Ang pagsidlak ni Kirby asunto

Bisdak Magasin - - HAN-AY -

SA linghod nga pangedaron nga dos anyos, si Maria Kirby asunto daw nasayod na kon unsa ang iyang paboritong pagabuhaton. Samtang ang mga bata nga susama niya og pangedaron nagduwa sa ilang mga kabalayan ug kasilinganan, ang babaye kansang kagikan taga Inopacan sa Leyte ug Davao, subling nagsumaysumay sa mga awit nga gitukar diha sa usa ka compact disc player sa ilang panimalay. Wala magdugay, misalmot siya og nagkadaiyang singing competitions sa iyang tunghaan diin niya nabaid ang iyang talento sa pag-awit. Si Kirby midaog sa matag singing contest nga iyang gisalmotan. ang iyang sunod-sunod nga kadaogan nabalda lamang sa dihang ang iyang pamilya milangyaw ngadto sa Estados Unidos niadtong 2006. apan bisan pa man kon siya anaa na magpuyo sa usa ka langyaw nga dapit, nagpadayon lang gihapon ang iyang kaikag sa pag-awit. Niadtong 2012, unang naila si Kirby sa dihang personal siya nga gipili sa Pilipinong boxing superstar nga si Manny Pacquiao aron pag-kanta sa Nasudnong awit sa iyang sangka batok ni Timothy Bradley didto sa Las Vegas, Nevada. Human niadto, nagsunod-sunod na ang mga guestings ni Kirby sa Pilipinas ug sa Estados Unidos. Iya pud nga naangkon ang nagkalainlaing mga ganti og pasidungog. Kini naglakip isip Outstanding Filipino-American in New York tungod sa iyang “exceptional talent” sa pag-awit bisan pa man sa iyang linghod nga pangedaron. Si Kirby usab ang nahimong regional and National Champion sa access Broadway Contest didto sa Connecticut, ug ang gikorahan nga Philippine Fiesta Grand Idol Singing Champion sa usa ka competition didto sa Secaucus, New Jersey. Niadtong 2013, si Kirby nahimong kabahin sa Noli Me Tangere the opera didto sa New york, usa ka dula nga gibase sa usa sa mga sinulat sa nasudnong bayani sa Pilipinas nga si Dr. Jose rizal. ang iyang pagdala sa papel nga si Basilio naka-angkon og talagsaong pagdayeg gikan sa the New york Times kansang theater

critic nagkanayon: the young girl “demonstrate(ed) a clear, attractive voice as the altar boy Basilio. ( Ang batan-ong dalaga nagpasundayag og limpyo og matahom nga tingog isip ang sakristan nga si Basilio.”

BEST MUSIC VIDEO

Sa milabayng Oktubre 20, 2016, ang first original song ni Kirby nga gititulohan og “Exist” ang nahimong mananaug sa Best Music Video sa 6th International Film Festival Manhattan. Ang awit mahitungod sa usa ka babaye nga nangandoy sa iyang dream guy gisulat sa mga Sugboanong compositors nga sila si Jude Gitamondoc and Therese Marie Villarante, og gihapsay ni Anjelo Calinawan. Si Kurt Fick ang director sa music video nga gi- shoot sa siyudad sa Sugbo. Sa maong contest, gilupig ni Kirby ang laing duha ka mga contestants kansang music videos nalakip sa top three gikan sa daghang mga entries nga gisumiter sa nagkalainlaing mga participants sa tibuok kalibutan. “It was a tough competition, and winning such a prestigious award made me feel very honored as a Filipino,” matod pa ni Kirby kinsa nanimuyo uban sa iyang pamilya didto sa Linden New Jersey. “The song means a lot to me because it was my first ever single and it has opened many doors in my singing career,” dugang pa niya. Mahimong makita ang iyang music video nga Exist diha sa Youtube pinaagi niini nga link: https://www.youtube.com/watch?v=hDRY wZPLKLM

