Myrtle Sarrosa

Magpakitag Transpormasyon sa “Wander Bra”

Bisaya - - Pangunahing Pahina -

MALIPAYON kaayo si Myrtle Sarrosa karon kay gikan sa pagka housemate sa Pinoy Big Brother ug nailhan nga cosplayer ug calendar girl, mikalit pagsulbong ang iyang ngalan sa show business. Siya na karon si Wander Bra.

Si Myrtle ang midala sa papel nga superhero sa umaabot niyang pelikula nga “Wander Bra” nga gidirehian ni Joven Tan. Matod pa sa dalaga, dugay na niyang pangandoy nga modala sa papel nga superhero sa usa ka pelikula. Mao nga dako ang iyang pagpasalamat sa prodyuser nga misalig ug mikuha niya alang sa proyekto.

Gibutyag ni Myrtle nga dako usab ang iyang pagpasalamat ni Direk Joven nga siya ang gipili nga modalang bida kay kini ang una niyang pelikula nga duna siyay major role. Mao nga bisan og nakahibalo siya nga magsul-ob ra siyag bra, wala siya magpanuko sa pagdawat nga himoong bida sa pelikula.

“Kasi sinabi ko talaga, pag superhero, go ako. Saka gusto ko talaga ang mga fantasy kahit dati pa and dream ko talaga na maging superhero,” pu’ng pa ni Myrtle.

Pagka karon, lingaw kaayo siya sa pagdala sa iyang papel samtang nagshooting sila sa pelikula. Gipahimugatan niya karon nga mogawas ang natural niyang akting ug sa paghimo sa mga action scene.

Gipasabot ni Myrtle Sarrosa nga lahi kaayo ang iyang gidala nga papel sa “Wonder Bra” tandi sa “Darna” ni Liza Soberano. Kay ang nahauna usa ka comedy-fantasy samtang ang naulahi usa ka action-fantasy. Ug iyang gibutyag nga magsul-ob ra siya og bra nga pink, skirt ug leggings.

Busa karon pa lang daghan na ang nag-atang ug naghinam-hinam nga makita ang lahi nga transpormasyon ni Myrtle Sarrosa.

Makauban ni Myrtle sa proyekto sila si Zeus Collins, komedyanteng si Cacai Bautista ug ang aktor nga si Ahron Villena.—

Newspapers in Cebuano

Newspapers from Philippines

© PressReader. All rights reserved.