HANDA NGA PATULOGON SI BRONER SA 7TH ROUND

Hiligaynon - - Balitang’ Sports -

GINPABUTYAG ni WBA welterweight champion Manny Pacquiao nga padayunon niya ang iya “knockout streak”, nga naumpisahan sa pagpatulog niya sa 7th round sa Argentinian nga si Lucas Matthysse sadtong Hulyo 15, sa Kuala Lumpur, Malaysia.

Sa iya nagahilapit nga sambuwa sa Enero batok kay fourdivision world titlist Adrien Broner sa Las Vegas, Nevada, nangako si Pacquiao nga patulogon niya ang Amerikano bag-o mag-abot ang 7th round sa ila WBA welterweight title bout.

Wala pa malutos si Broner via stoppage, kundi sa puntos lang batok kanday Marcos Maidana sang Argentina para sa WBA welterweight title sadtong 2013, WBC welterweight titlist Shawn Porter sadtong 2015, kag WBC kag IBF super lightweight champion Mikey Garcia sadtong 2017, gani madamo ang nagasiling nga mabudlayan si Pacquiao nga patulogon ang Amerikano.

“If I can finish it earlier than seven rounds, why not,” Siling ni Pacquiao sa Boxingscene.com.

Ang sambuwa nga ini ang ginalauman nga magahatag sang kahigayunan sa liwat nga pag-atubangay sa ibabaw sang ring nanday Pacquiao kag retired undefeated champion nga si Floyd Mayweather Jr. sa Mayo.

Naglagda na si Pacquiao sang kontrata sa adviser ni Mayweather nga si Premier Boxing Champions founder Al Haymon, nga adviser man nanday Broner kag world welterweight champions Errol Spence Jr., Shawn Porter, kag Keith Thurman.

Ulihi nga sambuwa ni Pacquiao sang Hulyo 15, sa Kuala Lumpur, Malaysia, kon diin napagkit niya ang una niya nga KO makaligad ang siyam ka tuig matapos nga patulogon si WBA titlist Lucas Matthysse sang Argentina. Ulihi naman nga sambuwa ni Broner batok kay anay WBO welterweight champion Jessie Vargas sang US nga gin-agawan ni Pacquiao sang titulo.

May record si Pacquiao nga 60-7-2 nga may 39 ka daog paagi sa knockouts. Samtang may kartada naman si Broner nga 33-3-1 nga may 24 ka daog paagi sa knockouts.

Ang Pacquiao-Broner title tiff nga ilarga sa Las Vegas, Nevada, co-promoted sang MP Promotions kag Floyd Mayweather Promotions. Ginpahayag man ni Pacquiao nga handa na sia magretiro matapos ang posibilidad nga rematch kay Mayweather.

Newspapers in Tagalog

Newspapers from Philippines

© PressReader. All rights reserved.