Lala Burara

Bisdak Magasin - - BATANG BISDAK - ni Deanna Abbie C. Bustamante

Usa ka adlaw niana, gipukaw si Lala sa iyang mama. “Nak, bangon na ug kaligo.”

Iyang giingnan ang iyang Mama nga maligo apan ang tinuod dili siya maligo. Igo ra niyang gibasa ang iyang buhok.

Gitawag si Lala og burara tungod kay hugawan kini. Bisan asa lang ipanglabay ang mga plastic sa iyang gikaon. Dili manrapo ug magkamuritsing lang ang nawong.

Nianang pagkabuntag, niadto siya sa eskuwelahan nga walay panot-brush. Gusto unta niya makigdula sa iyang mga classmates apan gipapahawa siya.

“Ayaw mo’g duol ni Lala kay wa nay kaligo. Hugawan kaayo.”

Tungod sa nadunggan ni Lala, miuli kini sa balay nga naghilak ug misulod sa kuwarto. Iyang gikumot ang mga dahon sa tanom nga anaa sa iyang kuwarto tungod sa iyang kalagot. Nagkuha siya og silhig og iya kining gibunalan.

Apan sa iyang pagbunal ang iyang Mama ang naigo. Nagdugo ang agtang niini. Daling mikuha og panapton si Lala aron tambalan ang samad sa agtang sa iyang inahan.

“Ayaw na lang ko tambali. Mas maayo pa nga maligo ka aron maayo na kining akong samad,” ingon sa iyang Mama.

Daling miadto si Lala sa ilang banyo aron maligo. Ang iyang inahan nagkatawa nga nagtan-aw sa iyang anak nga bag-ong ligo ug humot na kaayo.

Sukad niadto, daghan na ang ganahan makigdula ni Lala ug dili na siya maghugawhugaw.

Kasayoran: Ang kini nga estorya maoy nakadaog sa writing contest sa Bisdakids 2017 nga gipahigayon sa Barangay Apas, siyudad sa Sugbo.

Newspapers in Cebuano

Newspapers from Philippines

© PressReader. All rights reserved.