RIA ATAYDE

Hiligaynon - - Cover Story -

MAGKA-LOVE TEAM gali sanday Ria Atayde kag isa sa mga miembro sang Boyband PH nga si Ford Valencia, sa Wansapanataym Presents: Ohfishcially Yours nga matan-aw kada Domingo sa ABS-CBN, kaupod sanday Ellisse Joson, Nico Antonio, Janice de Belen, kag iban pa nga mga miembro sang Boyband PH nga sanday Joao Constancia, Neil Murillo, Tristan Ramirez, kag Russel Reyes.

Siling ni Ria, enjoy sia sa company sang Boyband PH labi na si Joao. Nagkakilala na kuno sila before paagi sa iya utod nga si Arjo Atayde. Masami kuno niya nga makaupod si Ford. Okey man kuno ini kag quite type. Si Russel naman masinadyahon, Si Tristan funny. Si Niel naman palalahog. Tanan kuno sila okey lang nga kaupod. Ini ang paglaragway ni Ria sa Boyband PH members.

Lahog ni Ria nga basi wala sing maluyag sa iya sa sin-o man nga miembro sang grupo sanglit tanan sila mas lamharon sangsa iya, nga ginsundan sang kadlaw ni Ria. Sang pamangkuton kon ginakilig sa iya si Ford, nagkadlaw lang si Ria dungan siling nga “we’re all good friends.

Isa ka kataw ang role ni Ria sa Wansapanataym Presents: Ohfishially Yours sa direksyon ni Direk Jon Villarin. May role man diri si Elisse Joson nga nagatungod bilang si Stella, isa ka dalaga nga ginadayaw sa iya katahom pero ginakaugtan naman tungod sa iya malain nga batasan. Si Ria naman bilang si Merlina, isa ka suplada nga kataw. Siling ni Ria mabudlay ang role sang isa ka kataw labi na kay pirme sila nagapahulom sa tubig-dagat. Makakalapoy kuno pero enjoy naman sia. Ang pagkakataw kuno daw fantasy na sang kada babae.

Bisan isa ka kataw ang iya role, daw kontrabida man ang gua niya diri. Daw na-type na si Ria sa kontrabida role. Para sa iya, okey lang kuno. Challenging kuno ang role sang isa ka kontrabida. Diri kuno matakos ang kinaadman sang isa ka artista. Ugaling, sa katahom sang iya nawong, daw indi mo makuha nga maakig kay Ria bilang kontrabida. Basi makuha pa niya ang simpatiya sang mga viewers sangsa bida.

Ginpahayag man ni Ria nga luyag man niya nga makagua sa isa ka teleserye sa telebisyon. Kag wish niya nga makaangkon sang madamo nga mga projects karon nga tuig. May plano naman ang ABS-CBN para sa iya. Hopefully, mangin matahom kuntani ang dalagan sang iya career karon nga tuig.

Kon inyo madumdoman, nakagua naman si Ria sadto sa My Dear Heart, nga dungan pa nga nag-ere ang serye sang nanay niya nga si Sylvia Sanchez (The Greatest Love) kag sang iya kuya nga si Arjo Atayde (FPJ’s Ang Probinsyano).

Nakagua naman sa Maalaala Mo Kaya si Ria kag nagdaog bilang Best New Female Personality sa nagligad nga Star Awards for TV kag naggwa naman sia sa Ningning bilang Teacher Hope kag nalakip man sa ika-100 episodes sang Ipaglaban Mo sang nagligad nga tuig. Bisan kuno nga nakagua naman sia sa teleserye, pero pirme sia nga nakabatyag sang pressure sanglit maayo gid man nga artista ang iya mommy kag si Arjo. Wala naman kuno sia ginapahilabti sang duha, ang ginahimo lang nila nga gina-guide sia. Madamo man ang nagasiling nga maabot gid ang husto nga panahon para labi sia nga magsikat sa iya career.

Makita sa mga projects karon ni Ria nga labi nga nagatahom ang dalagan sang iya showbiz career. Matapos nga magdaog sia sa iya una nga acting award sa 30th Star Awards for TV sang Philippine Movie Press Club (PMPC) bilang Best New Female TV Personality para sa maayo niya nga performance sa MMK (Puno ng Mangga) episode, nagsunod-sunod na ang pag-abot sang iya mga projects. Palatandaan lang ini nga on the right track sia sa iya showbiz career.—O

Newspapers in Tagalog

Newspapers from Philippines

© PressReader. All rights reserved.