Klase sa syudad suspendido bangod sang pag-ulan

Hublas nga Kamatuoran - - Balita - Ni Ime SORNITO

Syudad sang ILOILO – Bangod sang walauntat nga pagbubo sang mamunog nga ulan kahapon, ginmando sang lokal nga pangulohan sang syudad ang pagsuspendir sang klase sa tanan nga level.

Ginmando ni acting Mayor Joe Espinosa III ang suspension sang klase sa tanan nga level kahapon sang udto kasunod man sang pag- ulan dala sang bagyo “Maring.”

Antes ini, kahapon sang aga una na nga ginmando ni Espinosa ang suspensyon sang klase sa mga preschool kag elementarya sa pangpubliko kag pribado nga mga eskwelahan.

Luwas naman sa syudad, suspendido man ang klase sa pila ka mga banwa sa probinsya sang Iloilo kaangay sang Banate, Dumangas, Barotac Viejo, San Miguel, kag Zarraga.

Sa bahin sang kapitolyo probinsyal, ginapanugyanan ang mga empleyado kag opisyales nga apektado sang pagbaha sa probinsya nga magpauli sang temprano para malikawan nga maperwisyohan sang baha.

Ang mga empleyado kag opisyales naman nga may importante nga trabaho ukon hilikuton ang ginpanugyanan nga magpabilin sa ila opisina.

Sa bahin sang Guimaras, ginsuspendir man ni Gob. Samuel Gumarin ang klase halin sa pre-school tubtob Grade 12 sa pangpubliko kag pribado nga mga eskwelahan bangod sang pag-ulan kag hangin./ PB

Newspapers in Tagalog

Newspapers from Philippines

© PressReader. All rights reserved.