KRISTO SA SABONGAN, LECHON MAGNATE NA

Bisdak Magasin - - HAN-AY -

Upat, tulo! upat, tulo! Singgit kini sa kanhi masyador o kristo sa mga sabong sa Sugbo nga si Enrico Dionson. Sa wala pa maila ang Rico’s lechon, ilado nang daan si Dionson tungod sa presensya sa tari-an. Apan nausab ang tanan sa dihang iyang gisudlan ang pagnegosyo og lechon baboy. “Wala gyod mi kaliwat nga manglechonay, wala pod ko nagexpect nga modako ni ang ako lang gusto nga dili ko mauwawan,” tipik kini sa pamahayag ni Dionson sa dihang nahinabi sa sakop sa media sa usa sa iyang branch sa Rico’s Lechon sa dalan Escario, siyudad sa Sugbo. Samtang nagpadayon sa iyang pagka masyador, nakahunahuna si Dionson nga mosulod og negosyo gawas sa iyang kinitaan sa pagka kristo. Nagsugod sa paghatag sa iyang calling card si Dionson sa mga kaila niini ilabi na sa mga adunahan aron mopalit sa iyang lechon. Dako usab ang pasalamat niini sa magtiayong Donato ug Rosalina Bosa sa paghatag niini og libre nga calling card sa Bosa Printers nga gigamit

sa pagsugod sa iyang negosyo ug pag-ampo nga molahutay ang iyang negosyo. Sa pagdagan sa panahon, milambo ang lechonan niini ug nagpasalamat usab kini sa iyang mga anak nga misuporta sa iyang negosyo. Tungod sa padayon nga paglambo sa kaniadto Cebu’s Best Lechon nga karon Rico’s Lechon, ang usa ka branch niini nga nahimutang sa Mabolo, Cebu City, napun-an ug duha nga nahimutang sa Mactan ug sa Escario. Ug niining bag-ohay lang, Hunyo 2, 2017 milupad padulong sa nasod sa Japan sila Dionson ug ang sales markerting nga si Jeff Walther Oyas aron personal nga modawat sa Silver award sa Asia-Pacific Stevies Innovation sa Media Relations alang sa ilang nationwide campaign ang #DaBestGyud. Gibanabana nga moabot sa usa ka libo ang nagtigi nga makakuha sa maong award ug mapasalamaton sila nga nakuha nila ang silver award. Personal usab nga mihatag og tips si Dionson alang sa mga buot nga moasenso sa ilang negosyo. Ania ang mosunod:

Tips sa lechon nga GIPALIT

1. Segurado-a nga bag-ong luto ang lechon sa pagkuha sa gipalitan. 2. Inig kakuha sa lechong baboy, ablihi dayon ang putos niini aron makaginhawa. Magpabilin ang kacrispy sa panit sa lechong baboy kon kini mahanginan. 3. Kon dili pa pweding ablihan, gisi-i gamay ang putos dapit sa lubot aron makagawas ang init.

Unsaon aron crispy ang panit sa lechon?

Walay angayang ipahid sa panit. Ang kainiton sa baga sa uling ang naginusarang sekreto aron mo-crispy ang panit sa gilutong lechon. Busa! Ayaw tipira ang uling, aron lami.

Unsay molami sa lechon?

Lamas! Sama sa ahos ug bombay ug saktong timpla sa asin. Ang lamas nga anaa sulod sa tiyan sa baboy maoy magdala og bida sa kalami sa panit niini. Makatabang usab kon imong pahiran ang panit samtang nagluto sama sa tubig sa butong, patis, sprite ug vitsin.

Sekreto SA negosyo ni DIONSON:

1. Dili bintahuso 2. Dili tikasan 3. Matinud-anon 4. Maayo sa kustomer 5. Limpyo ang produkto 6. Hands-on, pasabot mangunay sa pagtan-aw sa negosyo. Makatabang usab kini aron makadungog sa mga yangongo sa mga kustomer ug mapangitaan og solusyon. 7. Dili dalo, pasabot motabang ka sa mga tawo. 8. Padayong yano o simple (makita sa hulagway nga si Dionson bisan adunahan na, nigamit gihapon sa baratuhong cellphone.)

Newspapers in Cebuano

Newspapers from Philippines

© PressReader. All rights reserved.