Mirror Of Fortune

(ANG INYONG KAPALARAN SA OKTUBRE 10 - 16, 2018)

Bisaya - - Tn Balita - Ni Madam Gertrudes-Lee

PISCES – (Pebrero 20 – Marso 20) – Niining semanaha molurang ra ang epekto sa giatubang mong gumonhap. Di ka angayng magpaanod sa imong emosyon. Sangpit sa Ginoo ug ayaw wad-a ang pagsalig sa imong kaugalingon. Makahibalag kag binuhat nga mounong kanimo. Suwerte mong adlaw ang Domingo ug palaran mong numero ang 6, 1, 2. ARIES – (Marso 20 – Abril 20) – Mabihag ka sa katahom sa kinaiyahan sa usa ka bakasyon sa probinsiya. Mabalik sa imong handurawan ang masadyang kagahapon. Makarelaks kag maayo. Moaskil pagbalik ang imong panglawas. Kusog ang imong sex appeal. Miyerkoles ang suwerte mong adlaw ug 1, 9, 8 ang palaran mong numero. TAURUS – (Abril 21 – Mayo 21) – Niining semanaha apson mo nga matapos ang daghan mong gimbuhaton. Ipadaplin mo ang di importante kaayong buhaton. Mosaliat kag lulinghayaw aron pagpaluag sa imong dughan. Lahing abentura sa gugma ang imong masinati. Suwerte mong adlaw ang Biyernes ug palaran mong numero ang 6, 2, 4. GEMINI – (Mayo 22 – Hunyo 21) – Kuhaon ang imong serbisyo isip uska interior designer. Daghan ang mahingangha sa talagsaon mong talento. Di ka angayng maminaw sa mga tsismis sa palibot. Ipadayon mo ang imong pagserbisyo sa simbahan. Makapahigalam ang romansa. Huybes ang suwerte mong adlaw ug 7, 5, 1 ang palaran mong numero. CANCER – (Hunyo 22 – Hulyo 22) – Niining semanaha magnuod ang imong pangagpas. Di mo na lang hatagan og gibug-aton ang mga kasaypanan sa uban. Ipatigbabaw mo ang imong pagka Diyosnon. Ipadayon mo ang imong pagtabang sa kabataan. Di ka kapugong sa imong kahidlaw. Suwerte mong adlaw ang Martes ug palaran mong numero ang 9, 6, 3. CAPRICORN – (Disyembre 22 – Enero 21) – Niining semanaha pangunahan mo ang krusada bahin sa pag-ugmad sa personalidad sa kabatanonan. Agig modelo, buhaton mo ang imong giawhag nga kausaban. Ipakita mo ang kalig-on sa baroganan. Pahinuntan mo ang agni sa kidhat. Suwerte mong adlaw ang Lunes ug palaran mong numero ang 4, 3, 7.

LEO – (Hulyo 23 – Agosto 23) – Mapitol mo na ang kahiwian sa imong kamanghoran. Gamitan mog diplomasya ang pagpanton kaniya. Dupot na kining magtuon sa iyang mga leksiyon. Matuman na ang imong gipangandoy alang sa imong mga anak. Tabunokon ang romansa. Domingo ang suwerte mong adlaw ug 8, 2, 3 ang palaran mong numero.

VIRGO – (Agosto 24 – Septiyembre 23) – Niining semanaha mapukaw ang imong kahinam sa higayong hisaksihan mo ang hubong kinaiyahan. Madasigon kang magtrabaho. Dako ang posibilidad nga matuman na ang imong gitinguha. Sangpit kanunay sa Ginoo. Matamis ang panaghiusa. Suwerte mong adlaw ang Sabado ug palaran mong numero ang 4, 8, ug 6.

LIBRA – (Septiyembre 24 – Oktubre 23) – Motaas ang lebel sa imong kadasig. Daghan kag mahuman nga trabaho. Magustohan ang imong serbisyo. Daghan ang makagusto sa imong bagong disenyo. Madugangan na ang imong kinitaan. Masulbad na ang imong problema. Matagbawon ang romansa. Huybes ang suwerte mong adlaw ug 2, 3, 5 ang palaran mong numero.

SAGITTARIUS – (Nobiyembre 23 – Disyembre 21) – Mahapsay na ang nagkasalinggubot mong eskedyul nga maoy nakapa- stress nimo. Hatagan mog prayoridad ang labing importante. Ipadayon mo ang imong gitinguha nga ikaayo sa pamilya. Di ka mapakyas kay buligan ka sa Ginoo. Ayaw kalimot sa pag-ampo. Dugosnon ang romansa. Suwerte mong adlaw ang Lunes ug palaran mong numero ang 1, 5, ug 9.

SCORPIO – (Oktubre 24 – Nobiyembre 22) – Niining semanaha makadawat kag mapuslanong impormasyon. Magamit mo kining materyal sa imong panukiduki. Mahuman na ang nataligaman mong trabaho. Motaas ang marka sa imong perpormans. Magmadasigon ka tungod sa tumang katagbaw. Suwerte mong adlaw ang Martes ug palaran mong numero ang 7, 1, 9.

AQUARIUS – (Enero 22 – Pebrero 19) – Usisahon mog maayo ang detalye sa sudlan mong transaksiyon. Di ka angayng mokompiyansa kay basig malingla ka. Kinahanglang magmabugnawon ka bisan sa daghang gisagubang nga mga problema. Kusog ang imong karisma. Sabado ang suwerte mong adlaw ug 9, 5, 2 ang palaran mong numero.

Newspapers in Cebuano

Newspapers from Philippines

© PressReader. All rights reserved.