KABAHIN SA KINABUHI

Si Kirby naila sa iyang limpyo ug mananoy nga tingog. Alang kaniya, ang pag-awit dili lang usa ka buluhaton, apan kini nahimo na nga kabahin og tipik sa iyang kinabuhi. “I think I was given this special gift from God to bring joy and inspiration to as many people as I can. The best thing about singing is being able to meet a lot of fans who I adore because without them, I wouldn’t be where I am now,” sigon pa ni Kirby. Sama sa iyang giidolo nga si Lea Salonga, si Kirby mas nabansay og naanad pag-awit og Broadway songs, apan iyang gipalapdan ang iyang talento pinaagi sa pagkanta og lain matang sa musika sama sa pop and RnB nga maoy uso dinhi sa Pilipinas. Bisan pa man sa iyang mga nakab-ot nga pasidungog, si Kirby wala mahikalimot sa mga tawo sa iyang palibot, lakip na kadtong mga nanginahanglan og tabang. Niadtong 2013, siya lakip sa mga singers nga nagpasundayag og fundraising concerts aron pagtabang sa mga biktima sa kusog nga linog nga mitay-og sa Bohol ug Cebu. Siya usab nag-abag sa mga bata nga adunay cancer didto sa Bahay Aruga sa Manila. Sa ilang pag-abot sa Estados Unidos, si Kirby misulod isip fourth grader didto sa Number 9 Deerfield Terrace Elementary School sa Linden, New Jersey. Aron pagpadayon sa iyang edukasyon, siya nagpa-enrol sa Myles J. McManus Middle School apan sa dihang nagsunod-sunod ang iyang singing schedules, nakadesisyon siya nga magtuon pinaagi og homeschooling. Karon, plano ni Kirby nga mobalik sa Pilipinas aron pagtungha sa kolehiyo og pagtiwas sa iyang pagtuon.

GIKAN SA PILIPINAS

Si Kirby otso anyos pa lamang sa dihang ang iyang inahan nga si Shirley ug iyang lalaking igsuon milangyaw ngadto sa Estados Unidos aron didto na manimuyo uban sa ilang amahan nga si Liberato kinsa una na nga nanrabaho didto. Duha sa iyang mga igsuon nga babaye, kinsa mga minyo na, nagpabilin sa Leyte uban sa ilang tagsatagsa ka mga pamilya. Sa bag-o pa sila sa New Jersey, ang iyang inahan nga si Shirley miundang sa iyang trabaho aron hingpit niya nga matutokan ang pagpadako ni Kirby. Sigon pa ni Shirley, gusto niya mapadako si Kirby inubanan sa mga maayong hiyas nga Pilipinhon. “I had to guide her. I was afraid she would be influenced by unpleasant practices in the U.S. We live and breathe our Filipino values and traditions,” nagkanayon ang iyang palaban apan mahigugmaon nga inahan. Sa pangedaron nga 19, si Kirby mahimo na unta nga mobiya sa iyang banay, mopuyo og laing panimalay, ug magpadagan sa iyang malambuong singing career. Sa balaod sa Estado Unidos, mahimo na pod unta siya nga magminyo bisan pa og wala kini pagtugot gikan sa iyang mga ginikanan. apan kay siya masinugtanon man, ang batanong dalaga nagpabilin sa sabakan sa iyang pamilya, kanunay nga nagsu- nod sa ilang mga pahimangno og kasugoan. “I entrust Kirby’s career to the Lord alongside doing what is expected of us,” matod pa ni Shirley.

MALIPAYON OG MALAUMON

Sa dihang gipangutana kon unsay iyang plano sa umabot, si Kirby nagkanayon nga buot una niya pahimuslan ang tanan nga anaa kaniya karon. Dugang pa sa maanyag nga dalaga, malipayon og mapasalamaton siya sa tanan nga iyang natagamtaman ug wala siya mahadlok kon unsa man ang mahitabo sa umaabot, malaumon nga ipahimutang sa Ginoo ang tanan alang kaniya.

Newspapers in Cebuano

Newspapers from Philippines

© PressReader. All rights reserved.