SANYA LOPEZ

Hiligaynon - - Cover Story -

EXCITED si Sanya Lopez sang sia ang mapili nga mangin leading lady sang duha ka sikat nga actor sang Kapuso Network. Ini sanday Kapuso Primetime King Dingdong Dantes kag Kapuso Drama King Dennis Trillo, nga magaupod sa isa ka serye nga may tig-ulo nga Cain at Abel. Ginpahayag sa presscon nga sugdan na gilayon ang taping gani sobra ang kakunyag ni Sanya sanglit mangin leading lady sia sang duha ka pinakasikat nga actor sang local showbiz. Handa naman kuno sia kon ano ang matabu sa mga eksena niya sa duha, kag subong man sa mga bashers nga mag-bash sa iya, labi na ang diehard fans ni Marian Rivera nga misis ni Dingdong kag subong man ang mga fans sang girlfriend ni Dennis nga si Jennylyn Mercado. Apang para kay Sanya, trabaho lang ang iya kag indi na niya pagbuy-an ang oportunidad nga makapareha ang duha ka iconic actors sang GMA-7. Siling ni Sanya, isa kuno ini ka once in a lifetime opportunity para sa iya nga bag-uhanon pa lang sa showbiz. Basi kuno indi na liwat magaabot sa iya ang amo sini nga klase sang opportunidad. Mahangpan naman kuno sang mga fans nga trabaho lang nila nga mga artista ang ginahimo nila and nothing more. Isa si Sanya sa fast rising leading ladies sang GMA-7. Pila naman ka mga serye ang iya napasakupan umpisa sa show nga “Walang Tulugan with the Master Showman”, sa The Half Sister kon diin sia natalupangdan kag nahatagan sang daku nga break bilang si Sang’gre Danaya sa remake sang Encantandia. Matapos ini nangin bida gilayon si Sanya sa afternoon teleserye nga “Haplos” nga nangin top-rater. Nakaagom naman sang madamo nga mga award si Sanya, lakip na diri ang Huwarang Artista ng Taon para sa mga kabataan, kag ang German Moreno Youth Achievement Award gikan sa FAMAS 2016. Ang iban pa nga cast sang Cain at Abel amo sanday Ronnie Henares, Chanda Romeo, Boy 2 Quizon, Soleen Heussaff kag iban pa. Samtang magkapareha naman sanday Sanya Lopez kag Derrick Monasterio sa bag-o nga pelikula nila nga may tig-ulo nga “Wild and Free”. Sa mga nakakita sang trailer sini, sobra kuno ka intense sang kaseksihan nga ginpakita sang duha. Madamo ang nakadayaw sa duha sanglit pinasahi kuno ang role nila diri kon ikumparar sa kinaandan nga ginahimo nila sa telebisyon. Madamo man ang nagsiling nga bagay sila nag nakakilig kuno ang ila chemistry. Gani karon pa lang, madamo na nga mga fans ang nagahulat sang playdate sang “Wild and Free.” Ayhan luyag pa nila makita kon ano pa nga mga pasabog ang himuon sang duha sa kabug-osan sang pelikula. Maga-guest man gani si Sanya sa serye ni Alden Richards nga Victor Magtanggol. Ang mga sang’gre sa Encantadia ginkuha nga mag-guest sa Victor Magtanggol, gani lauman nga labi nga mangin makalilingaw ang adventure ni Victor Magtanggol. Sini nga tuig daw lucky year ni Sanya sanglit daw wala sia ginakawad-i sang project. Sang una pa-extra-ektra lang sia, karon sia na ang bida. Mga matahom pa nga mga project ang ginahatag sa dalaga, pareho gani sining Cain at Abel kag “Wild and Free.”—O

EXCITED SA IYA BAG-O NGA SERYE NGA CAIN AT ABEL

Newspapers in Tagalog

Newspapers from Philippines

© PressReader. All rights reserved.