Tarong nga bugoy man god ming mga Katolikong taga Mindanao ba. Hahaha.

Kon gamitan ni natog Pareto principle, kadto bang 2080 rule nga nag-ingong aron makab-ot ang 80 porsento sa kausabang gihandom, kinahanglang mausab ang 20 porsento sa mga tawo, sakto gihapon si PRRD nganong ang Simbahang Katoliko iyang atakehon. Mabutang nga nagkinahanglan si PRRD og dili momenos sa 20 milyones ka tawong mag-usab kuyog niya aron mausab ang dagan sa kinabuhi sa Pilipinas. Asa siya manghagdaw niana nga 16 milyones ra man ang mingbotar niya? Kay 102 million na man ang kadaghanon natong mga Pilipino karon, nagkinahanglan siyag dugang 5 ka milyon aron makab-ot ang maong kaayohan. Sa ato pa, kay mga 90 milyones man ang mga Katoliko sa Pilipinas, kon ang Katolikong Simbahan ang mokuyog niyang mag-usab, sayon ra gyod tuod niya mausab ang Pilipinas. Sa ato pa, naa nas mga Katoliko karon ang kausaban kon makab-ot ba. Ingnan laging itahan ang pikas aping. Hehehe.

Bitaw, sa tinuod lang, wala gyod koy nakitang daotan sa maong mga pamulong ni Tatay Digs. Si Jose Rizal maoy unang nanaway sa mga gipanudlo sa mga Katsilang Katoliko kaniadto pang 1898. Basaha ninyog usab ang duha ka libro ni Rizal, ang “Noli Me Tangere” ug ang “El Filibusterismo”. Kon wala pa ninyo ni mabasa, apil na tingali nis kakulangon sa atong edukasyon. Apan basaha gani ninyog usab, di ba diha ka kakitag saway nga walay tihik-tihik. Aw, mao tong gipatay si Rizal sa Bagumbayan (ambot nganong gihimong Luneta na ni karon) isip usa ka traydor sa nasod kuno ug sa Simbahan. Kadto maoy klarong pagpahilom sa usa ka tarong nga tawo nga gipaluyohan sa Simbahang Katoliko.

Sumala sab sa mga hisgot-hisgot sa mga panghitabo niadtong unang mga panahon, natukod ang Philippine Independent Church tungod sa kalagot ni Emilio Aguinaldo sa Simbahang Katoliko ug isip usab protesta sa mga Katipunero sa pagpatay sa mga Katsila kang Rizal. Gitukod kini nilang Gregorio Aglipay, usa ka Katolikong pari nga morag pangutok ni Tatay Digs, ug ni Isabelo de los Reyes nga usa ka Katipunero, aron mapitol sab ang pagpanghasi-hasi ug panaog-daog sa Katolikong Simbahan sa mga Pilipino, pari man o ordinaryong parokyano. Aw, mipadala dayon ang Arsobispo sa Manila og taho ngadto sa Roma, maong mimando ang Santo Papa kaniadto nga dili na ilhon si Aglipay. Nah, kon ang Santo Papa kaniadto parehas og pangutok ni Pope Francis karon, gihatagan tingalig medalya si Aglipay. Matod pang Pope Francis, kon nakaila kag hustisya, nakaila kag Ginoo. Maong, depende gyod sab nas lamdag sa panahon.

Ngano tuod nga ikasakit sab nato ang mga pangutana ni PRRD mahitungod sa mga nahisulat sa Bibliya? Kaniadtong 2016 pa lang, miingon nas Pope Francis nga dunay sipyat sa pagkahubad sa Bibliya. Gani, miingon si Pope Francis nga dili angayng tuohan ang estorya ni Adan ug Eba nga ingog usa ka rebelasyon gikan sa Ginoo kay usa lang kini ka metapora nga gigamit sa mga nagsulat sa Bibliya. Daghang nasuko niini kay morag gihimo kuno ni Pope Francis nga morag usa lang ka myth ang Genesis, kanang parte sa Bibliya nga naghisgot kang Adan ug Eba. Nah, nganong mag- wild tang Tatay Digs ingog siyay nag-imbento ining pagpanaway sa atong naandang gituhoan nga posible gyod tuod nga dili mao? Nganong si PRRD ray atong kontrahon, dili apil si Pope Francis?

Hinuon, mas nakauna ko nilang duha. Gabasa tingali na silang duha nako, ba? Hehehe. Kaniadto man god, samtang gatudlo pa kog chemistry ug gapaningkamot nga masabtan intawon sa akong mga estudyante ang mao nga siyensiya, usahay dili malikayan nga makapanaway tas atong mga tinuohan. Lisod baya sab ning magsubay kag siyensiya kay makatandi kas kamatuoran niini batok sa mga tinuohan nga gikan kunos Bibliya. Aw, unsaon ta man, makapanghinaway gyod, ug kana si Adan ug si Eba akong unang giinitan. Kon magkatol na akong dila aron manaway, manabi una kos ubang relihiyon ug ingnon nako nga Katoliko ray akong libakon kay Katoliko ko. Panghilabot man sab nako anang mga tinuohan nga wala koy hibangkaagan. Hehehe. Hala ka, karong bag-o, miingon si Pope Francis nga bisan pag naay kagawasan sa pagpahayag, dili ka (ang mga Katoliko kibale) makapangintriga, makapanginsulto, o makayagayaga sa mga tinuohan sa uban. O di ba, sakto kos akong gibuhat kaniadto? Maong sakto sab nis Tatay Digong karon. Ngano ba tuod manghilabot siyas ubang relihiyon nga gakayamukat man ang natarang iyang gidak-an? Hehehe.

Mao nang mangartiyo lagi ta bisan Katoliko ta, ha? Dili tungod kay ganahan ta magsipsip sa Simbahan, magtuo sab tang makasipsip tas Ginoo, ba? Kon nagtuo tang mahilangit ta kay amigo nato ang pari, kon nagtuo tang mailad nato ang Ginoo, nah, basin sakto ang pangutana ni Tatay Digs. Unsay pagtuo natos Ginoo, dungol? Hehehe.—

It is not necessary to believe in God to be a good person. In a way, the traditional notion of God is outdated. One can be spiritual but not religious. It is not necessary to go to church and give money - for many, nature can be a church. Some of the best people in history did not believe in God, while some of the worst deeds were done in His name

-POPE FRANCIS

Ubos niana nga pagtuo, makasabot ko nganong grabeng paninguha ni PRRD nga mausab ang panabot sa tawo, labi nas mga Katoliko, bisan kon uban sa maong paninguha mao ang pagnawong- nawong og tulisok niya sa Simbahang Katoliko.

Newspapers in Cebuano

Newspapers from Philippines

© PressReader. All rights reserved.