BEA ALONZO

Hiligaynon - - Cover Story -

DAW isa ka dalamguhanon nga nagmatuod para kay Bea Alonzo nga makatrabaho si Aga Muhlach makaligad ang 16 ka tuig niya sa showbiz. Gani sang tawgan sia sang actor agod silingon nga mahimo sila sang pelikula, sobra ang iya excitement.

Siling ni Bea, paano naman sia mamalibad, kay dalamguhanon na niya halin pa sadto nga makatrabaho si Aga Muhlach. Napinsar gani niya nga ayhan wala na sang tsansa nga makatrabaho niya si Aga kay hingalit nga nagpahuway anay ini sa paghimo sang pelikula agod atubangon naman ang pagtatap sang iya pamilya kag iban pa nga mga huyog sini sa pangabuhi. Nakatrabaho na kuno ni Aga ang iban nga mga artista nga kadungan lang niya sa iya henerasyon subong nanday Angelica Panganiban, Angel Locsin, Anne Curtis kag iban pa. Sa pamatyag niya ini na ang perfect time kag perfect project sa ila pag-updanay ni Aga.

Sa sobra kuno nga respeto ni Bea kay Aga, lain-lain naman ang tawag niya diri, kon kis-a Kuya Aga, kon kis-a Doc Aga (bangod sa karakter sang actor sa serye sadto nga Oki Doki Doc). Indi niya kuno mahibal-an kon diin sia maglugar, kay nahuya kuno sia. Kon kis-a, pormal nga Mr. Aga Muhlach ang tawag niya diri.

Sa Vancouver, Canada ang entire shooting sang pelikula nila nga First Love kag naglab-ot sila didto sing halos isa ka bulan kag didto nadebelop ang maayo nila nga pagtamdanay. Tungdan diri ni Bea ang karakter ni Ali, nga nagakinahanglan sang heart transplant kag kinahanglan nila nga magkadto sa Canada agod magpaopera kaupod ang nanay niya (Sandy Andolong) kag utod nga si Albie Casino.

Happy go lucky si Ali, kag wala sini ginapinsar ang problema nga ginaatubang niya, pero nagahulat sia kon sin-o ang maga-donate sang heart para sa iya.

“Perfect match ang kinahanglan nga tagipusuon. And then I met this guy first time whom I started dating,” salaysay ni Bea sa tungdan niya nga role. Gin-aku man ni Bea nga adlaw-adlaw ang shooting nila sang First Love pero wala sia reklamo kag excited pa gani sia kay masadya kuno sila sa set. Daw nagabakasyon lang kuno sia. Indi kuno sila naga-shoot sa mga tourist spots kundi sa mga local places nga sing masami sa mga coffee shops.

Kag sa first shooting day nila, nakaeksena niya gilayon si Aga, gani sobra ang iya excitement.

Samtang, nadayaw man ni Aga Muhlach si Bea Alonzo. Siling ni Aga, dekalidad kuno ang pagtungod ni Bea. Sadto pa man ginapakot na ni Aga nga mangin isa ka maayo nga artista si Bea sadtong nagasugod pa lang ini sa showbiz. Kag sang nakilala na sing husto si Bea, amo kag nangin inactive na si Aga sa showbiz bangod priority na sini ang iya pamilya. Apang sadto pa man, napakot na ni Aga nga malayu ang maabot ni Bea sa showbiz.

Kag wala sia magsala, sanglit amat-amat nga nakilala si Bea sa kalibutan sang mga artista tubtob nga gintawag sia sang Star Cinema nga newest movie queen.

Tatlo ka production company ang nagbulolig agod mabug-os ang movie nga First Love. Ini ang Ten17P ni Paul Soriano, Viva Films kag Star Cinema. Sanday Direk Paul kag Aga ang nag-umpisa sa project nga ini nga naglab-ot sa isa ka tuig ang pagsulat sang script sini.

Sa estorya, daw may balatian ang karakter ni Bea. Pero indi man masyado nga maathag kon ano, may twist sanglit misteryoso man ukon may something man sa karakter ni Aga.

Daw gloomy ukon tear-jerker ang First Love. Ang matuod nga sa dubbing pa lang, nakahibi na si Aga. Siling niya, ini nga sahi sang pelikula ang luyag niya nga himuon. Siling ni Aga, luyag niya nga nabatyagan n i y a ang karakter kag tunay nga emosyon ang ihatag niya sa mga moviegoers.

Ano naman ang impression niya sa una nga pagtrabaho niya kay Bea? Nasiling kuno niya sa iya misis nga indi sia matingala kon maka-grandslam sang best actress awards si Bea sa pelikula nila nga

ini.—O

NANGIN MATUOD NGA DAMGO PARA SA IYA ANG MAKAPAREHA SI AGA MUHLACH

Newspapers in Tagalog

Newspapers from Philippines

© PressReader. All rights reserved.